ಈ ಬಾರಿಯೂ ಭತ್ತ ಖರೀದಿ ಕೇಂದ್ರ ಮರೀಚಿಕೆ?

„ರಾ. ರವಿಬಾಬು

ದಾವಣಗೆರೆ: ಭದ್ರಾ ಅಚ್ಚುಕಟ್ಟಿನ ದಾವಣಗೆರೆ ಜಿಲ್ಲೆಯಲ್ಲಿ ಬೇಸಿಗೆ ಭತ್ತದ ಹಂಗಾಮು ಪ್ರಾರಂಭವಾಗಿ ಸಾಕಷ್ಟು ದಿನ ಕಳೆದರೂ ಭತ್ತ ಖರೀದಿ ಕೇಂದ್ರ ಪ್ರಾರಂಭ ಆಗಿಲ್ಲ. ಜಿಲ್ಲೆಯ ಜನಪ್ರತಿನಿಧಿಗಳು ಸರ್ಕಾರ ಖರೀದಿ ಕೇಂದ್ರ ತೆರೆಯುವ ಮೂಲಕ ಭತ್ತದ ಬೆಳೆಗಾರರ ನೆರವಿಗೆ ಧಾವಿಸಬೇಕು ಎಂದು ಒತ್ತಾಯ ಮಾಡುತ್ತಲೇ ಇದ್ದಾರೆ.

ಆದರೆ ಸರ್ಕಾರ ಮಾತ್ರ ಕೊರೊನಾ, ಆರ್ಥಿಕ ಸ್ಥಿತಿಯ ನೆಪವೊಡ್ಡಿ ಭತ್ತ ಖರೀದಿ ಕೇಂದ್ರದತ್ತ ಚಿತ್ತ ಹರಿಸುತ್ತಿಲ್ಲ. ಹಾಗಾಗಿ ಭತ್ತ ಬೆಳೆದವರ ಗೋಳು ಹೇಳತೀರದ್ದಾಗಿದೆ. ರೈತರು ಸಾಲ ಮಾಡಿ ಬೆಳೆದಂತಹ ಭತ್ತಕ್ಕೆ ಸರಿಯಾದ ದರ ಸಿಗದೆ ತೊಂದರೆ ಅನುಭವಿಸುವುದು ಮಾಮೂಲು ಎನ್ನುವಂತಾಗಿದೆ. ಒಂದು ಎಕರೆಯಲ್ಲಿ ಭತ್ತ ಬೆಳೆಯುವುದಕ್ಕೆ 20-25 ಸಾವಿರ ರೂ. ಖರ್ಚಾಗುತ್ತದೆ. ಮಾರುಕಟ್ಟೆಯಲ್ಲಿ ಕ್ವಿಂಟಲ್‌ ಭತ್ತವನ್ನು 1400-1500 ರೂಪಾಯಿಗೆ ಮಾರಿದರೆ ರೈತರಿಗೆ ಏನೂ ಸಿಗುವುದೇ ಇಲ್ಲ. ಕೊರೊನಾ ನೆಪದಲ್ಲಿ ರೈತರನ್ನು ಸಾಯಿಸಲಾಗುತ್ತಿದೆ. ಎಲೆಕ್ಷನ್‌, ಮೀಟಿಂಗ್‌ ಎಲ್ಲವೂ ನಡೆಯುವುದು ನಡೆಯುತ್ತಲೇ ಇದೆ.

ಆದರೆ, ಭತ್ತ ಖರೀದಿ ಆರಂಭ ಮಾಡಿ ರೈತರನ್ನು ಉಳಿಸುವ ಕೆಲಸ ಆಗುತ್ತಲೇ ಇಲ್ಲ. ಏನಾದರೂ ಆಗಲಿ ಮೊದಲು ಖರೀದಿ ಕೇಂದ್ರ ಪ್ರಾರಂಭಿಸಬೇಕು ಎನ್ನುವುದು ರೈತ ಸಂಘ ಮತ್ತು ಹಸಿರು ಸೇನೆ ರಾಜ್ಯ ಕಾರ್ಯದರ್ಶಿ ಹೊನ್ನೂರು ಮುನಿಯಪ್ಪ ಅವರ ಒತ್ತಾಯ. ಬೆಂಬಲ ಬೆಲೆ ಯೋಜನೆಯಡಿ ಕ್ವಿಂಟಲ್‌ ಭತ್ತಕ್ಕೆ ಇಂತಿಷ್ಟ ದರ ನಿಗದಿಪಡಿಸಿ ಖರೀದಿ ಕೇಂದ್ರ ಆರಂಭಿಸಿದರೆ ರೈತರಿಗೆ ಅನುಕೂಲ ಆಗುತ್ತದೆ. ಸರ್ಕಾರ ನಿಗದಿಪಡಿಸಿರುವ ದರಕ್ಕಿಂತ ಕಡಿಮೆ ಬೆಲೆ ಟೆಂಡರ್‌ ಮಾಡಿದರೆ ಖರೀದಿದಾರರನ್ನು ಯಾಕೆ ಕಡಿಮೆ ದರ ಎಂದು ಖರೀದಿದಾರರನ್ನೂ ಕೇಳಲಿಕ್ಕೆ ರೈತರಿಗೆ ಧೈರ್ಯ ಇರುತ್ತದೆ.

ಹಾಗಾಗಿ ಖರೀದಿ ಕೇಂದ್ರ ಪ್ರಾರಂಭಿಸಲೇಬೇಕು ಎನ್ನುತ್ತಾರೆ ಅವರು. ರೈತರು ಬೆಳೆದ ಉತ್ಪನ್ನಗಳಿಗೆ ವೈಜ್ಞಾನಿಕ ಬೆಲೆ ನಿಗದಿ, ಡಾ| ಸ್ವಾಮಿನಾಥನ್‌ ವರದಿ ಯಥಾವತ್ತಾಗಿ ಜಾರಿ ಮಾಡದೇ ಹೋದರೂ ಚಿಂತೆ ಇಲ್ಲ. ಸದ್ಯಕ್ಕೆ ಖರೀದಿ ಕೇಂದ್ರ ಪ್ರಾರಂಭಿಸುವ ಮೂಲಕ ಭತ್ತ ಬೆಳೆದವರಿಗೆ ಅನುಕೂಲ ಮಾಡಿಕೊಡಬೇಕು. ಆದರೆ ಸರ್ಕಾರ ಕೊರೊನಾ ನೆಪದಲ್ಲಿ ಏನೂ ಮಾಡುತ್ತಲೇ ಇಲ್ಲ. ಎಲ್ಲವನ್ನೂ ಮಾಡಲಿಕ್ಕೆ ಹಣ ಇರುತ್ತದೆ, ಬೆಂಬಲ ಬೆಲೆ, ಪ್ರೋತ್ಸಾಹಧನ ನೀಡಿ ಖರೀದಿ ಕೇಂದ್ರ ಪ್ರಾರಂಭ ಮಾಡಲಿಕ್ಕೆ ಆಗುವುದಿಲ್ಲ ಎಂದು ಸರ್ಕಾರದ ಧೋರಣೆ ಬಗ್ಗೆ ಆಕ್ರೋಶ ವ್ಯಕ್ತಪಡಿಸುತ್ತಾರೆ.

ಎಲ್ಲ ಹಂಗಾಮಿನಲ್ಲಿ ಭತ್ತ ಬೆಳೆಯೋದು, ಖರೀದಿ ಕೇಂದ್ರ ಆರಂಭಕ್ಕೆ ಒತ್ತಾಯಿಸಿ ಬೀದಿಗಿಳಿದು ಹೋರಾಟ ಮಾಡುವುದು ನಡೆಯುತ್ತಲೇ ಇದೆ. ಆದರೆ ಕಳೆದ ವರ್ಷ ಮತ್ತು ಈ ವರ್ಷ ಕೊರೊನಾ ಕಾರಣಕ್ಕೆ ರೈತರು ಹೊರಗೆ ಬರದಂತಾಗಿದೆ. ಕೊರೊನಾದ ಬಗ್ಗೆ ಸರ್ಕಾರವೇ ಭಯ ಹುಟ್ಟುವಂತೆ ಮಾಡುತ್ತಿದೆ. ಹಾಗಾಗಿ ರೈತರು ಹೋರಾಟ ಮಾಡುವ ಮಾತೇ ದೂರ ಉಳಿಯುತ್ತಿದೆ. ಸರ್ಕಾರಕ್ಕೆ ಇದೇ ವರವಾಗಿದೆ.

ಹೇಳುವವರು, ಕೇಳುವವರು ಇಲ್ಲದಂತಾಗಿರುವುದರಿಂದ ಖರೀದಿ ಕೇಂದ್ರ ಪ್ರಾರಂಭಕ್ಕೆ ಮನಸ್ಸು ಮಾಡುತ್ತಿಲ್ಲ. ರೈತರ ಸಂಕಷ್ಟ ದೂರವಾಗುತ್ತಿಲ್ಲ ಎಂದು ಹೊನ್ನೂರು ಮುನಿಯಪ್ಪ ಬೇಸರ ವ್ಯಕ್ತಪಡಿಸುತ್ತಾರೆ.

ಜನಪ್ರತಿನಿಧಿಗಳ ಒತ್ತಾಯ: ಭತ್ತ ಖರೀದಿ ಕೇಂದ್ರ ಪ್ರಾರಂಭಿಸಬೇಕು ಎಂದು ಜಿಲ್ಲೆಯ ಜನಪ್ರತಿನಿಧಿಗಳು ಸಹ ಒತ್ತಾಯ ಮಾಡುತ್ತಿದ್ದಾರೆ. ಸಂಸದ ಡಾ| ಜಿ.ಎಂ. ಸಿದ್ದೇಶ್ವರ, ದಾವಣಗೆರೆ ಉತ್ತರ ವಿಧಾನಸಭಾ ಕ್ಷೇತ್ರದ ಶಾಸಕ ಎಸ್‌.ಎ. ರವೀಂದ್ರನಾಥ್‌ ಅವರು ಜಿಲ್ಲಾ ಉಸ್ತುವಾರಿ ಸಚಿವ ಬೈರತಿ ಬಸವರಾಜ್‌ ಅವರಿಗೆ ಈ ಬಗ್ಗೆ ಒತ್ತಾಯಿಸಿದ್ದಾರೆ. ಉಸ್ತುವಾರಿ ಸಚಿವರೂ ಭರವಸೆ ನೀಡುತ್ತಲೇ ಇದ್ದಾರೆ. ಆದರೆ ಕಾರ್ಯರೂಪಕ್ಕೆ ಮಾತ್ರ ಬಂದಿಲ್ಲ. ಖರೀದಿ ಕೇಂದ್ರ ಕೇಂದ್ರ ಪ್ರಾರಂಭವಾಗುವ ಹೊತ್ತಿಗೆ ಹಂಗಾಮು ಮುಗಿದು ಹೋದರೂ ಅಚ್ಚರಿ ಪಡಬೇಕಾಗಿಲ್ಲ.

ಜಿಲ್ಲೆಯ 53,431 ಹೆಕ್ಟೇರ್‌ನಲ್ಲಿದೆ ಭತ್ತ ಬೆಳೆ

ದಾವಣಗೆರೆ ತಾಲೂಕಿನಲ್ಲಿ 20,848 ಹೆಕ್ಟೇರ್‌ ಅಂತೆಯೇ ಹರಿಹರದಲ್ಲಿ 20,502, ಚನ್ನಗಿರಿಯಲ್ಲಿ 4,385. ಹೊನ್ನಾಳಿಯಲ್ಲಿ 5,033 ಹಾಗೂ ನ್ಯಾಮತಿಯಲ್ಲಿ 663 ಹೆಕ್ಟೇರ್‌ ಒಳಗೊಂಡಂತೆ ಜಿಲ್ಲೆಯ 53,431 ಹೆಕ್ಟೇರ್‌ನಲ್ಲಿ ಭತ್ತ ಬೆಳೆಯಲಾಗಿದೆ. ಈಗಾಗಲೇ ರೈತರು ಮುಕ್ತ ಮಾರುಕಟ್ಟೆಯಲ್ಲಿ ಮಾರಾಟ ಮಾಡುತ್ತಿದ್ದಾರೆ. ಖರೀದಿ ಕೇಂದ್ರ ಪ್ರಾರಂಭವಾದಲ್ಲಿ ರೈತರಿಗೆ ಅನುಕೂಲ ಆಗಲಿದೆ. ಮುಕ್ತ ಮಾರುಕಟ್ಟೆಯಲ್ಲಿ ರೈತರ ನಿರೀಕ್ಷಿತ ಧಾರಣೆಗಿಂತಲೂ ಕಡಿಮೆ ದರದಲ್ಲಿ ಖರೀದಿ ಮಾಡುವುದು ನಿಲ್ಲಲಿದೆ. ಹಾಗಾಗಿ ಸರ್ಕಾರ ಭತ್ತ ಖರೀದಿ ಕೇಂದ್ರ ಪ್ರಾರಂಭಕ್ಕೆ ಮುಂದಾಗುವುದು ತುರ್ತು ಅಗತ್ಯ.

ವಿಸ್ತರಣೆಗೆ ಮನವಿ

ಬೆಂಬಲ ಬೆಲೆ ಯೋಜನೆಯಡಿ ಭತ್ತ ಖರೀದಿಗೆ ರೈತರು ತಮ್ಮ ಹೆಸರು ನೋಂದಣಿಗೆ ಮೇ 5 ರವರೆಗೆ ಕಾಲಾವಕಾಶ ನೀಡಲಾಗಿತ್ತು. ಕೊರೊನಾ, ಲಾಕ್‌ಡೌನ್‌ ಮತ್ತಿತರ ಕಾರಣಗಳಿಂದ ನಿರೀಕ್ಷಿತ ಪ್ರಮಾಣದಲ್ಲಿ ರೈತರು ನೋಂದಣಿ ಮಾಡಿಸಲು ಆಗಲಿಲ್ಲ. ಹಾಗಾಗಿ ನೋಂದಣಿಗೆ ಇನ್ನಷ್ಟು ಕಾಲಾವಕಾಶ ನೀಡಬೇಕು ಎಂದು ಸರ್ಕಾರಕ್ಕೆ ಪತ್ರ ಬರೆಯಲಾಗಿದೆ. ಖರೀದಿ ಕೇಂದ್ರ ಪ್ರಾರಂಭಕ್ಕೆ ಅನುಮತಿ ನೀಡಿದರೆ ಖರೀದಿ ಪ್ರಕ್ರಿಯೆ ಪ್ರಾರಂಭಿಸಲಾಗುವುದು ಎಂದು ಆಹಾರ ಇಲಾಖೆ ಉಪನಿರ್ದೇಶಕ ಡಿ. ಮಂಟೇಸ್ವಾಮಿ ತಿಳಿಸಿದರು.