ಪಶ್ಚಿಮ ಬಂಗಾಲದಲ್ಲಿ ಮುಂದುವರಿದ ಹಿಂಸಾಚಾರ

ಲೋಕಸಭೆ ಚುನಾವಣೆ ಮುಗಿದರೂ ಪಶ್ಚಿಮ ಬಂಗಾಲ ಮಾತ್ರ ತಣ್ಣಗಾಗಿಲ್ಲ. ಇಲ್ಲಿನ ಭತ್ಪಾರಾದಲ್ಲಿ ನಿಷೇಧಾಜ್ಞೆ ಜಾರಿಯಾಗಿದ್ದರೂ ಬಿಜೆಪಿ-ಟಿಎಂಸಿ ಕಾರ್ಯಕರ್ತರ ನಡುವಿನ ಘರ್ಷಣೆ ಮುಂದುವರಿದಿದೆ. ರವಿವಾರ ವಿಧಾನಸಭೆ ಉಪಚುನಾವಣೆಯನ್ನು ಎದುರಿಸಿದ ಪಶ್ಚಿಮ ಬಂಗಾಲದ ಕಾನ್‌ಕಿನಾರಾದ ರೈಲು ನಿಲ್ದಾಣದಲ್ಲಿ ಮಂಗಳವಾರ ಕಚ್ಚಾ ಬಾಂಬ್‌ ಎಸೆಯಲಾಗಿದೆ.

ಪರಿಣಾಮ, ರೈಲುಗಳ ಸಂಚಾರದಲ್ಲಿ ವ್ಯತ್ಯಯ ಉಂಟಾಗಿದೆ. ಘಟನೆಯಲ್ಲಿ ಯಾವುದೇ ಸಾವು ನೋವು ಸಂಭವಿಸಿಲ್ಲ. ಇದೇ ವೇಳೆ ಟಿಎಂಸಿ ಕಚೇರಿಯೊಳಕ್ಕೂ ಬಾಂಬ್‌ ಹಾಕಿ, ಬೆಂಕಿ ಹಚ್ಚಲಾಗಿದ್ದು, ಪರಿಸ್ಥಿತಿಯನ್ನು ನಿಯಂತ್ರಣಕ್ಕೆ ತರಲು ಕೇಂದ್ರದ ಪಡೆಗಳು ಲಾಠಿ ಪ್ರಹಾರ ಮಾಡಿದ್ದಾರೆ. ಈ ವೇಳೆ 14 ಮಂದಿ ಗಾಯಗೊಂಡು, ಹಲವು ಮನೆಗಳು, ಅಂಗಡಿಗಳಿಗೆ ಹಾನಿಯಾಗಿವೆ. ಈ ಮಧ್ಯೆ, ಮಂಗಳವಾರ ಬಿಜೆಪಿಯ ನಿಯೋಗವು ರಾಜ್ಯಪಾಲ ಕೆ.ಎನ್‌.ತ್ರಿಪಾಠಿ ಅವರನ್ನು ಭೇಟಿಯಾಗಿದ್ದು, ರಾಜ್ಯದ ಕೆಲವು ಭಾಗಗಳನ್ನು ಸೇನೆಯನ್ನು ನಿಯೋಜಿಸುವಂತೆ ಮನವಿ ಮಾಡಿದೆ.