ಆಂತರಿಕ ಬಿಕ್ಕಟ್ಟಿಗೆ ಬೆಲೆ ತೆತ್ತ ಕಾಂಗ್ರೆಸ್‌

ಡೆಹ್ರಾಡೂನ್‌: ಉತ್ತರಾಖಂಡದಲ್ಲಿ ಪಕ್ಷದಲ್ಲಿನ ಆಂತರಿಕ ಬಿಕ್ಕಟ್ಟಿಗೆ ಕಾಂಗ್ರೆಸ್‌ ಬೆಲೆತೆತ್ತಿದೆ. ಆಂತರಿಕ ಕಲಹ, ಹರೀಶ್‌ ರಾವತ್‌ ಮತ್ತು ವಿಜಯ್‌ ಬಹುಗುಣ ನಡುವಿನ ವೈಮನಸ್ಸು ಹಾಗೂ ಪ್ರಭಾವಿ ನಾಯಕರು ಪಕ್ಷ ತೊರೆದು ಬಿಜೆಪಿ ಸೇರಿದ್ದು ಮತ್ತು ಈ ಎಲ್ಲ ಬೆಳವಣಿಗೆಗಳನ್ನು ನೋಡಿಯೂ ಹೈಕಮಾಂಡ್‌ ಮೌನವಹಿಸಿದ್ದು ರಾಜ್ಯದಲ್ಲಿ ಪಕ್ಷಕ್ಕೆ ತೀವ್ರ ಮುಖಭಂಗ ಉಂಟುಮಾಡಿದೆ.

2012ರ ಚುನಾವಣೆ ವೇಳೆ ವಿಜಯ್‌ ಬಹುಗುಣ ಅವರನ್ನು ಮುಖ್ಯಮಂತ್ರಿ ಅಭ್ಯರ್ಥಿಯನ್ನಾಗಿ ಘೋಷಿಸಿದಾಗಲೇ ಹೈಕಮಾಂಡ್‌ ವಿರುದ್ಧ ತಿರುಗಿಬಿದ್ದ ರಾವತ್‌, ಪಕ್ಷ ತೊರೆಯುವ ಬೆದರಿಕೆ ಹಾಕಿದ್ದರು. ನಂತರ ಯುಪಿಎ ಸರ್ಕಾರದಲ್ಲಿ ಸಂಪುಟದರ್ಜೆ ಸಚಿವ ಸ್ಥಾನ ನೀಡುವ ಮೂಲಕ ರಾವತ್‌ರನ್ನು ಹೈಕಮಾಂಡ್‌ ತಣ್ಣಗಾಗಿಸಿತ್ತು. ಆದರೆ 2013ರಲ್ಲಿ ಉತ್ತರಾಖಂಡ ನೆರೆ ಹಾವಳಿಗೆ ತುತ್ತಾದಾಗ ಮತ್ತೆ ತಮ್ಮ ವರಸೆ ತೆಗೆದ ಹರೀಶ್‌ ರಾವತ್‌, ಶತಾಯಗತಾಯ ಬಹುಗುಣ ಅವರನ್ನು ಸಿಎಂ ಸ್ಥಾನದಿಂದ ಇಳಿಸುವ ಪಣ ತೊಟ್ಟರು. ಅದನ್ನು ಸಾಧಿಸಿ, ತಾವೇ ಸಿಎಂ ಕುರ್ಚಿ ಅಲಂಕರಿಸಿದರು.

ನಂತರ ಪಕ್ಷದ ಹಿರಿಯ ಮುಖಂಡರ ಅಭಿಪ್ರಾಯಗಳನ್ನು ತುಳಿಯುತ್ತಾ ಹೋದ ರಾವತ್‌, ಸತ್ಪಾಲ್‌ ಮಹಾರಾಜ್‌ ಸೇರಿದಂತೆ ಹಲವು ಪ್ರಭಾವಿ ನಾಯಕರು ಕಾಂಗ್ರೆಸ್‌ ತೊರೆಯಲು ಕಾರಣರಾದರು. ಆದಾಗ್ಯೂ ರಾವತ್‌ರನ್ನೇ ಸಿಎಂ ಅಭ್ಯರ್ಥಿ ಎಂದು ಘೋಷಿಸಿದ ಕಾಂಗ್ರೆಸ್‌, ದೊಡ್ಡ ತಪ್ಪೆಸಗಿ ಈಗ ಅದಕ್ಕೆ ತಕ್ಕ ಬೆಲೆ ತೆತ್ತಿದೆ. ಇದರೊಂದಿಗೆ ಟಿಕೆಟ್‌ ಸಿಗದೆ ಬಂಡಾಯವಾಗಿ ಸ್ಪರ್ಧಿಸಿದ ಅಭ್ಯರ್ಥಿಗಳು ಕಾಂಗ್ರೆಸ್‌ ಮತಗಳನ್ನು ವಿಭಾಗಿಸಿ ಬಿಜೆಪಿ ಗೆಲುವಿಗೆ ದಾರಿ ಮಾಡಿಕೊಟ್ಟರು.