ಹಾವೇರಿ: ಪಕ್ಷ, ಜಾತಿ, ಧರ್ಮದ ಭೇದ ಮರೆತು ಜಿಲ್ಲೆಯ ಅಭಿವೃದ್ಧಿಗೆ ಒಟ್ಟಾಗಿ ಶ್ರಮಿಸಬೇಕು. ಚುನಾವಣೆಯಲ್ಲಷ್ಟೇ ರಾಜಕಾರಣ. ಚುನಾವಣೆ ಮುಗಿದ ಬಳಿಕ ರಾಜಕಾರಣ ಬದಿಗಿಟ್ಟು ಸಹಕಾರ ನೀಡಬೇಕು ಎಂದು ಜಿಲ್ಲಾ ಉಸ್ತುವಾರಿ ಸಚಿವ ಜಮೀರಅಹ್ಮದ್‌ ಖಾನ್‌ ಹೇಳಿದರು.
ನಗರದ ಹೊಸಮನಿ ಸಿದ್ದಪ್ಪ ಜಿಲ್ಲಾ ಕ್ರೀಡಾಂಗಣದಲ್ಲಿ 70ನೇ ಗಣರಾಜ್ಯೋತ್ಸವ ರಾಷ್ಟ್ರಧ್ವಜಾರೋಹಣ ನೆರವೇರಿಸಿ ಗಣ್ಯರಾಜ್ಯೋತ್ಸವ ಸಂದೇಶ ನೀಡಿದ ಅವರು, ಭಾರತಕ್ಕೆ ಸ್ವಾತಂತ್ರ್ಯ ಬಂದ ನಂತರ ಡಾ| ಬಿ.ಆರ್‌. ಅಂಬೇಡ್ಕರ್‌ ನೇತೃತ್ವದ ಸಂವಿಧಾನ ಕರಡು ಸಮಿತಿ ದೇಶಕ್ಕೆ ಸುಭದ್ರವಾದ ಸಂವಿಧಾನ ನೀಡಿತು. ಅದು ದೇಶಕ್ಕೆ ಭದ್ರಬುನಾದಿ ಹಾಕಿತು. ಸಂವಿಧಾನದ ನೆಲೆಯಲ್ಲಿ ನಮ್ಮ ದೇಶದ ಐಕ್ಯತೆ ಕಾಪಾಡಿಕೊಂಡು ಬರಲಾಗಿದೆ ಎಂದರು.
ಭಾರತ ಸ್ವಾತಂತ್ರ್ಯ ಪಡೆಯುವುದಕ್ಕಿಂತ ಒಂದು ವರ್ಷ ಮೊದಲೇ ನಮ್ಮ ಸಂವಿಧಾನದ ರಚನಾ ಕಾರ್ಯ ಆರಂಭಗೊಂಡಿತು. ಭಾರತದ ಸಂವಿಧಾನ ರಚನೆಯಲ್ಲಿ ಡಾ| ಬಿ.ಆರ್‌. ಅಂಬೇಡ್ಕರ್‌ ಕೊಡುಗೆ ಅವಿಸ್ಮರಣೀಯ. ಸಂವಿಧಾನದ ಆಶಯಗಳಿಗೆ ಅನುಗುಣವಾಗಿ ನಮ್ಮ ಸರ್ಕಾರ ಕಳೆದ ಆರು ತಿಂಗಳ ಅವಧಿಯಲ್ಲಿ ನೂರಾರು ಸಾಧನೆ ಮಾಡಿದೆ. ಸರ್ವರನ್ನೂ ಒಳಗೊಂಡ, ಸರ್ವರನ್ನು ಬೆಸೆಯುವ ಮತ್ತು ಸರ್ವರಿಗೂ ಸಮಪಾಲು-ಸಮಬಾಳು ನೀಡುವ ಪ್ರಾಮಾಣಿಕತೆ ತೋರಿದೆ ಎಂದರು.
ಆಕರ್ಷಕ ಪಥಸಂಚಲನ: ಸಶಸ್ತ್ರ ಮೀಸಲು ಪಡೆ, ಪೊಲೀಸ್‌ ಪಡೆ, ಎನ್‌ಎಸ್‌ಎಸ್‌, ಎನ್‌ಸಿಸಿ, ಸ್ಕೌಟ್ ಆ್ಯಂಡ್‌ ಗೈಡ್ಸ್‌, ಕೇಂದ್ರೀಯ ವಿದ್ಯಾಲಯ ಸೇರಿದಂತೆ ವಿವಿಧ ಶಾಲಾ ಮಕ್ಕಳಿಂದ ಆಕರ್ಷಕ ಪಥಸಂಚಲನ ಎಲ್ಲರ ಗಮನ ಸೆಳೆಯಿತು. ಸನ್ಮಾನ: ಗಣರಾಜ್ಯೋತ್ಸವ ಅಂಗವಾಗಿ ವಿವಿಧ ಕ್ಷೇತ್ರದಲ್ಲಿ ಕಾರ್ಯನಿರ್ವಹಿಸುತ್ತಿರುವ 9 ಜನರಿಗೆ ಗಣರಾಜ್ಯೋತ್ಸವ ಪ್ರಶಸ್ತಿ ನೀಡಿ ಸನ್ಮಾನಿಸಲಾಯಿತು. ಸಂಗೀತ ಕ್ಷೇತ್ರದಿಂದ ಹಾನಗಲ್ಲ ತಾಲೂಕು ದೇವರಹೊಸಪೇಟೆ ಗ್ರಾಮದ ಬಸವಣ್ಣೆಯ್ನಾ ಶಾಸ್ತ್ರೀಗಳು ವೆಂಕಟಾಪೂರಮಠ, ಕೃಷಿ ಕ್ಷೇತ್ರದಿಂದ ಬ್ಯಾಡಗಿ ತಾಲೂಕಿನ ಚಿನ್ನಿಕಟ್ಟಿ ಗ್ರಾಮದ ಮೂಕಪ್ಪ ಪೂಜಾರ, ಜಾನಪದ ಕ್ಷೇತ್ರದಿಂದ ಹಾವೇರಿ ನಗರದ ತಿಪ್ಪೇಸ್ವಾಮಿ ಮುದಕಪ್ಪ ಹೊಸಮನಿ, ಲಲಿತ ಕಲೆ ಕ್ಷೇತ್ರದಿಂದ ಸಂತೋಷ ರಾಯ್ಕರ್‌, ಸಮಾಜ ಸೇವೆ ಕ್ಷೇತ್ರದಿಂದ ಹಾವೇರಿ ನಗರದ ರಾಜೇಶ್ವರಿ ಸಾರಂಗಮಠ ಹಾಗೂ ಹಸೀನಾ ಹೆಡಿಯಾಲ, ಕ್ರೀಡಾ ಕ್ಷೇತ್ರದಿಂದ ಹಾವೇರಿಯ ಕಿರಣಕುಮಾರ ಗೋಣೆಪ್ಪನವರ, ವೈದ್ಯಕೀಯ ಕ್ಷೇತ್ರದಿಂದ ಡಾ| ಡಿ.ಬಿ.ಸಾಕ್ರೆ ಹಾಗೂ ಪತ್ರಿಕಾ ಕ್ಷೇತ್ರದಿಂದ ನಾರಾಯಣ ಹೆಗಡೆ ಅವರನ್ನು ಸನ್ಮಾನಿಸಲಾಯಿತು.
ರಾಜ್ಯ ಮಟ್ಟದ ಕಲಾ ಪ್ರಶಸ್ತಿ ಪಡೆದ ತುಷಾರ್‌ ಆರ್‌. ಮಳಗಿ, ಮೈಸೂರು ದಸರಾ ಹಾಗೂ ವಿವಿಧ ಕಡೆ ಯೋಗಾ ಪ್ರದರ್ಶನ ನೀಡಿದ ಹಾವೇರಿಯ ಜಯಲಕ್ಷಿ ್ಮೕ ಜಿ.ಕೆ., ಅಂತಾರಾಜ್ಯ ಕ್ರೀಡಾಪಟು ರಾಹುಲ್‌ ಸುತಾರ ಹಾಗೂ ನೃತ್ಯ ಕ್ಷೇತ್ರದಿಂದ ಪ್ರಥ್ವಿ ಈರಣ್ಣ ಶಿರೂರ ಅವರನ್ನು ಸನ್ಮಾನಿಸಿ ಗೌರವಿಸಲಾಯಿತು. ಜಿಪಂ ಅಧ್ಯಕ್ಷ ಎಸ್‌.ಕೆ. ಕರಿಯಣ್ಣನವರ, ಸಂಸದ ಶಿವಕುಮಾರ ಉದಾಸಿ, ಶಾಸಕರಾದ ನೆಹರು ಓಲೇಕಾರ, ಜಿಪಂ ಉಪಾಧ್ಯಕ್ಷೆ ದೀಪಾ ಅತ್ತಿಗೇರಿ, ಜಿಲ್ಲಾಧಿಕಾರಿ ಡಾ| ಎಂ.ವಿ. ವೆಂಕಟೇಶ್‌, ಜಿಲ್ಲಾ ಪೊಲೀಸ್‌ ವರಿಷ್ಠಾಧಿಕಾರಿ ಕೆ. ಪರಶುರಾಮ, ಜಿಪಂ ಸಿಇಒ ಕೆ. ಲೀಲಾವತಿ ಇತರರು ಇದ್ದರು.
ಲಿಂ| ಶ್ರೀಗಳಿಗೆ ಶ್ರದ್ಧಾಂಜಲಿ
ಬಂಕಾಪುರ: ಇಲ್ಲಿನ ದಿ. ಮಾಡರ್ನ್ ಸ್ಕೂಲಿನಲ್ಲಿ 70ನೇ ಗಣರಾಜ್ಯೋತ್ಸವ ಅಂಗವಾಗಿ ನಡೆದ ಧ್ವಜಾರೋಹಣವನ್ನು ಶಾಲಾ ಸಮಿತಿ ಅಧ್ಯಕ್ಷ ಸಿದ್ದಲಿಂಗಪ್ಪ ಸಕ್ರಿ ನೆರವೇರಿಸಿದರು. ನಂತರ ಲಿಂಗೈಕ್ಯರಾದ ಶತಾಯುಷಿ ಡಾ| ಶಿವಕುಮಾರ ಸ್ವಾಮೀಜಿ ಅವರಿಗೆ ಶ್ರದ್ಧಾಂಜಲಿ ಸಲ್ಲಿಸಲಾಯಿತು. ನೀಲಪ್ಪ ಸಣ್ಣಕ್ಕಿ, ಮಹದೇವಪ್ಪ ಸುಂಕದ, ಪ್ರಕಾಶ ನಿರೋಳ್ಳಿ, ಸತೀಷ ಆಲದಕಟ್ಟಿ, ಬಸವರಾಜ ನಾರಾಯಣಪುರ, ಶಿಕ್ಷಕರಾದ ಪಿ.ಎಸ್‌.ಪಾಟೀಲ, ಎಸ್‌.ವೈ. ದಾಸರ, ವಿ.ಎಲ್‌.ಚನ್ನೂರ, ವಿ.ಬಿ. ಬಂಕಾಪುರ, ತೌಸಿನಾಭಾನು, ಎಂ.ಮರಿಬಸಪ್ಪನವರ, ಎಸ್‌.ಎಚ್. ಹೊನಕುಪ್ಪಿ, ಪಿ.ಜಿ. ಪೂಜಾರ, ಎಸ್‌.ಎಚ್. ಈರಣ್ಣ ಸೇರಿದಂತೆ ವಿದ್ಯಾರ್ಥಿಗಳು ಉಪಸ್ಥಿತರಿದ್ದರು.
