ಕೋವಿಡ್‌-19 ಲಾಕ್‌ಡೌನ್‌: ಸೈಬರ್‌ ಅಪರಾಧಗಳು ಹೆಚ್ಚಾಗುವ ಸಾಧ್ಯತೆ

ಲಂಡನ್‌: ಕೋವಿಡ್ ವೈರಸ್‌ ಬಂದ ಬಳಿಕ ಜಗತ್ತೇ ಒದ್ದಾಡುತ್ತಿದೆ. ಅನೇಕ ಸಾವು ನೋವುಗಳಿಗೆ ಕಾರಣವಾದ ಈ ವೈರಸ್‌ ಇಡೀ ಜಗತ್ತಿನಲ್ಲಿ ಲಾಕ್‌ಡೌನ್‌ ಹೇರುವಂತೆ ಮಾಡಿದೆ. ಇದೀಗ ಸರಕಾರಗಳು ಲಾಕ್‌ಡೌನ್‌ ಮೂಲಕ ಕೋವಿಡ್ ಹಬ್ಬುವ ವೇಗಕ್ಕೆ ಕಡಿವಾಣ ಹಾಕಲು ನಿರ್ಧರಿಸಿದ್ದು ಇದು ಮತ್ತೂಂದಿಷ್ಟು ಅಪರಾಧಗಳು ಹೆಚ್ಚಲು ಕಾರಣವಾಗುವ ಆತಂಕ ಆರಂಭವಾಗಿದೆ.

ಕೋವಿಡ್‌-19 ಬಳಿಕ ಬಿಕ್ಕಟ್ಟಿನಿಂದಾಗಿ ಲಾಕ್‌ಡೌನ್‌ಗೆ ಒಳಗಾದ ಮಕ್ಕಳು ಹೆಚ್ಚು ಸಮಯವನ್ನು ಅಂತರ್ಜಾಲ ಬಳಕೆಯಲ್ಲೇ ಕಳೆಯುತ್ತಿದ್ದಾರೆ. ಇದು ಸೈಬರ್‌ ಕ್ರೈಂ ಅಪರಾಧಗಳು ಏರಿಕೆಯಾಗಲು ಕಾರಣವಾಗಬಹುದು ಎನ್ನಲಾಗಿದೆ. ಈ ಲಾಕ್‌ಡೌನ್‌ ಬಳಿಕ 150 ಕೋಟಿ ಮಕ್ಕಳು ಮನೆಯಲ್ಲಿಯೇ ಕಾಲ ಕಳೆಯುತ್ತಿದ್ದಾರೆ. ಶಾಲಾ ಕಾಲೇಜುಗಳು ಮುಚ್ಚಿದ್ದು, ಶೈಕ್ಷಣಿಕ ಉದ್ದೇಶಗಳಿಗಾಗಿ ಅವರು ಆನ್‌ಲೈನ್‌ ಬಳಸುವುದು ಅನಿವಾರ್ಯ. ಇದು ಮಕ್ಕಳ ಮೇಲೆ ಪ್ರತಿಕೂಲ ಪರಿಣಾಮ ಬೀರುವ ಸಾಧ್ಯತೆ ಇದೆ ಎಂದು ಇಂಟರ್‌ನ್ಯಾಷನಲ್‌ ಟೆಲಿಕಮ್ಯುನಿಕೇಷನ್‌ ಯೂನಿಯನ್‌ (ಐಟಿಯು) ಹೇಳಿದೆ.

ಮನರಂಜನೆ ಕಾರಣಕ್ಕೆ ಮಕ್ಕಳು ಹೆಚ್ಚು ಸಮಯವನ್ನು ಆನ್‌ಲೈನ್‌ನಲ್ಲಿಯೇ ಕಳೆಯಲು ಬಯಸುತ್ತಿದ್ದಾರೆ. ಇಂಟರ್‌ನೆಟ್‌ ನಿಭಾಯಿಸುವ ಕೌಶಲವನ್ನು ಬೆಳೆಸಿಕೊಳ್ಳುವ ಮುನ್ನವೇ ಅವರು ಆನ್‌ಲೈನ್‌ ಪ್ರಪಂಚಕ್ಕೆ ತೆರೆದುಕೊಳ್ಳುತ್ತಿರುವುದು ಆತಂಕಕಾರಿ ಎಂದು ಐಟಿಯು ಹೇಳಿದೆ. ಇಂಟರ್‌ನೆಟ್‌ ಬಳಕೆಗೆ ಸಂಬಂಧಿಸಿದ ಮಾನದಂಡ ಮತ್ತು ಮಾರ್ಗಸೂಚಿಗಳನ್ನು ಅಭಿವೃದ್ಧಿಪಡಿಸಲಾಗಿದ್ದು,15 ದಿನಗಳಲ್ಲಿ ಅವುಗಳು ಬಿಡುಗಡೆಯಾಗಲಿದೆ.