ಬೀಜಿಂಗ್‌: ಒಂದು ವೈರಸ್‌ ಜಗತ್ತನ್ನು ಈ ಪರಿಯಾಗಿ ಕಾಡಬಹುದು ಎಂಬುದಾಗಿ ಯಾರೂ ಊಹಿಸಿರಲಿಕ್ಕಿಲ್ಲ. ಹಾಗೆಂದು ಸೀದಾ ಹೇಳಿ ಬಿಟ್ಟರೆ ತಪ್ಪಾಗುತ್ತದೆ. ಬಹುತೇಕ ಮಂದಿಗೆ ಕೋವಿಡ್ ಎಂಬ ವೈರಸ್‌ ಒಂದು ದಿನ ಪ್ರಪಂಚವನ್ನು ಅಲ್ಲೋಲಕಲ್ಲೋಲ ಮಾಡಿ ಬಿಡಬಹುದು ಎಂಬ ಕಲ್ಪನೆ ಇದ್ದಿರಲಿಕ್ಕಿಲ್ಲ. ಆದರೆ ಕೆಲವು ವಿಜ್ಞಾನಿಗಳು ಮುಖ್ಯವಾಗಿ ಜೈವಿಕ ಶಾಸ್ತ್ರವನ್ನು ಅಧ್ಯಯನ ಮಾಡುತ್ತಿರುವ ವಿಜ್ಞಾನಿಗಳು ಅನೇಕ ವರ್ಷಗಳ ಹಿಂದೆಯೇ ಹೀಗೊಂದು ಸಾಧ್ಯತೆಯನ್ನು ಗ್ರಹಿಸಿದ್ದರು ಹಾಗೂ ಈ ಕುರಿತು ಅವರು ಎಚ್ಚರಿಕೆಯನ್ನೂ ನೀಡಿದ್ದರು. ಆದರೆ ನಾಗರಿಕತೆ ಮತ್ತು ಅಭಿವೃದ್ಧಿಯ ನಾಗಾಲೋಟದಲ್ಲಿರುವ ದೇಶಗಳಿಗೆ ಈ ವಿಜ್ಞಾನಿಗಳ ಮಾತುಗಳನ್ನು ಕೇಳಿಸಿಕೊಳ್ಳುವಷ್ಟು ವ್ಯವಧಾನವಿರಲಿಲ್ಲ. ಆದರೆ ಅದಕ್ಕೆ ಈಗ ನಾವು ಬೆಲೆ ತೆರುತ್ತಿದ್ದೇವೆ.
ಹವಾಮಾನ ಬದಲಾವಣೆ ಮತ್ತು ಅಂಟು ಜಾಡ್ಯಗಳ ಹೆಚ್ಚಳದ ನಡುವೆ ಸಂಬಂಧವಿದೆ ಎಂದು ವಿಜ್ಞಾನಿಗಳು ಬಹಳ ವರ್ಷಗಳಿಂದ ಎಚ್ಚರಿಸುತ್ತಿದ್ದಾರೆ. ಈ ಸಂಬಂಧ ನೇರಾನೇರ ಅಲ್ಲದಿದ್ದರೂ ಒಂದಲ್ಲ ಒಂದು ರೀತಿಯಲ್ಲಿ ಹವಾಮಾನ ಬದಲಾವಣೆ ಸಾಂಕ್ರಾಮಿಕ ರೋಗಗಳ ಸೃಷ್ಟಿ ಮತ್ತು ಪಸರುವಿಕೆಗೆ ಕಾರಣವಾಗುತ್ತಿದೆ.
ಕಳೆದ ಕೆಲವು ವರ್ಷಗಳಿಂದ ಪ್ರಾಣಿ ಮತ್ತು ಪಕ್ಷಿ ಜನ್ಯ ವೈರಸ್‌ಗಳ ಹಾವಳಿಗೆ ಪ್ರಕೃತಿಯಲ್ಲಾಗಿರುವ ಬದಲಾವಣೆ ಅಥವಾ ಇನ್ನೂ ಸ್ಪಷ್ಟವಾಗಿ ಹೇಳಬೇಕೆಂದರೆ ಪ್ರಕೃತಿಯ ಮೇಲೆ ಮಾನವ ಎಸಗಿರುವ ದೌರ್ಜನ್ಯವೇ ಕಾರಣ. ಬಾವಲಿ ಹಾಗೂ ಇತರ ಪಕ್ಷಿಗಳಿಂದ ಹರಡುವ ಕೋವಿಡ್ ನಂತ ವೈರಸ್‌ಗೂ ಹವಾಮಾನ ಬದಲಾವಣೆಗೂ ನಿಕಟ ನಂಟು ಇದೆ. ಬಾವಲಿಗಳಲ್ಲಿ ಈಗಾಗಲೇ 3,200 ತರದ ವೈರಸ್‌ಗಳಿದ್ದು , ಇವುಗಳು ಮನುಷ್ಯನ ಮೇಲೆ ದಾಳಿ ಮಾಡಲು ಸಮಯ ಕಾಯುತ್ತಿವೆ ಎನ್ನುತ್ತಿದೆ ಒಂದು ಸಂಶೋಧನಾ ವರದಿ.
ವೈರಸ್‌ಗಳು ಪ್ರಕೃತಿಯಲ್ಲಿ ಹಿಂದಿನಿಂದಲೂ ಇವೆ. ಆದರೆ ಆಗ ಅವುಗಳು ಮನುಷ್ಯನಿಂದ ಬಲುದೂರ, ಕಾಡಿನೊಳಗೆ ತಮ್ಮಷ್ಟಕ್ಕೆ ಇದ್ದವು. ಯಾವಾಗ ಮನುಷ್ಯ ಅಭಿವೃದ್ಧಿಗಾಗಿ ಕಾಡು ನಾಶ ಮಾಡಲು ತೊಡಗಿದನೋ ಆಗ ವೈರಸ್‌ಗಳು ನೇರವಾಗಿ ನಾಗರಿಕತೆಯ ಮೇಲೆ ದಾಳಿ ಮಾಡತೊಡಗಿವೆ.
ವೈರಸ್‌ ಸೇರಿದಂತೆ ಎಲ್ಲ ರೋಗರುಜಿನಗಳ ವಿರುದ್ಧ ಪ್ರಕೃತಿ ತನ್ನದೇ ಆದ ರಕ್ಷಣಾ ವ್ಯವಸ್ಥೆಯನ್ನು ಹೊಂದಿರುತ್ತದೆ. ಮನುಷ್ಯ ಈ ರಕ್ಷಣಾ ವ್ಯವಸ್ಥೆಯನ್ನು ಕೆಡಿಸಿದ ಬಳಿಕ ರೋಗಗಳು ನಾಗರಿಕ ಸಮಾಜದ ಮೇಲೆ ದಾಳಿಯಿಡಲು ಶುರು ಮಾಡಿದವು.
