ಹಲಗಾದಲ್ಲಿ ಸಿಲಿಂಡರ್‌ ಸ್ಫೋಟ: ನಾಲ್ಕು ಮನೆಗಳು ಭಸ್ಮ

ಬೆಳಗಾವಿ: ತಾಲೂಕಿನ ಹಲಗಾ ಗ್ರಾಮದಲ್ಲಿ ರವಿವಾರ ಬೆಳಗ್ಗೆ ಸಿಲಿಂಡರ್‌ ಗ್ಯಾಸ್‌ ಸ್ಫೋಟಗೊಂಡು ನಾಲ್ಕು ಮನೆಗಳು ಬೆಂಕಿಗಾಹುತಿಯಾಗಿ ಲಕ್ಷಾಂತರ ಮೌಲ್ಯದ ವಸ್ತುಗಳು ಸುಟ್ಟು ಕರಕಲಾಗಿವೆ.

ಗ್ರಾಮದ ಲಕ್ಷ್ಮೀ ಗಲ್ಲಿಯಲ್ಲಿರುವ ಶಾಂತಿನಾಥ ಚಿಕ್ಕಪರಪ್ಪ, ಜೀನಪ್ಪ ಚಿಕ್ಕಪರಪ್ಪ ಹಾಗೂ ಸುನೀಲ ಚಿಕ್ಕಪರಪ್ಪ ಎಂಬವರ ಮನೆಗಳು ಸಂಪೂರ್ಣ ಸುಟ್ಟು ಭಸ್ಮವಾಗಿವೆ. ಬೆಳಗ್ಗೆ 9:30ರ ಸುಮಾರಿಗೆ ಸಿಲಿಂಡರ್‌ ಸೋರಿಕೆಯಾಗಿ ಸ್ಫೋಟಗೊಂಡು ಈ ಅವಘಡ ಸಂಭವಿಸಿದ್ದು, ಅದೃಷ್ಟವಶಾತ್‌ ಯಾವುದೇ ಪ್ರಾಣಹಾನಿ ಸಂಭವಿಸಿಲ್ಲ. ರವಿವಾರ ಬೆಳಗ್ಗೆ ಶಾಂತಿನಾಥ ಚಿಕ್ಕಪರಪ್ಪ ಎಂಬವರು ಭತ್ತದ ರಾಶಿ ಮಾಡಲು ಹೊಲಕ್ಕೆ ತೆರಳಿದ್ದರು. ಸುಜಾತಾ ಎಂಬ ಇವರ ಮಗಳು ಮಾತ್ರ ಮನೆಯಲ್ಲಿದ್ದಳು. ಗ್ಯಾಸ್‌ ಒಲೆ ಹೊತ್ತಿಸಿ ಮನೆಯ ಹೊರಗಡೆ ಬಂದು ಕೆಲಸದಲ್ಲಿ ನಿರತಳಾಗಿದ್ದಳು. ನೋಡುವಷ್ಟರಲ್ಲಿ ಬೆಂಕಿ ಹೊತ್ತಿಕೊಂಡಿತ್ತು. ಆಗ ಚೀರಾಡಲು ಶುರು ಮಾಡಿದ ಸುಜಾತಾ ಓಡಿ ಹೊರ ಬಂದಿದ್ದಾಳೆ. ಬಳಿಕ ಸಿಲಿಂಡರ್‌ ಸ್ಫೋಟಗೊಂಡು ಬೆಂಕಿ ಆವರಿಸಿಕೊಂಡಿತ್ತು. ಸುತ್ತಲಿನ ಜನ ಸೇರಿ ಬೆಂಕಿ ಆರಿಸಲು ಯತ್ನಿಸಿದರೂ ಅಷ್ಟರೊಳಗೆ ಬೆಂಕಿ ಇನ್ನುಳಿದ ಮನೆಗಳಿಗೂ ವ್ಯಾಪಿಸಿಕೊಂಡಿತ್ತು. ಪಕ್ಕದ ಮನೆ ಮೇಲೆ ಹತ್ತಿದ ಜನರು ಕೊಡಗಳಿಂದ ನೀರು ಸುರಿದು ಬೆಂಕಿ ನಂದಿಸಲು ಪ್ರಯತ್ನಿಸಿದರು. ಸ್ಥಳಕ್ಕೆ ಅಗ್ನಿಶಾಮಕ ದಳ ಸಿಬ್ಬಂದಿ ಬಂದು ಬೆಂಕಿ ನಂದಿಸಿದರು.