ಜನಜೀವನ ಸುಧಾರಣೆಯಲ್ಲಿ ಅಭೂತಪೂರ್ವ ಕ್ರಾಂತಿ: ಮೋದಿ ಬಣ್ಣನೆ

ಹೊಸದಿಲ್ಲಿ : ಕೇಂದ್ರದಲ್ಲಿನ ಬಿಜೆಪಿ ಸರಕಾರದ ಮೂರನೇ ವರ್ಷಾಚರಣೆಯ ಸಂಭ್ರಮ – ಸಡಗರದಲ್ಲಿ ಪ್ರಧಾನಿ ನರೇಂದ್ರ ಮೋದಿ ಅವರಿಂದು “ನಮ್ಮ ಅಧಿಕಾರಾವಧಿಯಲ್ಲಿ ತೆಗೆದುಕೊಳ್ಳಲಾಗಿರುವ ಕ್ರಾಂತಿಕಾರಕ ಕ್ರಮಗಳಿಂದ ದೇಶದ ಜನರ ಬದುಕು ಅಸಾಮಾನ್ಯ ಪ್ರಗತಿಯನ್ನು ಕಂಡಿದೆ’ ಎಂದು ಹೇಳಿದರು. 

ವಿವಿಧ ರಂಗಗಳಲ್ಲಿ ಆಗಿರುವ ಪ್ರಗತಿ, ಅಭಿವೃದ್ಧಿಯ ಸಾಧನೆಗಳನ್ನು ತುಲನೆ ಮಾಡಲು ಪ್ರಧಾನಿ ಮೋದಿ ಅವರು 2014 ಮತ್ತು 2017ರ ಅಂಕಿ ಅಂಶಗಳನ್ನು ಮುಂದಿಟ್ಟರು. ನರೇಂದ್ರ ಮೋದಿ ಆ್ಯಪ್‌ನಲ್ಲಿ ಆಯೋಜಿಸಲಾಗಿರುವ ಕೇಂದ್ರ ಸರಕಾರದ ಸಾಧನಾ ಸಮೀಕ್ಷೆಯಲ್ಲಿ ಪಾಲ್ಗೊಳ್ಳುವಂತೆ ಮೋದಿ ಜನರಿಗೆ ಕರೆ ನೀಡಿದರು.

ಸಾತ್‌ ಹೈ, ವಿಕಾಸ್‌ ಹೈ – ತೋ ಹೋ ರಹಾ ವಿಕಾಸ್‌ ಹೈ (ಸಹಕಾರವಿದೆ, ವಿಶ್ವಾಸವಿದೆ ಎಂದರೆ ವಿಕಾಸವಿದೆ ) ಎಂಬ ಬೀಜಮಂತ್ರವನ್ನು ಮೋದಿ ಟ್ವೀಟ್‌ ಮಾಡಿದರು. ಕಳೆದ ಮೂರು ವರ್ಷಗಳಲ್ಲಿ ದೇಶದ ಜನರ ಬದುಕಿನಲ್ಲಿ ಅಸಾಮಾನ್ಯ ಪ್ರಗತಿಯಾಗಿದೆ ಎಂದು ಮೋದಿ ಹೇಳಿದರು. 

ಮೇಕ್‌ ಇನ್‌ ಇಂಡಿಯಾ ಕಾರ್ಯಕ್ರಮವನ್ನು ಉಲ್ಲೇಖೀಸಿದ ಪ್ರಧಾನಿ ಮೋದಿ, ವಿದ್ಯುನ್ಮಾನ ಉತ್ಪಾದನೆ ಹೂಡಿಕೆಯಲ್ಲಿ ಭಾರೀ ಸಾಧನೆಯನ್ನು ಮಾಡಲಾಗಿದೆ. ಅಂತೆಯೇ ಕೃಷಿ, ಮೊಬೈಲ್‌ ಬ್ಯಾಂಕಿಂಗ್‌, ದೂರ ಸಂಪರ್ಕ ಸಾಂದ್ರತೆ, ಮಹಿಳಾ ಸಶಕ್ತೀಕರಣ, ಮೇಕ್‌ ಇನ್‌ ಇಂಡಿಯಾ, ಪ್ರವಾಸೋದ್ಯಮ, ವಿದ್ಯುದೀಕರಣ, ಸೌರಶಕ್ತಿ ಮತ್ತು ಎಲ್‌ಇಡಿ bulb ವಿತರಣೆಯಲ್ಲಿ ಅದ್ಭುತ ಪ್ರಗತಿ, ಬೆಳವಣಿಗೆಯನ್ನು ಸಾಧಿಸಲಾಗಿದೆ ಎಂದು ಮೋದಿ ಹೇಳಿದರು.