ದಾಂಡೇಲಿ: ಕ್ಲಿನಿಕಿಗೆ ಬಂದು ಚಿಕಿತ್ಸೆ ಪಡೆದ ಗಾಯಗೊಂಡ ಕೋತಿ

ದಾಂಡೇಲಿ: ತನ್ನ ಬಳಗದಿಂದ ಬೇರ್ಪಟ್ಟು ಸಮಾಜದ ಜನತೆಯ ಜತೆ ಅಂಜಿಕೆ, ಅಳುಕಿಲ್ಲದೇ ಒಡನಾಟ ಬೆಳೆಸಿಕೊಂಡ ಕೋತಿಯೊಂದು ಕ್ಲಿನಿಕ್‌ಗೆ ಬಂದು ಚಿಕಿತ್ಸೆ ಪಡೆದ ವಿಡಿಯೋವೊಂದು ವೈರಲ್‌ ಆಗಿದೆ. ತನ್ನ ಕಾಲಿಗೆ ಗಾಯ ಮಾಡಿಕೊಂಡಿದ್ದ ಈ ಕೋತಿ ಚಿಕಿತ್ಸೆಗಾಗಿ ನಗರದ ಕಲಾಪ್ರಸಾದ ಮೆಡಿಕಲ್‌ ಬಳಿಯಿರುವ ಡಾ| ರಶ್ಮಿ ಕಂಬದಕೋಣೆಯವರ ಕ್ಲಿನಿಕ್‌ ಬಳಿ

ಬಂದು ಅಂಗಲಾಚುತ್ತಿತ್ತು. ಇದನ್ನು ಗಮನಿಸಿದ ಡಾ| ರಶ್ಮಿಯವರು ತಕ್ಷಣವೇ ಪಕ್ಕದ ಮೆಡಿಕಲ್‌ ಮಾಲಕ ಉಮೇಶ ಸಪ್ರಯವರನ್ನು ಕರೆಯಿಸಿ, ಅವರ ಸಹಾಯ ಪಡೆದು ಚಿಕಿತ್ಸೆ ಕೊಡಿಸಿ ಮಾನವೀಯತೆ ಮೆರೆದಿದ್ದಾರೆ. ಈ ಘಟನೆಯ ವಿಡಿಯೋವೊಂದು ಬುಧವಾರ ನಗರದಲ್ಲಿ ವೈರಲ್‌ ಆಗಿ ಗಮನ ಸೆಳೆದಿದೆ. ಕಳೆದ ಎರಡು ಮೂರು ತಿಂಗಳುಗಳಿಂದ ನಗರದಲ್ಲಿ ಸುದ್ದಿಯಲ್ಲಿರುವ ಈ ಹನುಮ ತನಗೆ ಗಾಯವಾಯಿತೆಂದರೆ ತಕ್ಷಣವೇ ಆಸ್ಪತ್ರೆ ಅಥವಾ ಕ್ಲಿನಿಕ್‌ಗಳ ಬಾಗಿಲ ಮುಂದೆ ಕುಳಿತುಕೊಂಡು ತನ್ನದೇ ಆದ ಹಾವಭಾವದಲ್ಲಿ ಚಿಕಿತ್ಸೆ ಕೇಳುತ್ತದೆ. ಚಿಕಿತ್ಸೆ ಪಡೆದ ಬಳಿಕವಷ್ಟೆ ಅಲ್ಲಿಂದ ತನ್ನ ಪಾಡಿಗೆ ತಾನು
ಹೊರಡುತ್ತದೆ.