Davangere: 10 ರೂ.ಗಳ ನಾಣ್ಯ ರೂಪದಲ್ಲಿ 25 ಸಾವಿರ ರೂ. ಠೇವಣಿ ಕಟ್ಟಿದ ಅಭ್ಯರ್ಥಿ!

ದಾವಣಗೆರೆ: ಜನಜಾಗೃತಿಗಾಗಿ ದಾವಣಗೆರೆ ಲೋಕಸಭೆ ಕ್ಷೇತ್ರದಲ್ಲಿ ಅಭ್ಯರ್ಥಿಯೋರ್ವ ಚುನಾವಣೆ ಸ್ಪರ್ಧಾ ಠೇವಣಿ 25 ಸಾವಿರ ರೂ.ಗಳನ್ನು 10 ರೂ.ಗಳ ನಾಣ್ಯ ರೂಪದಲ್ಲಿ ನೀಡಿ ಗಮನಸೆಳೆದಿದ್ದಾನೆ.

ಹತ್ತು ರೂ.ಗಳ ನಾಣ್ಯದ ಚೀಲವನ್ನು ಹೊತ್ತು ತಂದು ನಾಮಪತ್ರ ಸಲ್ಲಿಸಿದ ಈ ಅಭ್ಯರ್ಥಿಯ ಹೆಸರು ಎಚ್.ಎಸ್. ದೊಡ್ಡೇಶ್. ಇವರು ಜನಹಿತ ಪಕ್ಷದಿಂದ ನಾಮಪತ್ರ ಸಲ್ಲಿಸಿದ್ದಾರೆ.

ಠೇವಣಿಗಾಗಿ 10 ರೂ.ನಾಣ್ಯಗಳನ್ನು ಚೀಲದಲ್ಲಿ ತಂದಿರುವುದನ್ನು ಕಂಡು ಚುನಾವಣ ಸಿಬಂದಿ ಒಮ್ಮೆ ಹೌಹಾರಿದರು. ಬಳಿಕ ಅನಿವಾರ್ಯವಾಗಿ 10 ರೂ.ಗಳ ನಾಣ್ಯಗಳನ್ನು ಸ್ವೀಕರಿಸಿದರು. ನಾಣ್ಯಗಳನ್ನು ಎರಡ್ಮೂರು ಬಾರಿ ಎಣಿಸುವಷ್ಟರಲ್ಲಿ ಸಿಬಂದಿ ಸುಸ್ತಾದರು.

ಹತ್ತು ರೂ.ಗಳ ಚಲಾವಣೆಯಲ್ಲಿದೆ ಎಂಬ ಜಾಗೃತಿ ಮೂಡಿಸಲು ನಾಣ್ಯಗಳನ್ನು ಸಂಗ್ರಹಿಸಿ ಠೇವಣಿಯಾಗಿ ನೀಡಿದ್ದೇನೆ ಎನ್ನುತ್ತಾರೆ ದೊಡ್ಡೇಶ್.