ಕುಡಿದು ತೂರಾಡಿದ ಬಸ್‌ ಚಾಲಕ: ಜಾಲತಾಣದಲ್ಲಿ ವೀಡಿಯೋ ವೈರಲ್‌

ಕುಂದಾಪುರ: ಬೆಂಗಳೂರಿನಿಂದ ಬರುತ್ತಿದ್ದ ಖಾಸಗಿ ಬಸ್‌ನ ಚಾಲಕನೊಬ್ಬ ದಾರಿ ಮಧ್ಯೆ ಕುಡಿದು ತೂರಾಡಿದ ವೀಡಿಯೋವೊಂದು ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿದೆ. ಚಾಲಕನ ಈ ದುರ್ವರ್ತನೆ ವಿರುದ್ಧ ಭಾರೀ ಆಕ್ರೋಶ ವ್ಯಕ್ತವಾಗಿದೆ.

ಬೆಂಗಳೂರಿನಿಂದ ಕುಂದಾಪುರ ಕಡೆಗೆ ಬರುತ್ತಿದ್ದ ಖಾಸಗಿ ಬಸ್‌ ಇದಾಗಿತ್ತು. ಬೆಂಗಳೂರಿನಿಂದ ಹೊರಟಿದ್ದ ಬಸ್‌ನ ಚಾಲಕ ಮೊದಲೇ ಕುಡಿದು ಬಸ್‌ ಚಲಾಯಿಸಿದ್ದು, ಮಧ್ಯರಾತ್ರಿಯ ವೇಳೆಗೆ ಹಾಸನ-ಸಕಲೇಶಪುರ ದಾರಿ ಮಧ್ಯೆ ವಿರಾಮಕ್ಕೆಂದು ನಿಲ್ಲಿಸಿದ್ದ.

ಈ ವೇಳೆಯೂ ಚಾಲಕ ಮತ್ತೆ ಕುಡಿದು, ಸಂಪೂರ್ಣ ನಿಯಂತ್ರಣವೇ ಕಳೆದುಕೊಂಡಿದ್ದ. ಬಸ್ಸನ್ನು ಹತ್ತುವ ಸ್ಥಿತಿಯೂ ಆತನಲ್ಲಿರಲಿಲ್ಲ. ಇದನ್ನು ಗಮನಿಸಿದ ಪ್ರಯಾಣಿಕರು ಆಕ್ರೋಶ ವ್ಯಕ್ತಪಡಿಸಿ, ಆತ ಮತ್ತೆ ಬಸ್‌ ಚಲಾಯಿಸದಂತೆ ತಡೆದು ಹಲ್ಲೆಯನ್ನೂ ನಡೆಸಿರುವುದು ವೈರಲ್‌ ಆದ ವೀಡಿಯೋದಲ್ಲಿದೆ.