ಮೂಲ ನಿವಾಸಿಗಳಲ್ಲೂ ಕೋವಿಡ್‌ ಸೋಂಕು

ಮಣಿಪಾಲ: ವಿವಿಧ ದೇಶಗಳ ಮೂಲನಿವಾಸಿಗಳ ಮೇಲೂ ಕೋವಿಡ್‌ ವಕ್ರದೃಷ್ಟಿ ಬಿದ್ದಿದೆ ಎಂದು ವರದಿಯೊಂದು ತಿಳಿಸಿದೆ. ವಿವಿಧ ಜನಾಂಗಗಳ ಮೇಲೆ ವೈರಸ್‌ ಉಂಟು ಮಾಡಿರುವ ಪರಿಣಾಮದ ಬಗ್ಗೆ ಅಧ್ಯಯನ ನಡೆಸಿದಾಗ ತಮ್ಮದೇ ಆದ ಶೈಲಿಯಲ್ಲಿ ಪ್ರತ್ಯೇಕವಾಗಿ ಜೀವನ ನಡೆಸುವ ಬುಡಕಟ್ಟು ಸಮುದಾಯಗಳು ಸೇರಿದಂತೆ ಮೂಲನಿವಾಸಿಗಳನ್ನೂ ಕೋವಿಡ್‌ ಬಿಟ್ಟಿಲ್ಲ ಎನ್ನುವುದು ಪತ್ತೆಯಾಗಿದೆ.

ವಿಶ್ವಸಂಸ್ಥೆಯ ವಿಶೇಷ ವರದಿಗಾರ ಜೋಸ್‌ ಫ್ರಾನ್ಸಿಸ್ಕೊ ಕ್ಯಾಲಿ ಝೇ ವಿಶ್ವದಾದ್ಯಂತ ಸ್ಥಳೀಯ ಸಮುದಾಯಗಳ ಮೇಲೆ ಕೋವಿಡ್‌ ಸೋಂಕು ಬೀರಿರುವ ಪ್ರಭಾವದ ಕುರಿತು ಅಧ್ಯಯನ ನಡೆಸಿದ್ದಾರೆ.

ಈ ಬಗ್ಗೆ ಮಾತಾಡಿರುವ ಅವರು, ಕೋವಿಡ್‌ ಸೋಂಕಿನಿಂದ ಸ್ಥಳೀಯ ಸಮುದಾಯಗಳ ಮೇಲೆ ಯಾವ ರೀತಿಯ ಪ್ರಭಾವ ಬೀರಿದೆ ಎಂಬವುದರ ಬಗ್ಗೆ ಪ್ರತಿನಿತ್ಯ ಜಗತ್ತಿನ ವಿವಿಧ ಭಾಗಗಳಿಂದ ನಾನು ವರದಿಗಳನ್ನು ಸ್ವೀಕರಿಸುತ್ತಿದ್ದೇನೆ. ಹಲವು ಮೂಲನಿವಾಸಿ ಸಮುದಾಯಗಳು ಕೋವಿಡ್‌ನಿಂದ ನಲುಗಿರುವುದು ಇದರಿಂದ ತಿಳಿದು ಬಂದಿದೆ. ಅಭಿವೃದ್ಧಿಗಾಗಿ ತಮ್ಮ ಭೂಮಿಯನ್ನು, ಕೆಲಸವನ್ನು ಕಳೆದುಕೊಳ್ಳುತ್ತಿರುವ ಈ ಸಮುದಾಯಗಳ ಜನರನ್ನು ಬಡತನ, ಅಪೌಷ್ಟಿಕತೆ, ಶುದ್ಧ ನೀರು ಮತ್ತು ನೈರ್ಮಲ್ಯದ ಕೊರತೆ, ವೈದ್ಯಕೀಯ ಸೇವೆಗಳ ಅಲಭ್ಯಯಂಥ ಸಮಸ್ಯೆಗಳ ನಡುವೆ ಬದುಕುತ್ತಿದ್ದಾರೆ.