ಕೋವಿಡ್ ಲಸಿಕೆ ಶೇ.46 ಸಾಧನೆ

ಧಾರವಾಡ: ಕೋವಿಡ್ ನಿಯಂತ್ರಣಕ್ಕೆ ಅಸ್ತ್ರವಾಗಿರುವ ಕೋವಿಶಿಲ್ಡ್‌ ಲಸಿಕೆ ಹಾಕುವ ಕಾರ್ಯ ಜಿಲ್ಲೆಯ 137 ಕೇಂದ್ರಗಳಲ್ಲಿ ಸಾಗಿದೆ. ಆದರೆ ಲಸಿಕೆಯ ಅಡ್ಡಪರಿಣಾಮಗಳ ಆತಂಕ ಮತ್ತು ಇತರೇ ಕಾರಣಗಳಿಂದ ಲಸಿಕೆ ಹಾಕಿಕೊಳ್ಳಲು ಹಿಂದೇಟು ಹಾಕುವಂತಾಗಿದೆ.

ಜ.16ರಿಂದ ಕೋವಿಶಿಲ್ಡ್‌ ಲಸಿಕೆ ಹಾಕುವ ಕಾರ್ಯ ಭರದಿಂದ ಸಾಗಿದ್ದು, ಆದರೆ ಲಸಿಕೆ ಪಡೆಯಲು ಹೆಸರು ನೋಂದಣಿ ಮಾಡಿಕೊಂಡಿದ್ದವರಿಂದಲೇ ನಿರಾಸಕ್ತಿ ವ್ಯಕ್ತವಾಗಿದೆ. ಈವರೆಗೆ ನಿಗದಿತ ತಲುಪಲಾಗಿಲ್ಲವಾದರೂ ಶೇ.46ರಷ್ಟು ಸಾಧನೆ ಮಾತ್ರವೇ ಆಗಿದ್ದು, ಕೋವಿಶಿಲ್ಡ್‌ ಲಸಿಕಾಕರಣಕ್ಕೆ ನಿರೀಕ್ಷಿತ ಮಟ್ಟದ ಸ್ಪಂದನೆ ಸಿಗದಂತಾಗಿದೆ.

ಜಿಲ್ಲೆಯಲ್ಲಿ ಲಸಿಕೆ ಪಡೆಯಲು ನೋಂದಣಿ ಮಾಡಿಕೊಂಡ 27,669 ಜನರ ಪೈಕಿ ಈವರೆಗೆ 18,471 ಜನರಿಗೆ ಲಸಿಕೆ ಪಡೆದುಕೊಳ್ಳಲು ಆರೋಗ್ಯ ಇಲಾಖೆಯಿಂದ ಸಮಯ ನಿಗದಿಪಡಿಸಿ, ಸಂದೇಶ ನೀಡಲಾಗಿತ್ತು. ಈ ಪೈಕಿ 8560 ಜನರು ಲಸಿಕೆ ಹಾಕಿಸಿಕೊಂಡಿದ್ದು, ಉಳಿದ 9911 ಜನರಿಂದ ಈವರೆಗೂ ಸ್ಪಂದನೆ ಲಭಿಸಿಲ್ಲ. ಇನ್ನುಳಿದ 9198 ಜನರಿಗೆ ಸಮಯ ನಿಗದಿಗೊಳಿಸಿ, ಸಂಪರ್ಕಿಸುವ ಕಾರ್ಯ ಇನ್ನಷ್ಟೇ ಆಗಬೇಕಿದೆ.

ಲಸಿಕೆ ಹಾಕಿಸಿಕೊಳ್ಳುವುದು ಕಡ್ಡಾಯವಲ್ಲ. ಆದರೆ ಸ್ವಯಂ ಪ್ರೇರಣೆಯಿಂದಲೇ ಹೆಸರು ನೋಂದಣಿ ಮಾಡಿಕೊಂಡವರೇ ಲಸಿಕೆ ಹಾಕಿಸಿಕೊಂಡ ಕೆಲವರಲ್ಲಿ ಕಂಡು ಬಂದಿರುವ ಕೆಲ ಅಡ್ಡಪರಿಣಾಮ ಲಕ್ಷಣಗಳಿಂದ ಆತಂಕಕ್ಕೆ ಒಳಗಾಗಿ ಲಸಿಕೆ ಹಾಕಿಕೊಳ್ಳಲು ಹಿಂದೇಟು ಹಾಕುವಂತಾಗಿದೆ. ಲಸಿಕೆ ಹಾಕಿಸಿಕೊಳ್ಳಲು ಒತ್ತಾಯ ಮಾಡದೆ ನಿಗದಿಪಡಿಸಿದ ದಿನ, ಸಮಯಕ್ಕೆ ಸರಿಯಾಗಿ ಹಾಜರಾಗುತ್ತಿರುವ ಆರೋಗ್ಯ ಕಾರ್ಯಕರ್ತರಿಗಷ್ಟೇ ಲಸಿಕೆ ಹಾಕುವ ಕಾರ್ಯವಂತೂ ಸಾಗಿದೆ.

ಆದರೆ ನಿರೀಕ್ಷಿತ ಮಟ್ಟದಲ್ಲಿ ಲಸಿಕಾ ಕಾರ್ಯಕ್ಕೆ ಸ್ಪಂದನೆ ಸಿಗದೆ ಕೊಂಚ ಹಿನ್ನಡೆಯಾದಂತಾಗಿದೆ. ಇದಲ್ಲದೇ ಜ.31ರಿಂದ ಫೆ.3ರವರೆಗೆ ಜಿಲ್ಲೆಯಲ್ಲಿ ಪಲ್ಸ್‌ ಪೋಲಿಯೋ ಲಸಿಕೆ ಹಾಕುವ ಕಾರ್ಯ ನಡೆಯಲಿದೆ. ಈ ಸಮಯದಲ್ಲಿ ಕೋವಿಶಿಲ್ಡ್‌ ಲಸಿಕೆ ಹಾಕುವ ಕಾರ್ಯದಲ್ಲಿಯೂ ವ್ಯತ್ಯಯ ಆಗಲಿದೆ.

ಲಸಿಕೆ ಹಾಕಿಸಿಕೊಳ್ಳಲು ಹಿಂದೇಟು: ಜಿಲ್ಲೆಗೆ ಎರಡು ಹಂತದಲ್ಲಿ ಒಟ್ಟು 28,380 ಲಸಿಕೆ ಬಂದಿದ್ದು, ಈ ಪೈಕಿ ಡಿಎಚ್‌ಒ ಆವರಣದಲ್ಲಿರುವ ಲಸಿಕಾ ಉಗ್ರಾಣದಲ್ಲಿ 10,520 ಲಸಿಕೆ ಹೊರತುಪಡಿಸಿ ಉಳಿದ ಲಸಿಕೆಗಳನ್ನು ಲಸಿಕೆ ಹಾಕುವ ಕೇಂದ್ರಗಳಿಗೆ ರವಾನಿಸಲಾಗಿದೆ. ಜಿಲ್ಲೆಯ ಸರಕಾರಿ ಹಾಗೂ ಖಾಸಗಿ ಸೇರಿ ಒಟ್ಟು 89 ಕೇಂದ್ರಗಳಲ್ಲಿ ಲಸಿಕೆ ಹಾಕುವ ಪ್ರಕ್ರಿಯೆ ಸಾಗಿದ್ದು, ಇದರಲ್ಲಿ ಜ.16ರಿಂದ ಜ.27ರವರೆಗೆ ಅಂದರೆ 12 ದಿನಗಳ ಪೈಕಿ 10 ದಿನ ಲಸಿಕೆ ಹಾಕುವ ಕಾರ್ಯವಾಗಿದೆ. ಈ ಹತ್ತು ದಿನಗಳಲ್ಲಿ ಲಸಿಕೆ ಹಾಕಿಸಿಕೊಂಡವರಿಗಿಂತ ಲಸಿಕೆ ಹಾಕಿಸಿಕೊಳ್ಳದೆ ಹೊರಗುಳಿದವರೇ ಹೆಚ್ಚು.

ಹೆಸರು ನೋಂದಣಿ ಆಗಿರುವ 27,669 ಜನರ ಪೈಕಿ ಈವರೆಗೆ 18,471 ಜನರಿಗೆ ಲಸಿಕೆ ಹಾಕಿಸಿಕೊಳ್ಳಲು ಸಮಯ ನಿಗದಿ ಮಾಡಿ, ಅವರಿಗೆ ಹಿಂದಿನ ದಿನವೇ ಸಂದೇಶ ರವಾನಿಸಲಾಗಿತ್ತು. ಆದರೆ ಈವರೆಗೆ 8560 ಜನರಷ್ಟೇ ಲಸಿಕೆ ಹಾಕಿಸಿಕೊಂಡಿದ್ದರೆ 9911 ಜನ ಲಸಿಕೆ ಹಾಕಿಸಿಕೊಳ್ಳಲು ಹಿಂದೇಟು ಹಾಕಿದ್ದಾರೆ.

ಇದನ್ನೂ ಓದಿ:ಅನುಷ್ಠಾನವಾಗುತ್ತಾ ಕೈಗಾರಿಕಾ ಕಾರಿಡಾರ್‌?

ಆರೋಗ್ಯ ಕಾರ್ಯಕರ್ತರಿಂದಲೇ ನಿರಾಸಕ್ತಿ ಜಿಲ್ಲೆಯಲ್ಲಿ ಮೊದಲ ಹಂತದಲ್ಲಿ ಲಸಿಕೆ ಹಾಕುವ ಪ್ರಕ್ರಿಯೆಯಲ್ಲಿ ಆರೋಗ್ಯ ಇಲಾಖೆ ಕಾರ್ಯಕರ್ತರು, ಅಂಗನವಾಡಿ ಮತ್ತು ಆಶಾ ಕಾರ್ಯಕರ್ತರಿಗೂ ಅವಕಾಶ

ಕಲ್ಪಿಸಲಾಗಿದೆ. ಆದರೆ ಲಸಿಕೆ ಬಗ್ಗೆ ಇವರಲ್ಲಿಯೇ ಗೊಂದಲ-ಆತಂಕ ಇರುವಂತಾಗಿದೆ. ಹೀಗಾಗಿ ಆರೋಗ್ಯ ಇಲಾಖೆ ಈವರೆಗೆ ನಿಗದಿ ಮಾಡಿದ್ದ ಜನರ ಪೈಕಿ ಶೇ.50ಕ್ಕಿಂತಲೂ ಹೆಚ್ಚು ಜನ ಲಸಿಕೆ ಹಾಕಿಸಿಕೊಳ್ಳಲು ಹಿಂದೇಟು ಹಾಕುತ್ತಿದ್ದಾರೆ. ಲಸಿಕೆಯ ಅಡ್ಡ ಪರಿಣಾಮಗಳ ಆತಂಕ, ಗೊಂದಲ ನಿವಾರಣೆಗಾಗಿ ಜಿಲ್ಲಾ ಆರೋಗ್ಯಾಧಿಕಾರಿ ಸೇರಿದಂತೆ ಹಿರಿಯ ಅಧಿಕಾರಿಗಳು, ವೈದ್ಯಾಧಿಕಾರಿಗಳು ಸ್ವಯಂ ಲಸಿಕೆ ಹಾಕಿಸಿಕೊಂಡು ಆತ್ಮಸ್ಥೆರ್ಯ ತುಂಬವ ಕಾರ್ಯ ಮಾಡಿದ್ದಾರೆ. ಇಷ್ಟಾದರೂ ಲಸಿಕೆ ಹಾಕಿಸಿಕೊಳ್ಳುವವರ ಸಂಖ್ಯೆಯಲ್ಲಿ ಏರಿಕೆಯಾಗಿಲ್ಲ.

 

­ಶಶಿಧರ್‌ ಬುದ್ನಿ