ಕಾಂಗ್ರೆಸ್‌ ಸಂಸದ ಶಶಿ ತರೂರ್‌ ಟ್ವೀಟ್‌ಗೆ ಮೀನುಗಾರರು ಕೆಂಡ

ನವದೆಹಲಿ: ಇತ್ತೀಚೆಗೆ ತಿರುವನಂತಪುರದ ಮೀನು ಮಾರುಕಟ್ಟೆಗೆ ಭೇಟಿ ನೀಡಿದ ಬಳಿಕ ಕಾಂಗ್ರೆಸ್‌ ಸಂಸದ ಶಶಿ ತರೂರ್‌ ಮಾಡಿರುವ ಟ್ವೀಟ್‌ವೊಂದು ಭಾರೀ ವಿವಾದ ಸೃಷ್ಟಿಸಿದ್ದು, ತರೂರ್‌ ವಿರುದ್ಧ ಮೀನುಗಾರರು ಬೀದಿಗಿಳಿದಿದ್ದಾರೆ.

“ಒಬ್ಬ ಪಕ್ಕಾ ಸಸ್ಯಾಹಾರಿ ಹಾಗೂ ಅತಿ ಬೇಗನೆ ಅಸಹ್ಯಗೊಳ್ಳುವ ಸಂಸದನಾಗಿದ್ದರೂ ಮೀನು ಮಾರುಕಟ್ಟೆಯಲ್ಲಿ ನಾನು ಸಾಕಷ್ಟು ಕುತೂಹಲ ಕಂಡೆ’ ಎಂದು ತರೂರ್‌ ಟ್ವೀಟ್‌ ಮಾಡಿದ್ದರು. ಇಲ್ಲಿ ಅವರು ಬಳಸಿರುವ “ಅಸಹ್ಯ’ ಎಂಬ ಅರ್ಥ ಕೊಡುವ ಸ್ಕಿಮಿಷ್‌ ಎಂಬ ಪದಕ್ಕೆ ತೀವ್ರ ಆಕ್ಷೇಪ ವ್ಯಕ್ತವಾಗಿದೆ. ತರೂರ್‌ ಮೀನುಗಾರರಿಗೆ ಅವಮಾನ ಮಾಡಿದ್ದಾರೆ ಎಂದು ಎಡಪಕ್ಷಗಳು ಹಾಗೂ ಬಿಜೆಪಿ ಕಿಡಿಕಾರಿವೆ. ಬೆಸ್ತರು ಕೂಡ ಅಲ್ಲಲ್ಲಿ ಪ್ರತಿಭಟನೆ ನಡೆಸಿದ್ದಾರೆ. ಆದರೆ, ಸ್ಕಿಮಿಷ್‌ ಪದಕ್ಕೆ ಹಲವು ಅರ್ಥಗಳಿದ್ದು, ಅದನ್ನು ಬಿಜೆಪಿ-ಎಡಪಕ್ಷಗಳು ತಿರುಚಿ ಸುಖಾಸುಮ್ಮನೆ ಆರೋಪ ಮಾಡುತ್ತಿವೆ ಎಂದು ತರೂರ್‌ ಹೇಳಿದ್ದಾರೆ.