ಹೆಲ್ಮೆಟ್‌ ಧರಿಸದ ಬೈಕರ್‌ಗೆ ಪೊಲೀಸ್‌ ಲಾಠಿ: ಗಂಭೀರ ಗಾಯ

ಕನ್ಯಾಕುಮಾರಿ : ಇಲ್ಲಿನ ಕಳ್ಳುಪಾಲಂನಲ್ಲಿ  ಹೆಲ್ಮೆಟ್‌ ಧರಿಸದೆ ಬೈಕ್‌ ಓಡಿಸುತ್ತಿದ್ದ  ಸವಾರನನ್ನು  ನಿಲ್ಲುವಂತೆ ಸೂಚಿಸಿದಾಗ ಆತ ನಿಲ್ಲದೆ ವೇಗವಾಗಿ ತನ್ನ ಬೈಕನ್ನು ಓಡಿಸಿದಾಗ ಸಿಟ್ಟಿಗೆದ್ದ ಪೊಲೀಸ್‌ ಕಾನ್‌ಸ್ಟೆಬಲ್‌ ಆತನ ಮೇಲೆ  ತನ್ನ ಲಾಠಿ ಬೀಸಿದ ಕಾರಣ ತಲೆಗೆ ಗಂಭೀರ ಏಟು ಪಡೆದ ಬೈಕ್‌ ಸವಾರ ಆಸ್ಪತ್ರೆಗೆ ದಾಖಲಾದ ಘಟನೆ ನಡೆದಿದೆ. 

ಈ ಘಟನೆಯು ಸಿಸಿಟಿವಿಯಲ್ಲಿ ದಾಖಲಾಗಿದ್ದು ಅದು ಸ್ಥಳೀಯ ಟಿವಿಗಳಲ್ಲಿ ಪ್ರಸಾರಗೊಂಡು ಬಳಿಕ ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡಿದಾಗ ವೈರಲ್‌ ಆಯಿತು. 

ಘಟನೆಯನ್ನು ಅನುಸರಿಸಿ ಕಾನ್‌ಸ್ಟೆಬಲ್‌ ನನ್ನು ಅಮಾನತುಗೊಳಿಸಲಾಗಿದೆ. ಗಾಯಾಳು ಬೈಕ್‌ ಸವಾರ 25ರ ಹರೆಯದ ರಾಕೇಶ್‌ಗೆ ಹಣೆಯ ಮೇಲೆ ಆಳವಾದ ಗಾಯವಾಗಿದೆ. 

ಈ ಘಟನೆಗೆ ಸಾಕ್ಷಿಯಾದ ಸಾರ್ವಜನಿಕರು ಆಕ್ರೋಶಿತರಾಗಿ ಕಾನ್‌ಸ್ಟೆಬಲ್‌ನನ್ನು ಹಿಗ್ಗಾಮುಗ್ಗಾ ಥಳಿಸಿದಾಗ ಆತನ ಸಹೋದ್ಯೋಗಿಗಳು ಮತ್ತು ಕೆಲವು ಜನರು ಆತನನ್ನು ರಕ್ಷಿಸಿದರು.