ದಲಿತ ಶಾಸಕನ ಜತೆ ಪುತ್ರಿಯ ಮದುವೆ; ತಂದೆಯಿಂದ ಆತ್ಮಹತ್ಯೆಗೆ ಯತ್ನ

ವಿಲ್ಲುಪುರಂ: ತಮಿಳುನಾಡಿನ ಆಡಳಿತಾರೂಢ ಎಐಎಡಿಎಂಕೆ ಶಾಸಕ ಎ.ಪ್ರಭು (36) ಸೋಮವಾರ ಪ್ರೇಯಸಿ ಸೌಂದರ್ಯಾ ಜತೆಗೆ ದಾಂಪತ್ಯ ಜೀವನಕ್ಕೆ ಕಾಲಿಟ್ಟಿದ್ದಾರೆ.

ಆದರೆ ಮದುವೆಯ ಕಾರ್ಯಕ್ರಮಗಳು ನಡೆಯುತ್ತಿದ್ದಂತೆಯೇ ಸೌಂದರ್ಯಾ ಅವರ ತಂದೆಯು ಶಾಸಕನ ನಿವಾಸದ ಎದುರು ಪೆಟ್ರೋಲ್‌ ಸುರಿದು ಬೆಂಕಿಹಚ್ಚಿಕೊಂಡು ಆತ್ಮಹತ್ಯೆಗೆ ಯತ್ನಿಸಿದ ಬೆಳವಣಿಗೆಯೂ ನಡೆದಿದೆ.

ಕೂಡಲೇ ಅಲ್ಲಿದ್ದ ಪೊಲೀಸರು ಮತ್ತು ಇತರರು ಅವರನ್ನು ಅಪಾಯದಿಂದ ಪಾರು ಮಾಡಿದ್ದಾರೆ.

ಶಾಸಕ ಎ.ಪ್ರಭು ದಲಿತ ವರ್ಗಕ್ಕೆ ಸೇರಿದ್ದರೆ, ದೇವಸ್ಥಾನವೊಂದರಲ್ಲಿ ಅರ್ಚಕರೊಬ್ಬರ ಪುತ್ರಿ ಸೌಂದರ್ಯಾ.
ಜಾತಿ ವಿಚಾರವೇ ಇಲ್ಲಿ ತಡೆಗೋಡೆಯಾಗಿದೆ. ಅರ್ಚಕರ ಕುಟುಂಬದ ಸದಸ್ಯರು, ಪುತ್ರಿಯನ್ನು ಶಾಸಕನ ಕಡೆಯವರು ಅಪಹರಿಸಿದ್ದಾರೆ ಎಂದು ದೂರಿದ್ದಾರೆ.

ಆದರೆ ವಿವಾಹ ಕಾರ್ಯಕ್ರಮಗಳ ಬಳಿಕ ನೂತನ ದಂಪತಿ ಮಾಧ್ಯಮಗಳಿಗೆ ವಿವರಣೆ ನೀಡಿ, ‘ನಾವಿಬ್ಬರೂ ಒಬ್ಬರನ್ನೊಬ್ಬರು ಇಷ್ಟಪಟ್ಟು ಮದುವೆಯಾಗಿದ್ದೇವೆ’ ಎಂದಿದ್ದಾರೆ. ವಧು ಕೂಡ ಸ್ವಇಚ್ಛೆಯಿಂದ ಮದುವೆಗೆ ಒಪ್ಪಿದ್ದಾಗಿ ಹೇಳಿಕೊಂಡಿದ್ದಾರೆ.

ಪೊಲೀಸ್‌ ಅಧಿಕಾರಿಯೊಬ್ಬರು ನೀಡಿದ ಮಾಹಿತಿ ಪ್ರಕಾರ “ಶಾಸಕ ಮತ್ತು ಸೌಂದರ್ಯಾ ನಡುವೆ 4 ವರ್ಷಗಳಿಂದ ಪ್ರೇಮವಿತ್ತು. ಅವರು ಪ್ರಾಪ್ತ ವಯಸ್ಕರಾಗುವ ಮೊದಲೇ ಇಬ್ಬರೂ ಪ್ರೇಮಪಾಶದಲ್ಲಿ ಸಿಲುಕಿದ್ದರು’ ಎಂದು ಹೇಳಿದ್ದಾರೆ.

ಆದರೆ ಶಾಸಕ ಪ್ರಭು ಅವರು, ನಾಲ್ಕು ತಿಂಗಳುಗಳಿಂದ ಇಬ್ಬರ ನಡುವೆ ಪರಿಚಯವಾಗಿತ್ತು ಎಂದಿದ್ದಾರೆ.