ಬಂಕಾಪುರದ ನಾಲ್ವರಿಗೆ ಕೋವಿಡ್

ಬಂಕಾಪುರ: ಪಟ್ಟಣದ 3ನೇ ವಾರ್ಡಿನ ಕಂಟೇನ್ಮೆಂಟ್‌ ಜೋನ್‌ ಪ್ರದೇಶದಲ್ಲಿ ಎರಡು, ಖತೀಬ ಪ್ಲಾಟ್‌ನಲ್ಲಿ ಒಂದು, ಮುಖ್ಯ ಮಾರುಕಟ್ಟೆ ಯಲ್ಲಮ್ಮನ ದೇವಸ್ಥಾನದ ಕಂಟೈನ್ಮೆಂಟ್‌ ಝೋನ್‌ ಪ್ರದೇಶದಲ್ಲಿ ಒಂದು ಪ್ರಕರಣ ಸೇರಿದಂತೆ ಒಟ್ಟು ನಾಲ್ಕು ಕೋವಿಡ್ ಪಾಸಿಟಿವ್‌ ಪ್ರಕರಣಗಳು ಶುಕ್ರವಾರ ದಾಖಲಾಗಿವೆ.

ಖತೀಬ ಪ್ಲಾಟ್‌ನಲ್ಲಿ ಕೋವಿಡ್ ಪಾಸಿಟಿವ್‌ ಪ್ರಕರಣ ದಾಖಲಾಗಿರುವುದರಿಂದ ಆ ಮನೆಯ ಸುತ್ತಮುತ್ತಲಿನ 100 ಮೀಟರ್‌ ಪ್ರದೇಶವನ್ನು ಕಂಟೈನ್ಮೆಂಟ್‌ ಜೋನ್‌ ಆಗಿ, 300 ಮೀಟರ್‌ ಪ್ರದೇಶವನ್ನು ಬಫರ್‌ ಜೋನ್‌ ಆಗಿ ಪರಿವರ್ತಿಸಿ ಫೀವರ್‌ ಕ್ಲೀನಿಕ್‌, ಸಹಾಯವಾಣಿಯನ್ನು ತೆರೆಯಲಾಗಿದೆ. ಖತೀಬ ಪ್ಲಾಟ್‌ ಕಂಟೈನ್ಮೆಂಟ್‌ ಜೋನ್‌ ಸೇರಿದಂತೆ, 3ನೇ ವಾರ್ಡಿನ ಕಂಟೈನ್ಮೆಂಟ್‌ ಜೋನ್‌, ಮುಖ್ಯ ಮಾರುಕಟ್ಟೆ ಯಲ್ಲಮ್ಮನ ದೇವಸ್ಥಾನದ ಕಂಟೈನ್ಮೆಂಟ್‌ ಜೋನ್‌ ಪ್ರದೇಶಗಳಿಗೆ ಶುಕ್ರವಾರ ಎಸಿ ಅನ್ನಪೂರ್ಣ ಮುದಕಮ್ಮನವರ ಭೇಟಿ ನೀಡಿ ಪರಿಶೀಲಿಸಿದರು.

ಈ ವೇಳೆ ಪೊಲೀಸ್‌ ಹಾಗೂ ಕಂದಾಯ ಇಲಾಖೆ ಅಧಿಕಾರಿಗಳಿಂದ ಸಂಪೂರ್ಣ ಮಾಹಿತಿ ಪಡೆದರು. ತಹಶೀಲ್ದಾರ್‌ ಪ್ರಕಾಶ ಕುದರಿ, ಉಪತಹಶೀಲ್ದಾರ್‌ ಎಂ.ಎಸ್‌. ಪಾಟೀಲ, ಆರ್‌.ಐ. ಆರ್‌. ಎಂ.ನಾಯಕ, ಗ್ರಾಮಲೆಕ್ಕಾ ಧಿಕಾರಿ ಕಿಲ್ಲೇದಾರ, ಪಿಎಸ್‌ಐ ಸಂತೋಷ ಪಾಟೀಲ ಸೇರಿದಂತೆ ಇತರರು ಇದ್ದರು.