ಕಲಬುರಗಿಯಲ್ಲಿ ಕೋವಿಡ್ ಮಹಾಮಾರಿಗೆ ಮೂರನೇ ಬಲಿ ; 55 ವರ್ಷದ ವ್ಯಾಪಾರಿ ಸಾವು

ಕಲಬುರಗಿ: ಮಹಾಮಾರಿ‌ ಕೋವಿಡ್ ಸೋಂಕಿಗೆ ಈಗಾಗಲೇ ‌ಇಬ್ಬರು ವೃದ್ಧರು ಬಲಿಯಾಗಿರುವ ಕಲಬುರಗಿ ನಗರದಲ್ಲಿ ಸೋಮವಾರ ಸಂಜೆ ಸೋಂಕು ಪೀಡಿತ 55 ವರ್ಷದ ವ್ಯಕ್ತಿ ಸಾವನ್ನಪ್ಪಿದ್ದಾರೆ. ಈ ಮೂಲಕ ಕರ್ನಾಟಕದ ಒಂದೇ ಜಿಲ್ಲೆಯಲ್ಲಿ ಕೋವಿಡ್ ಸೋಂಕಿಗೆ ಮೊದಲ ಬಾರಿಗೆ ಮೂವರು ಬಲಿಯಾದಂತಾಗಿದೆ.

ದೇಶದಲ್ಲೇ ‌ಮೊದಲು ಕೋವಿಡ್ ಗೆ ಬಲಿಯಾಗಿದ್ದು ಕೂಡ ಕಲಬುರಗಿಯಲ್ಲಿ. ಸೌದಿ ಅರೇಬಿಯಾದಿಂದ ಮರಳಿದ್ದ 76 ವರ್ಷದ ವೃದ್ಧ ಮಾ.10ರಂದು ಸೋಂಕಿನಿಂದ ಸಾವನ್ನಪ್ಪಿದರು. ಇದೇ ಏ.7ರಂದು 65 ವರ್ಷದ ಹಣ್ಣಿನ ವ್ಯಾಪಾರಿ ಹೆಮ್ಮಾರಿ‌ ಸೋಂಕಿಗೆ ಬಲಿಯಾಗಿದ್ದರು.

ಇದೀಗ 55 ವರ್ಷದ ಬಟ್ಟೆ ವ್ಯಾಪಾರಿ ಕೋವಿಡ್ ನಿಂದ ಮೃತಪಟ್ಟಿದ್ದಾರೆ. ಇಎಸ್ಐ ಆಸ್ಪತ್ರೆಯಲ್ಲಿ ಚಿಕಿತ್ಸೆ ‌ಪಡೆಯುತ್ತಿದ್ದ ಈತ ಚಿಕಿತ್ಸೆ ‌ಫಲಿಸದೆ ಕೊನೆಯುಸಿರೆಳೆದಿದ್ದಾರೆ ಎಂದು ಜಿಲ್ಲಾಧಿಕಾರಿ ಶರತ್ ಬಿ. ತಿಳಿಸಿದ್ದಾರೆ.

ಮೃತ ವ್ಯಕ್ತಿ ದೆಹಲಿಯ ತಬ್ಲಿಘ್-ಎ-ಜಮಾತ್ ಸಭೆಯಲ್ಲಿ ಪಾಲ್ಗೊಂಡವರ ಸಂಪರ್ಕಕ್ಕೆ ಬಂದಿದ್ದರು. ನಂತರದಲ್ಲಿ ಅವರಲ್ಲಿ ಜ್ವರ ಹಾಗೂ ಉಸಿರಾಟದ ಸಮಸ್ಯೆ ಕಂಡು ಬಂದಿತ್ತು. ಹೀಗಾಗಿ ಸ್ವತಃ ತಾವೇ ಆಸ್ಪತ್ರೆಗೆ ದಾಖಲಾಗಿದ್ದರು‌.