ಕೋವಿಡ್ 19 ಲಾಕ್‌ಡೌನ್‌; ಕೆಎಸ್ಸಾರ್ಟಿಸಿಗೆ 182 ಕೋಟಿ ರೂ. ನಷ್ಟ !

ಮಂಗಳೂರು: ಕೋವಿಡ್ 19 ಸೋಂಕು ಹಿನ್ನೆಲೆಯಲ್ಲಿ ಇಡೀ ದೇಶವೇ ಲಾಕ್‌ಡೌನ್‌ ಆಗಿದ್ದು, ಬಸ್‌ ಸಂಚಾರ ಸ್ಥಗಿತಗೊಂಡಿದ್ದರಿಂದ ಒಂದು ತಿಂಗಳಿನಲ್ಲಿ ಕರ್ನಾಟಕ ರಾಜ್ಯ ರಸ್ತೆ ಸಾರಿಗೆ ಸಂಸ್ಥೆಗೆ ಸುಮಾರು 182 ಕೋಟಿ ರೂ.ಗಳಿಗೂ ಹೆಚ್ಚಿನ ಆದಾಯ ನಷ್ಟ ಉಂಟಾಗಿದೆ.

ಕೆಎಸ್ಸಾರ್ಟಿಸಿಯಿಂದ ನಿತ್ಯ ದೇಶದ ವಿವಿಧ ಭಾಗಗಳಿಗೆ 8 ಸಾವಿರಕ್ಕೂ ಮಿಕ್ಕಿ ಐಷಾರಾಮಿ ಮತ್ತು ಸಾಮಾನ್ಯ ಸಾರಿಗೆ ಬಸ್‌ಗಳು ಸಂಚರಿಸುತ್ತಿವೆ. ಕೋವಿಡ್ 19 ಆತಂಕದಿಂದ ಮಾ. 1ರಿಂದ ಎ. 7ರ ವರೆಗೆ ಕೆಎಸ್ಸಾರ್ಟಿಸಿಯ ಒಟ್ಟು 10 ವಿಭಾಗಗಳ ಕಾರ್ಯಾಚರಣೆ ಮಾಡುವ ಪ್ರೀಮಿಯಂ (ಐಷಾರಾಮಿ) ಬಸ್‌ ಸಂಚಾರ ಕಡಿತಗೊಂಡ ಕಾರಣ 37.28 ಕೋಟಿ ರೂ. ನಷ್ಟ ಉಂಟಾಗಿದೆ. ಒಟ್ಟು 16 ಡಿಪೋಗಳ ನಾನ್‌ ಪ್ರೀಮಿಯಂ (ಸಾಮಾನ್ಯ) ಸಾರಿಗೆಯಲ್ಲಿ 144 ಕೋಟಿ ರೂ.ಗೂ ಹೆಚ್ಚಿನ ನಷ್ಟ ಉಂಟಾಗಿದೆ.

ರಾಜ್ಯದ ಇತರ ಭಾಗಗಳಿಗೆ ಹೋಲಿಸಿದರೆ ಕರಾವಳಿ ಭಾಗದಲ್ಲೇ ಸಾರಿಗೆ ಸಂಸ್ಥೆಗೆ ಗರಿಷ್ಠ ನಷ್ಟವಾಗಿದೆ. ಮಂಗಳೂರು ಕೆಎಸ್ಸಾರ್ಟಿಸಿ ವಿಭಾಗದಿಂದ (ಮಂಗಳೂರಿನಲ್ಲಿ – 3, ಕುಂದಾಪುರ, ಉಡುಪಿ) ಪ್ರತೀ ದಿನ 350ಕ್ಕೂ ಹೆಚ್ಚು ಬಸ್‌ಗಳು ಸಂಚರಿಸುತ್ತವೆ. ಪುತ್ತೂರು ವಿಭಾಗದಿಂದ (ಪುತ್ತೂರು, ಬಿ.ಸಿ. ರೋಡ್‌, ಧರ್ಮಸ್ಥಳ, ಮಡಿಕೇರಿ, ಸುಳ್ಯ) ಸುಮಾರು 560 ಬಸ್‌ಗಳು ಸಂಚರಿಸುತ್ತವೆ. ಈ ಎರಡೂ ವಿಭಾಗಗಳಿಂದ ಒಂದು ತಿಂಗಳಲ್ಲಿ 25.36 ಕೋಟಿ ರೂ. ನಷ್ಟ ಉಂಟಾಗಿದೆ.

ಕೆಎಸ್ಸಾರ್ಟಿಸಿಯಿಂದ ರಾಜ್ಯದಲ್ಲಿ ಒಟ್ಟು 83 ಘಟಕಗಳಿದ್ದು, 17 ವಿಭಾಗಗಳಿವೆ. ಸಾಮಾನ್ಯ ದಿನಗಳಲ್ಲಿ ಒಟ್ಟು 166 ಬಸ್‌ ನಿಲ್ದಾಣದಿಂದ ದಿನಂಪ್ರತಿ 8,603 ಬಸ್‌ಗಳು ಸಂಚರಿಸುತ್ತದೆ. ನಿತ್ಯ 29.20 ಲಕ್ಷ ಕಿ.ಮೀ. ಓಡಾಟ ನಡೆಸಿ, 8.90 ಕೋಟಿ ರೂ. ಆದಾಯ ಬರುತ್ತದೆ.

ರಾಜ್ಯದಲ್ಲಿ 16 ಬಸ್‌ ಓಡಾಟ
ರಾಜ್ಯದಲ್ಲಿ ಸದ್ಯ ಕೇವಲ 16 ಕೆಎಸ್ಸಾರ್ಟಿಸಿ ಬಸ್‌ಗಳು ಕಾರ್ಯಾಚರಣೆ ನಡೆಸುತ್ತಿವೆ. ತುರ್ತು ಅವಶ್ಯಕ ಸೇವೆಗಳಾದ ಮೆಡಿಕಲ್‌, ಪೊಲೀಸ್‌, ಭದ್ರತಾ ಸಿಬಂದಿ, ಪ್ಯಾರಾ ಮೆಡಿಕಲ್‌ ಸಿಬಂದಿ, ಮಹಾನಗರ ಪಾಲಿಕೆ, ಸರಕಾರಿ ಸಿಬಂದಿ ಸಹಿತ ಜಿಲ್ಲಾಡಳಿತ ಸೂಚಿಸಿದ ಸೇವೆಗಳಿಗೆ ಬಸ್‌ ಕಾರ್ಯಾಚರಣೆ ಮಾಡಲಾಗುತ್ತಿದೆ. ನಿಗಮ ವ್ಯಾಪ್ತಿಯ ರಾಮನಗರ-1, ಮೈಸೂರು-4, ಮಂಗಳೂರು-4, ದಾವಣಗೆರೆ-1, ಶಿವಮೊಗ್ಗ-6 ಸಹಿತ ಒಟ್ಟು 16 ಬಸ್‌ಗಳು ಕಾರ್ಯಾಚರಣೆ ನಡೆಸುತ್ತಿವೆ.

ಅತಿ ದೊಡ್ಡ ನಷ್ಟ
ಕೆಎಸ್ಸಾರ್ಟಿಸಿಯಿಂದ ರಾಜ್ಯದ ವಿವಿಧ ಕಡೆಗಳಿಗೆ ಸಂಚರಿಸುವ ಬಸ್‌ಗಳು ಒಂದು ತಿಂಗಳಿನಿಂದ ಸಮರ್ಪಕವಾಗಿ ಕಾರ್ಯಾಚರಣೆ ನಡೆಸಲಿಲ್ಲ. ಇದೇ ಕಾರಣಕ್ಕೆ ಸದ್ಯ 182 ಕೋಟಿ ರೂ.ಗೂ ಹೆಚ್ಚಿನ ನಷ್ಟ ಉಂಟಾಗಿದೆ. ಇತ್ತೀಚಿನ ದಿನಗಳಲ್ಲಿ ಬಸ್‌ ಕಾರ್ಯಾಚರಣೆ ಸ್ಥಗಿತಗೊಂಡಿದ್ದರಿಂದ ಆದ ಅತೀ ದೊಡ್ಡ ಮೊತ್ತದ ನಷ್ಟ ಇದಾಗಿದೆ.
– ಶಿವಯೋಗಿ ಕಳಸದ,
ಕೆಎಸ್ಸಾರ್ಟಿಸಿ ಎಂಡಿ