ಷರೀಫ್ ಭ್ರಷ್ಟಾಚಾರ: ದೈನಂದಿನ ವಿಚಾರಣೆಗೆಪಾಕ್‌ ಸುಪ್ರೀಂ ನಿರ್ಧಾರ

ಇಸ್ಲಾಮಾಬಾದ್‌ : ಪನಾಮಾ ಪೇಪರ್‌ ಲೀಕ್‌ ಮೂಲಕ ಬಹಿರಂಗವಾಗಿರುವ 67ರ ಹರೆಯದ ಪಾಕ್‌ ಪ್ರಧಾನಿ ನವಾಜ್‌ ಷರೀಫ್ ಮತ್ತು ಅವರ ಕುಟುಂಬ ಸದಸ್ಯರ ಭ್ರಷ್ಟಾಚಾರದ ಬಗ್ಗೆ  ದೈನಂದಿನ ನೆಲೆಯಲ್ಲಿ  ವಿಚಾರಣೆ ನಡೆಸಲು ಪಾಕಿಸ್ಥಾನದ ಸುಪ್ರೀಂ ಕೋರ್ಟ್‌ ನಿರ್ಧರಿಸಿದೆ. ಇದರಿಂದ ನವಾಜ್‌ ಷರೀಫ್ ಅವರ ರಾಜಕೀಯ ಭವಿಷ್ಯದ ಮೇಲೆ ತೀವ್ರ ದುಷ್ಪರಿಣಾಮ ಉಂಟಾಗಲಿದೆ.

ಜಸ್ಟಿಸ್‌ ಆಸಿಫ್ ಸಯೀದ್‌ ಖೋಸಾ ನೇತೃತ್ವದಲ್ಲಿ  ಐವರು ಸದಸ್ಯರನ್ನು ಒಳಗೊಂಡ ಪಾಕ್‌ ಸುಪ್ರೀಂ ಕೋರ್ಟ್‌ ಪೀಠ ಎರಡು ವಾರಗಳ ಬಳಿಕ ಇಂದು ಪುನಃ ಷರೀಫ್ ಭ್ರಷ್ಟಾಚಾರ ಕುರಿತಾದ ವಿಚಾರಣೆಯನ್ನು ಆರಂಭಿಸಿತು. 

ಷರೀಫ್ ಹಾಗೂ ಕುಟುಂಬದವರ ಪನಾಮಾ ಭ್ರಷ್ಟಾಚಾರ ಹಗರಣದ ಕುರಿತಾಗಿ ತನಿಖೆ ನಡೆಯಬೇಕೆಂದು ಆಗ್ರಹಿಸಿ ಸುಪ್ರೀಂ ಕೋರ್ಟಿಗೆ ಸಲ್ಲಿಸಲಾಗಿರುವ ಐದು ಅರ್ಜಿದಾರರ ಪೈಕಿ ಒಬ್ಬರಾಗಿರುವ ಮಾಜಿ ಕ್ರಿಕೆಟಿಗ-ಹಾಲಿ ರಾಜಕಾರಣಿ, ಇಮ್ರಾನ್‌ ಖಾನ್‌ ಅವರ ಪಾಕಿಸ್ಥಾನ್‌ ತೆಹರೀಕ್‌ ಎ ಇನ್‌ಸಾಫ್ (ಪಿಟಿಐ) ವಿರೋಧ ಪಕ್ಷದ ಪ್ರಮುಖ ಬೇಡಿಕೆಯ ಪ್ರಕಾರ ಷರೀಫ್ ವಿರುದ್ಧದ ವಿಚಾರಣೆಯನ್ನು ದೈನಂದಿನ ನೆಲೆಯಲ್ಲಿ ನಡೆಸಲಾಗುವುದು ಎಂದು ಜಸ್ಟಿಸ್‌ ಖೋಸಾ ಪ್ರಕಟಿಸಿದರು.