2,200 ಹುತಾತ್ಮರ ಕುಟುಂಬದ ಆರೋಗ್ಯ ವಿಮೆ CRPFನಿಂದಲೇ ಪಾವತಿ

ನವದೆಹಲಿ: ಕರ್ತವ್ಯದ ವೇಳೆ ಅಸುನೀಗಿರುವ 2,200 ಸಿಬ್ಬಂದಿಯ ಕುಟುಂಬ ವರ್ಗಕ್ಕೆ ಸಮಗ್ರ ಆರೋಗ್ಯ ಸೇವೆ ಹಾಗೂ ಸಂಪೂರ್ಣವಾಗಿ ಆರೋಗ್ಯ ವಿಮೆ ಪ್ರೀಮಿಯಂ ಪಾವತಿ ಮಾಡುವ ನಿರ್ಧಾರವನ್ನು ಕೇಂದ್ರೀಯ ಮೀಸಲು ಪೊಲೀಸ್‌ ಪಡೆ (ಸಿಆರ್‌ಪಿಎಫ್) ಕೈಗೊಂಡಿದೆ.

ಇದೇ ಮೊದಲ ಬಾರಿಗೆ ಇಂಥ ತೀರ್ಮಾನ ಕೈಗೊಳ್ಳಲಾಗುತ್ತಿದೆ. ಸಿಆರ್‌ಪಿಎಫ್ ನಲ್ಲಿ ವಿವಿಧ ರ್‍ಯಾಂಕಿಂಗ್‌ನ 3.25 ಲಕ್ಷ ಮಂದಿ ಸಿಬ್ಬಂದಿ ಇದ್ದಾರೆ. ಮಾ.19ರಂದು ನಡೆಯಲಿರುವ 81ನೇ ಸ್ಥಾಪನಾ ದಿನದಂದು ಈ ಬಗ್ಗೆ ಘೋಷಣೆ ಮಾಡಲಾಗುತ್ತದೆ. ಪ್ರೀಮಿಯಂ ಪಾವತಿ ಮಾಡುವ ಮೊತ್ತವನ್ನು ಯೋಧರ ಕಲ್ಯಾಣಕ್ಕಾಗಿ ಬಳಕೆ ಮಾಡುವ ನಿಧಿಯಿಂದ ಪಡೆದುಕೊಳ್ಳಲಾಗುತ್ತದೆ ಎಂದು ಸಿಆರ್‌ಪಿಎಫ್ ಮಹಾನಿರ್ದೇಶಕ ಎ.ಪಿ.ಮಹೇಶ್ವರಿ ಭಾನುವಾರ ತಿಳಿಸಿದ್ದಾರೆ.

ಇದುವರೆಗಿನ ವ್ಯವಸ್ಥೆ ಪ್ರಕಾರ, ಹುತಾತ್ಮರಾಗಿರುವ ಯೋಧರ ಕುಟುಂಬ ಸದಸ್ಯರೇ ಆರೋಗ್ಯ ವಿಮೆಯ ಪ್ರೀಮಿಯಂ ಅನ್ನು ಪಾವತಿ ಮಾಡಿ, ಸರ್ಕಾರದಿಂದ ಸಿಗುವ ಆರೋಗ್ಯಸೇವೆಯ ಸೌಲಭ್ಯ ಪಡೆಯಬೇಕಾಗಿತ್ತು. ಆದರೆ, ಇನ್ನು ಮುಂದೆ ಸಿಆರ್‌ಪಿಎಫ್ ತನ್ನದೇ ನಿಧಿಯಿಂದ ಇದನ್ನು ಪಾವತಿಸಲಿದೆ.