ಮಾಲಾಧಾರಿಗಳ ಮೇಲೆ ದಾಳಿಗೆ ಖಂಡನೆ

ರಾಯಚೂರು: ಕೋಲಾರ ಜಿಲ್ಲೆಯಲ್ಲಿ ದತ್ತ ಮಾಲಾಧಾರಿಗಳ ಮೇಲೆ ದಾಳಿ ನಡೆಸಿ ಮಾರಾಣಾಂತಿಕ ಹಲ್ಲೆ ನಡೆಸಿದ ದುಷ್ಕರ್ಮಿಗಳನ್ನು ಬಂಧಿಸಿ, ಕಾನೂನು ಕ್ರಮ ಜರುಗಿಸಬೇಕು ಎಂದು ಹಿಂದೂ ಜನಜಾಗೃತಿ ಸಮಿತಿ ಸದಸ್ಯರು ಪ್ರತಿಭಟನೆ ನಡೆಸಿದರು.

ಈ ಕುರಿತು ಡಿಸಿ ಮೂಲಕ ಮುಖ್ಯಮಂತ್ರಿಗೆ ಮನವಿ ಸಲ್ಲಿಸಿ, ನ.13ರಂದು ಕೋಲಾರದ ಪಿಶಾಲ್‌ ಮಾರ್ಟ್‌ ಸಮೀಪ ಸುಮಾರು 25 ದತ್ತ ಮಾಲಾಧಾರಿಗಳು ಮಿನಿ ಬಸ್‌ ನಲ್ಲಿ ದತ್ತ ಪೀಠಕ್ಕೆ ಹೋಗುತ್ತಿದ್ದಾರೆ ನೂರಕ್ಕೂ ಅಧಿಕ ಇಸ್ಲಾಮಿಕ್‌ ಮತಾಂಧ ಸಂಘಟನೆ ಸದಸ್ಯರು ಬಸ್‌ ಮೇಲೆ ಕಲ್ಲು ತೂರಾಟ ನಡೆಸಿದ್ದಾರೆ. ಬಸ್‌ಗೆ ಅಡ್ಡಗಟ್ಟಿ ದಾಳಿ ಮುಂದಾಗಿರುವುದು ವ್ಯವಸ್ಥಿತ ಷಡ್ಯಂತ್ರವಾಗಿದೆ ಎಂದು ದೂರಿದರು.

ಬಸ್‌ ಚಾಲಕ ಸೇರಿದಂತೆ ಅನೇಕ ಭಕ್ತರ ಮೇಲೆ ಮಾರಾಣಾಂತಿಕ ಹಲ್ಲೆ ನಡೆಸಲಾಗಿದೆ. ಗಾಯಗೊಂಡ ಮಾಲಾಧಾರಿಗಳು ಪ್ರಾಥಮಿಕ ಚಿಕಿತ್ಸೆ ಪಡೆದಿದ್ದಾರೆ. ಗೋದ್ರಾ ಮಾದರಿಯಲ್ಲಿ ದತ್ತ ಮಾಲಾಧಾರಿಗಳ ಸಜೀವ ದಹನಕ್ಕೆ ಸಂಚು ಹೂಡಲಾಗಿದೆ ಎಂಬ ಗುಮಾನಿಗಳಿದ್ದು, ಇಂಥ ಕೃತ್ಯಗಳಿಗೆ ಕೂಡಲೇ ಕಡಿವಾಣ ಹಾಕಬೇಕು. ದುಷ್ಕರ್ಮಿಗಳನ್ನು ಕೂಡಲೇ ಬಂಧಿಸಿ ಕಠಿಣ ಶಿಕ್ಷೆಗೆ ಗುರಿಪಡಿಸಬೇಕು. ದತ್ತ ಭಕ್ತರಿಗೆ ರಕ್ಷಣೆ ನೀಡಬೇಕು ಎಂದು ಆಗ್ರಹಿಸಿದರು. ಸಮಿತಿಯ ಸದಸ್ಯರಾದ ಸುವರ್ಣಾ, ಕೃಷ್ಣವೇಣಿ, ಜಯಶ್ರೀ, ಶಿವರಾಜ ಸೇರಿ ಇತರರಿದ್ದರು.