25 ಸಂಸದರನ್ನು ನೀಡಿದ ರಾಜ್ಯಕ್ಕೆ ಅನ್ಯಾಯ : ಎಂ.ಲಕ್ಷ್ಮಣ್‌ ಆಕ್ರೋಶ

ಮೈಸೂರು: “ಹೆಚ್ಚು ಸಂಸದರನ್ನು ಗೆಲ್ಲಿಸಿದ ರಾಜ್ಯಕ್ಕೆ ಎನ್‌ಡಿಎ ನೇತೃತ್ವದ ಕೇಂದ್ರ ಸರ್ಕಾರ ಈ ಬಜೆಟ್‌ ನಲ್ಲಿ ಏನನ್ನೂ ನೀಡಿಲ್ಲ.  ಆದರೆ ತಮ್ಮ ಅಭ್ಯರ್ಥಿಗಳು ಠೇವಣಿ ಕಳೆದುಕೊಂಡ ತಮಿಳುನಾಡಿಗೆ ಹೆಚ್ಚಿನ ಅನುದಾನ ನೀಡುವ ಮೂಲಕ ಕರ್ನಾಟಕಕ್ಕೆ ಅನ್ಯಾಯ ಮಾಡಿದೆ’ ಎಂದು ಕೆಪಿಸಿಸಿ ವಕ್ತಾರ ಎಂ.ಲಕ್ಷ್ಮಣ್‌ ಆಕ್ರೋಶ ವ್ಯಕ್ತಪಡಿಸಿದರು.

ನಗರದ ಕಾಂಗ್ರೆಸ್‌ ಭವನದಲ್ಲಿ ಸುದ್ದಿಗೋಷ್ಠಿ ನಡೆಸಿ ಮಾತನಾಡಿದ ಅವರು, ಇಲ್ಲಿಂದ 25 ಸಂಸದರನ್ನು ಗೆಲ್ಲಿಸಿ ಕಳುಹಿಸಿರುವ ಕರ್ನಾಟಕಕ್ಕೆ ಬಜೆಟ್‌ನಲ್ಲಿ ಏನೂ ಸಿಕ್ಕಿಲ್ಲ. ಜತೆಗೆ ವಿತ್ತ ಸಚಿವೆ ನಿರ್ಮಲಾ ಸೀತಾರಾಮನ್‌ ಅವರು ರಾಜ್ಯವನ್ನು ಪ್ರತಿನಿಧಿಸಿದರೂ ತಮ್ಮ ಬಜೆಟ್‌ನಲ್ಲಿ ಹೆಚ್ಚಿನ ಅನುದಾನವನ್ನು ಅನ್ಯ ರಾಜ್ಯಗಳಿಗೆ ನೀಡಿದ್ದಾರೆ. ತಮ್ಮ ಬಜೆಟ್‌ನಲ್ಲಿ 14,780 ಕೋಟಿ ರೂ.ಮಾತ್ರ ನೀಡಿದ್ದಾರೆ. ಆದರೆ, ಸದ್ಯದಲ್ಲೇ ಚುನಾವಣೆ ನಡೆಯುವ ತಮಿಳುನಾಡು, ಪಶ್ಚಿಮ ಬಂಗಾಳ, ಕೇರಳ, ಆಸ್ಸಾಂ ರಾಜ್ಯಗಳಿಗೆ ಹೆಚ್ಚಿನ ಅನುದಾನ ನೀಡಲಾಗಿದೆ. ಕಳೆದ ಲೋಕಸಭಾ ಚುನಾವಣೆ  ಯಲ್ಲಿ ಠೇವಣಿ ಕಳೆದುಕೊಂಡ ತಮಿಳುನಾಡಿಗೆ ಹೆಚ್ಚಿನ ಅನುದಾನ ನೀಡಿ ಕರ್ನಾಟಕಕ್ಕೆ ಅನ್ಯಾಯ ಮಾಡಿದ್ದಾರೆ ಎಂದು ದೂರಿದರು.

ಉತ್ತರವಿಲ್ಲ: ಹಣಕಾಸು ಸಚಿವರು ಮಂಡಿಸಿರುವುದು ಬರ್ಬಾದ್‌ ಬಜೆಟ್‌ ಆಗಿದ್ದು, ಮುಂದಿನ ದಿನ ಗಳಲ್ಲಿ ದೇಶದ ಅರ್ಥ  ವ್ಯವಸ್ಥೆಯನ್ನು ಬುಡ ಮೇಲು ಮಾಡಲಿದೆ. ಕೃಷಿ ಹೆಸರಿನಲ್ಲಿ ಸೆಸ್‌ ಸಂಗ್ರಹಿಸುವುದರಿಂದ ಈ ಹಣವನ್ನು ಕೃಷಿಕರಿಗೆ  ನೀಡಲಾಗುತ್ತದೆಯೇ ಎಂಬುದಕ್ಕೆ ವಿವರಣೆ ಇಲ್ಲ. 2020-21ರಲ್ಲಿ ಶೇ.9.5ರಷ್ಟು ಹಾಗೂ 2022ರಲ್ಲಿ ಶೇ.6.8ವಿತ್ತೀಯ ಕೊರತೆ ಇರುವು ದಾಗಿ ಸರ್ಕಾರ ಹೇಳಿದೆ. ವಿತ್ತೀಯ ಕೊರತೆ ಎಲ್ಲಿಂದ ತುಂಬಿಸಿಕೊಳ್ಳುತ್ತದೆ ಎನ್ನುವುದಕ್ಕೆ ಉತ್ತರವಿಲ್ಲ. ಮುಂದಿನ ದಿನಗಳಲ್ಲಿ  ಜನ ಇಟ್ಟಿರುವ ಠೇವಣಿ, ಹಣಕ್ಕೆ ಕೈ ಹಾಕುವ ಅನುಮಾನವಿದೆ ಎಂದು ಹೇಳಿದರು.

ಜನರನ್ನು ಭಿಕ್ಷುರನ್ನಾಗಿಸುವ ಪ್ರಯತ್ನ: 2014ರಲ್ಲಿ ದೇಶದ ಮೇಲೆ 52 ಲಕ್ಷ ಕೋಟಿ ಸಾಲ ಇದ್ದರೆ, 2020ಕ್ಕೆ 107 ಲಕ್ಷ ಕೋಟಿಗೆ ಏರಿಕೆಯಾಗಿದೆ. 2021-22ರಲ್ಲಿ 12ಲಕ್ಷ ಕೋಟಿ ರೂ.ಸಾಲ ಪಡೆಯಲು ಹೊರಟಿರುವುದು ಇಡೀ ದೇಶವನ್ನು ಮೋದಿ ಸರ್ಕಾರ  ಸಾಲದ ಕೂಪಕ್ಕೆ ತಳ್ಳಲು ಹೊರಟಿದೆ. 6 ವರ್ಷಗಳಲ್ಲಿ ಹೆಚ್ಚು ಸಾಲ ಮಾಡಿರುವುದೇ ನರೇಂದ್ರ ಮೋದಿ ಸಾಧನೆ. ಜನರನ್ನು  ಭಿಕ್ಷುಕರನ್ನಾಗಿ ಮಾಡಲು ಪ್ರಾಮಾಣಿಕ ಪ್ರಯತ್ನ ಮಾಡಿದ್ದಾರೆಂದು ಟೀಕಿಸಿದರು.

ದೇಶದಲ್ಲಿರುವ ಸರ್ಕಾರಿ ಸ್ವಾಯತ್ತ ಸಂಸ್ಥೆಗಳಲ್ಲಿ 30 ಸಂಸ್ಥೆಗಳನ್ನು ಖಾಸಗಿಯವರಿಗೆ ಮಾರಾಟ ಮಾಡಲಾಗಿದೆ. ಈಗ ಎಲ್‌ಐಸಿ ಯನ್ನು ಖಾಸಗಿಯವರಿಗೆ ಮಾರಲು ಹೊರಟಿದ್ದಾರೆ. ಪ್ರಮುಖ 3 ಬ್ಯಾಂಕ್‌ಗಳನ್ನು ಖಾಸಗೀಕರಣ ಮಾಡಿದ್ದಾರೆ. ವಿದ್ಯುತ್‌ ಕ್ಷೇತ್ರ ಖಾಸಗೀಕರಣ ಮಾಡಲು ಅನುಮೋದನೆ ಪಡೆದಿರುವುದರಿಂದ ರೈತರಿಗೆ ಉಚಿತವಾಗಿ ಸಿಗುತ್ತಿದ್ದ ವಿದ್ಯುತ್‌ ಸೇವೆ ನಿಲ್ಲಲಿದೆ  ಎಂದರು.

ಇದನ್ನೂ ಓದಿ :ತಲಕಾವೇರಿಯಲ್ಲಿ ಪ್ರವಾಸಿಗರ ಉಪಟಳ ತಡೆಗೆ ಕ್ರಮ: ಸಚಿವ ಕೋಟ ಶ್ರೀನಿವಾಸ ಪೂಜಾರಿ ಭರವಸೆ

ಕೊರೊನಾ ಸಂದರ್ಭದಲ್ಲಿ ದೇಶದಲ್ಲಿ 12.2 ಕೋಟಿ ಜನ ಉದ್ಯೋಗ ಕಳೆದುಕೊಂಡಿದ್ದಾರೆ. ಮೋದಿ ಅವರ 6 ವರ್ಷದ ಅವಧಿಯಲ್ಲಿ  16 ಕೋಟಿ ಜನರು ನಿರುದ್ಯೋಗಿಗಳಾಗಿದ್ದಾರೆ. ಸಣ್ಣ ಮತ್ತು ಮಧ್ಯಮ ಕೈಗಾರಿಕೆಗಳು ದೇಶದಲ್ಲಿ 6.33 ಕೋಟಿ ಸಂಖ್ಯೆಯಷ್ಟಿದ್ದವು. ಸಿಎಂಐಇ ಸಂಸ್ಥೆ ನಡೆಸಿರುವ ಸರ್ವೆ ಪ್ರಕಾರ 1.5 ಕೋಟಿ ಸಣ್ಣ ಮತ್ತು ಮಧ್ಯಮ ಕೈಗಾರಿಕೆಗಳು ಮುಚ್ಚಿ ಹೋಗಿವೆ. ಕೈಗಾರಿಕೆಗಳ ಪುನಶ್ಚೇತನಕ್ಕೆ ಆತ್ಮನಿರ್ಭರ ಭಾರತ ಯೋಜನೆಯಡಿ ಘೋಷಿಸಿದ್ದ ಪ್ಯಾಕೇಜ್‌ ಎಲ್ಲಿ ಹೋಯಿತು ಎನ್ನುವುದನ್ನು ಜನರ ಮುಂದೆ ಹೇಳಬೇಕು. ಕೇಂದ್ರ ಸಚಿವ ಡಿ.ವಿ.ಸದಾನಂದ ಗೌಡ ಅವರು 6 ವರ್ಷಗಳಲ್ಲಿ ಕರ್ನಾಟಕಕ್ಕೆ ಯಾವ ಯೋಜನೆಗಳನ್ನು ತಂದಿಲ್ಲ.  ಕೇವಲ ಶೂನ್ಯ ಸಾಧನೆ ಎಂದು ಲೇವಡಿ ಮಾಡಿದರು. ಸುದ್ದಿಗೋಷ್ಠಿಯಲ್ಲಿ ನಗರ ಕಾಂಗ್ರೆಸ್‌ ಅಧ್ಯಕ್ಷ ಆರ್‌.ಮೂರ್ತಿ, ಪ್ರಧಾನ  ಕಾರ್ಯದರ್ಶಿ ಎಂ.ಶಿವಣ್ಣ ಇದ್ದರು.