ನ್ಯಾಯಾಂಗ ನಿಂದನೆ ಅರ್ಜಿ

ಬೆಂಗಳೂರು: ಅಲಯನ್ಸ್‌ ವಿಶ್ವವಿದ್ಯಾಲಯದ ಆಡಳಿತ ನಿರ್ವಹಣೆಯಲ್ಲಿ ಮಧ್ಯಪ್ರವೇಶಿಸಬಾರದೆಂಬ ಸಿವಿಲ್‌ ನ್ಯಾಯಾಲಯದ ಆದೇಶ ಉಲ್ಲಂ ಸಿದ್ದ ವಿವಿಯ ಪದಚ್ಯುತ ಕುಲಾಧಿಪತಿ ಮಧುಕರ್‌ ಜಿ. ಅಂಗೂರ್‌ ವಿರುದ್ಧ ದಾಖಲಾಗಿದ್ದ ನ್ಯಾಯಾಂಗ ನಿಂದನೆ ಅರ್ಜಿಯನ್ನು ಶುಕ್ರವಾರ ಹೈಕೋರ್ಟ್‌ ಇತ್ಯರ್ಥಪಡಿಸಿದೆ.

ಈ ಕುರಿತ ಅರ್ಜಿ ವಿಚಾರಣೆ ನಡೆಸಿದ ಮುಖ್ಯ ನ್ಯಾಯಮೂರ್ತಿ ಎಸ್‌. ಕೆ. ಮುಖರ್ಜಿ ಹಾಗೂ ನ್ಯಾಯಮೂರ್ತಿ ಆರ್‌.ಬಿ. ಬೂದಿಹಾಳ್‌ ಅವರಿದ್ದ ವಿಭಾಗೀಯ ಪೀಠ, ಸಿವಿಲ್‌ ನ್ಯಾಯಾಲಯದ ಆದೇಶ ಉಲ್ಲಂಘನೆ ಕುರಿತ ವಿವಾದವನ್ನು ಅದೇ ನ್ಯಾಯಾಲಯದಲ್ಲಿ ಇತ್ಯರ್ಥಪಡಿಸಿ­ಕೊಳ್ಳಬೇಕು ಎಂದು ಅರ್ಜಿದಾರರಾದ ವಿವಿ ಕುಲಸಚಿವ ಮಧುಸೂದನ್‌ಮಿಶ್ರಾ ಮತ್ತು ಶ್ರೇಯಸ್‌ ಸಂಜೀವ್‌ ಅವರಿಗೆ ನಿರ್ದೇಶಿಸಿ ಅರ್ಜಿ ಇತ್ಯರ್ಥ ಗೊಳಿಸಿತು.

ಕೆಲ ಆರೋಪಗಳಿಗೆ ಸಂಬಂಧಿಸಿದಂತೆ ಅಲಯನ್ಸ್‌ ವಿವಿಯ ಕುಲಾಧಿಪತಿಯಾಗಿದ್ದ ಮಧುಕರ್‌ ಜಿ. ಅಂಗೂರ್‌ ಪದಚ್ಯುತಗೊಳಿಸಿದ್ದ, ಆಡಳಿತ ಮಂಡಳಿ ಸಿವಿಲ್‌ ಕೋರ್ಟ್‌ನಲ್ಲಿ ದೂರು ದಾಖಲಿಸಿದ್ದರು. ಈ ಅರ್ಜಿ ವಿಚಾರಣೆ ನಡೆಸಿದ ನ್ಯಾಯಾಲಯ, ಪದಚ್ಯುತ­ಗೊಂಡಿರುವ ನೀವು ವಿಶ್ವವಿದ್ಯಾಲಯದ ಆಡಳಿತ ನಿರ್ವಹಣೆಯಲ್ಲಿ ಮಧ್ಯಪ್ರವೇಶಿಸಬಾರದೆಂದು ಸೂಚಿಸಿತ್ತು.

ಇದಾದ ಬಳಿಕವೂ ಮಧುಕರ್‌ ಅಂಗೂರ್‌ ಆಡಳಿತ ನಿರ್ವಹಣೆಯಲ್ಲಿ ಹಸ್ತಕ್ಷೇಪ ಮಾಡುತ್ತಿದ್ದಾರೆಂದು ದೂರಿ ವಿವಿ ಕುಲಸಚಿವ ಮಧುಸೂದನ್‌ಮಿಶ್ರಾ ಮತ್ತು ಶ್ರೇಯಸ್‌ ಸಂಜೀವ್‌, ಮಧುಕರ್‌ ವಿರುದ್ಧ ಹೈಕೋರ್ಟ್‌ನಲ್ಲಿ  ನ್ಯಾಯಾಂಗ ಆದೇಶ ಉಲ್ಲಂಘನೆ ಅರ್ಜಿ ಸಲ್ಲಿಸಿದ್ದರು.