ಚಾ.ನಗರಕ್ಕೆ ಆತಂಕ ತಂದಿಟ್ಟ ಪೇದೆ: ಸೋಂಕು ಶಂಕೆಯಿದ್ದರೂ ಸಂಬಂಧಿಕರ ಮನೆಗೆ ಹೋಗಿದ್ದ ಪೇದೆ

ಚಾಮರಾಜನಗರ: ಇಷ್ಟು ದಿನ ಹಸಿರು ವಲಯದಲ್ಲಿದ್ದ ಜಿಲ್ಲೆಗೆ ಆತಂಕವೊಂದು ಎದುರಾಗಿದೆ. ಕೋವಿಡ್-19 ಸೋಂಕು ತಗುಲಿದ್ದ ಬೆಂಗಳೂರಿನ ಪೊಲೀಸ್ ಪೇದೆಯೊಬ್ಬರು ಹನೂರು ಸಮೀಪದ ಬೆಳತ್ತೂರಿನ ಸಂಬಂಧಿಕರ ಮನೆಯಲ್ಲಿದ್ದು ಹೋಗಿದ್ದರಿಂದ 18 ಜನರನ್ನು ಕ್ವಾರಂಟೈನ್ ಕೇಂದ್ರದಲ್ಲಿರಿಸಲಾಗಿದೆ. ಎರಡು ಗ್ರಾಮಗಳನ್ನು ಸೀಲ್‌ ಡೌನ್ ಮಾಡಲಾಗಿದೆ.

ಬೆಂಗಳೂರಿನ ಬೇಗೂರು ಪ್ರದೇಶದ ಪೊಲೀಸ್ ಪೇದೆಯೊಬ್ಬರಿಗೆ ಕೋವಿಡ್-19 ಶಂಕೆಯಿದ್ದುದರಿಂದ ಬೆಂಗಳೂರಿನಲ್ಲೇ ಗಂಟಲು ದ್ರವ ಮಾದರಿ ಪರೀಕ್ಷೆ ನಡೆಸಲಾಗಿತ್ತು. ಅದರ ಫಲಿತಾಂಶ ಬರುವ ಮೊದಲೇ ಈ ಪೇದೆ ಜಿಲ್ಲೆಯ ಹನೂರಿನ ಬೆಳತ್ತೂರಿನ ನೆಂಟರ ಮನೆಗೆ ಬೈಕಿನಲ್ಲಿ ಸೋಮವಾರ ಬೆಳಿಗ್ಗೆ ಬಂದಿದ್ದಾರೆ. ಮಧ್ಯಾಹ್ನ 2 ಗಂಟೆಯ ವೇಳೆಗೆ ಆತನಿಗೆ ಬೆಂಗಳೂರಿನಿಂದ ಕರೆ ಬಂದು ಸೋಂಕು ಫಲಿತಾಂಶ ಪಾಸಿಟಿವ್ ಇರುವುದು ಗೊತ್ತಾಗಿದೆ. ಕೂಡಲೇ ಬೆಂಗಳೂರಿಗೆ ವಾಪಸಾಗಿದ್ದಾರೆ.

ಈ ವಿಷಯವನ್ನು ಗ್ರಾಮ ಪಂಚಾಯಿತಿ ಅಧಿಕಾರಿಗಳು ಆರೋಗ್ಯ ಇಲಾಖೆ ಗಮನಕ್ಕೆ ತಂದಿದ್ದಾರೆ. ಸೋಮವಾರ ತಡರಾತ್ರಿ 11.40ರಲ್ಲಿ ಪೇದೆಯ ಸಂಬಂಧಿಕರು ಹಾಗೂ ಆತನ ಪ್ರಾಥಮಿಕ ಸಂಪರ್ಕಕ್ಕೆ ಬಂದಿದ್ದ 18 ಜನರನ್ನು ನಗರದ ಅಂಬೇಡ್ಕರ್ ಭವನದಲ್ಲಿರುವ ಕ್ವಾರಂಟೈನ್ ಕೇಂದ್ರಕ್ಕೆ ಕಳುಹಿಸಿಕೊಡಲಾಯಿತು.

ಈ 18 ಜನರಲ್ಲಿ 9 ತಿಂಗಳ ಹಾಗೂ 1 ವರ್ಷದ ಶಿಶುಗಳಿವೆ. 9 ವರ್ಷದ ಬಾಲಕ, 5 ವರ್ಷದ ಬಾಲಕಿ ಇದ್ದಾರೆ. 70, 63, ಹಾಗೂ 60 ವರ್ಷದ ಮೂವರು ವೃದ್ಧೆಯರು, 66 ವರ್ಷದ ಓರ್ವ ವೃದ್ಧರಿದ್ದಾರೆ.

ಕೋವಿಡ್-19 ಪಾಸಿಟಿವ್ ವ್ಯಕ್ತಿ ಬಂದಿದ್ದ ಕಾರಣ ಬೆಳತ್ತೂರು ಮತ್ತು ಸಮೀಪದ ಉದ್ದನೂರು ಗ್ರಾಮಗಳನ್ನು ಈಗ ಸೀಲ್‌ ಡೌನ್ ಮಾಡಲಾಗಿದೆ. ಬೆಳತ್ತೂರು ಗ್ರಾಮದ ತಾಲೂಕು ಕೇಂದ್ರವಾದ ಹನೂರಿಗೆ ಕೇವಲ 5 ಕಿ.ಮೀ. ದೂರದಲ್ಲಿದೆ.

ಕೋವಿಡ್19 ಹಸಿರು ವಲಯದಲ್ಲಿದ್ದ ಹಾಗೂ ಕ್ವಾರಂಟೈನ್‌ನಲ್ಲಿ ಸಹ ಒಬ್ಬರೂ ಇರದಿದ್ದ ಚಾಮರಾಜನಗರ ಜಿಲ್ಲೆಯಲ್ಲೀಗ, ಬೆಂಗಳೂರಿನ ಪೇದೆ ಮಾಡಿದ ಅವಾಂತರದಿಂದ ಆತಂಕ ಎದುರಾಗಿದೆ.

ಜಿಲ್ಲೆಯೊಳಗೆ ಹೊರ ಜಿಲ್ಲೆಯಿಂದ ಜನರನ್ನು ಬಿಡುತ್ತಿಲ್ಲ. ಆದರೂ ಈ ಪೇದೆ ಬೆಂಗಳೂರಿನಿಂದ ಚೆಕ್‌ಪೋಸ್ಟ್ ದಾಟಿ ಬಂದಿದ್ದು ಹೇಗೆ? ಎಂಬ ಪ್ರಶ್ನೆ ಎದುರಾಗಿದೆ. ಪೊಲೀಸ್ ಪೇದೆಯೆಂಬ ಕಾರಣದಿಂದ ಆತನನ್ನು ಚೆಕ್‌ಪೋಸ್ಟ್ ನಲ್ಲಿ  ಬಿಡಲಾಗಿದೆ ಎಂದು ಸಾರ್ವಜನಿಕರು ಆರೋಪಿಸಿದ್ದಾರೆ.