ಚರಂಡಿಯಲ್ಲಿ ತುಕ್ಕು ಹಿಡಿದ ಕಂಟ್ರಿ ಪಿಸ್ತೂಲುಗಳು

ಬೆಳಗಾವಿ: ತುಕ್ಕು ಹಿಡಿದ ನಾಲ್ಕು ಕಂಟ್ರಿ ಪಿಸ್ತೂಲುಗಳು ತಾಲೂಕಿನ ವಾಘವಡೆ ಗ್ರಾಮದ ಹೊರವಲಯದ ಚರಂಡಿಯಲ್ಲಿ ಪತ್ತೆಯಾಗಿವೆ. ಗ್ರಾಮದ ಹೊರವಲಯದ ಚರಂಡಿಯ ಕಸದಲ್ಲಿ ಬಿದ್ದಿದ್ದ ನಾಲ್ಕು ಕಂಟ್ರಿ ಪಿಸ್ತೂಲುಗಳನ್ನು ನೋಡಿದ ಸ್ಥಳೀಯರು ಪೊಲೀಸರಿಗೆ ಮಾಹಿತಿ ನೀಡಿದ್ದು, ಪೊಲೀಸರು ಪಿಸ್ತೂಲುಗಳನ್ನು ವಶಕ್ಕೆ ಪಡೆದಿದ್ದಾರೆ. ಈ ಪಿಸ್ತೂಲುಗಳು ಇಲ್ಲಿಗೆ ಹೇಗೆ ಬಂದವು?,

ಯಾರು ಇವುಗಳನ್ನು ಎಸೆದಿರಬಹುದು?, ಇದಕ್ಕೆ ಏನಾದರೂ ಅಪರಾಧ ಪ್ರಕರಣದ ಹಿನ್ನೆಲೆ ಇದೆಯೇ ಎಂಬ ಕುರಿತು ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ. 15-20 ವರ್ಷಗಳ ಹಿಂದಿನ ಕಮ್ಮಾರಿಕೆಯಲ್ಲಿ ತಯಾರಾದ ಲೋಹದ ಪಿಸ್ತೂಲುಗಳು ಇದಾಗಿದ್ದು, ಸುಮಾರು ಐದಾರು ತಿಂಗಳ ಹಿಂದೆಯೇ ಇಲ್ಲಿ ಎಸೆದು ಹೋಗಿರಬಹುದೆಂದು ಶಂಕಿಸಲಾಗಿದೆ. ಈ ಬಗ್ಗೆ ಪ್ರತಿ ಕ್ರಿಯೆ ನೀಡಿರುವ ಬೆಳಗಾವಿ ಗ್ರಾಮೀಣ ಪೊಲೀಸರು, ಈ ಕುರಿತು ವಿಜಯಪುರ ಪೊಲೀಸರನ್ನು ಸಂಪರ್ಕಿಸಲಾಗಿದೆ.

ಅನೇಕ ವರ್ಷಗಳ ಹಿಂದೆ ಇಂತಹ ಪಿಸ್ತೂಲು ಗಳು ಬಳಕೆಯಲ್ಲಿದ್ದವು. ಈಗ ಈ ತರಹದ ಪಿಸ್ತೂಲು ಗಳು ಎಲ್ಲಿಯೂ ಬಳಕೆ ಆಗಿಲ್ಲ ಎಂಬ ಮಾಹಿತಿ ಸಿಕ್ಕಿದೆ ಎಂದು ತಿಳಿಸಿದರು. ಬೆಳಗಾವಿ ಗ್ರಾಮೀಣ ಠಾಣೆ ಇನ್ಸ್‌ಪೆಕ್ಟರ್‌ ಸುನೀಲ ಕುಮಾರ ಹಾಗೂ ಸಿಬ್ಬಂದಿ ಸ್ಥಳಕ್ಕೆ ಭೇಟಿ ನೀಡಿ ಕಂಟ್ರಿ ಪಿಸ್ತೂಲುಗಳನ್ನು ವಶಕ್ಕೆ ಪಡೆದುಕೊಂಡು ಪರಿಶೀಲನೆ ನಡೆಸಿದ್ದಾರೆ. ಸುತ್ತಮುತ್ತಲಿನ ಪ್ರದೇಶಗಳಲ್ಲಿ ಈ ಮುಂಚೆ ಇಂತಹ ಕಂಟ್ರಿ ಪಿಸ್ತೂಲುಗಳು ಜಪ್ತಿ ಆಗಿ ವೆಯೇ ಎಂಬುದರ ಬಗ್ಗೆ ಮಾಹಿತಿ ಕಲೆ ಹಾಕುತ್ತಿದ್ದಾರೆ.