ಸ್ಪರ್ಧಾ ಆಯೋಗದಿಂದ ಬಿಸಿಸಿಐಗೆ 54 ಕೋಟಿ ರೂ. ದಂಡ!

ನವದೆಹಲಿ: ಐಪಿಎಲ್‌ನ ಮಾಧ್ಯಮ ಹಕ್ಕು ಹಂಚಿಕೆ ಸಂದರ್ಭದಲ್ಲಿ ಬಿಸಿಸಿಐ ಸ್ಪರ್ಧಾತ್ಮಕವಾಗಿ ನಡೆದುಕೊಂಡಿಲ್ಲ ಎಂದು ತೀರ್ಪು ನೀಡಿರುವ ಭಾರತ ಸ್ಪರ್ಧಾ ಆಯೋಗ (ಕಾಂಪಿಟಿಷನ್‌ ಕಮಿಷನ್‌ ಆಫ್ ಇಂಡಿಯಾ) 52.24 ಕೋಟಿ ರೂ. ದಂಡ ಹೇರಿದೆ. ಗಮನಾರ್ಹ ಸಂಗತಿಯೆಂದರೆ 2013, 2015ರಲ್ಲೂ ಸಿಸಿಐ ಹೀಗೆ ದಂಡ ಹೇರಿದ್ದರೂ ಅದನ್ನು ಸ್ವತಃ ಸ್ಪರ್ಧಾ ಆಯೋಗದ ನ್ಯಾಯ ಮಂಡಳಿ ರದ್ದು ಪಡಿಸಿತ್ತು.

ಐಪಿಎಲ್‌ನ ಮಾಧ್ಯಮ ಹಕ್ಕುಗಳನ್ನು ಹಂಚುವಾಗ ಬಿಸಿಸಿಐ ಸ್ಪರ್ಧಾತ್ಮಕವಾಗಿ ನಡೆದುಕೊಂಡಿಲ್ಲ ಎನ್ನುವುದು ಸ್ಪರ್ಧಾ ಆಯೋಗದ 44 ಪುಟಗಳ ತೀರ್ಪಿನ ಸಾರಾಂಶ. ಬಿಸಿಸಿಐ ತನ್ನ ಮಾಧ್ಯಮ ಹಕ್ಕು ನಿಯಮದ ವಿಧಿಯಲ್ಲಿ ಬಿಡ್‌ ಸಲ್ಲಿಕೆದಾರರನ್ನು ರಕ್ಷಿಸಲೆಂದೇ ಕೆಲವು ನೀತಿ ಮಾಡಿಕೊಂಡಿದೆ. ಅಲ್ಲದೇ ದೇಶೀಯ ಕ್ರಿಕೆಟ್‌ನಲ್ಲಿ ಐಪಿಎಲ್‌ನಂತೆ ಮತ್ತೂಂದು ಕೂಟವನ್ನು ಶುರು ಮಾಡಲೂ ಬಿಸಿಸಿಐ ಅವಕಾಶ ನೀಡಿಲ್ಲ ಎಂದು ಸ್ಪರ್ಧಾ ಆಯೋಗ ಅಭಿಪ್ರಾಯಪಟ್ಟಿದೆ.

ಕಳೆದ ಮೂರು ವರ್ಷಗಳಲ್ಲಿನ ಬಿಸಿಸಿಐ ಸರಾಸರಿ ಆದಾಯ 1164.7 ಕೋಟಿ ರೂ.ಗಳಿವೆ. ಇದರ ಶೇ.4.4ರಷ್ಟನ್ನು ಮಾತ್ರ ದಂಡವಾಗಿ ಹೇರಲಾಗಿದೆ. ಆ ಮೊತ್ತ 54 ಕೋಟಿ ರೂ.ಗಳಾಗಿದೆ. ಈ ಹಿಂದೆ ಎರಡು ಬಾರಿ ಈ ಆದೇಶ ರದ್ದಾಗಿರುವುದರಿಂದ ಈ ಬಾರಿ ಹೆಚ್ಚಿನ ಮುತುವರ್ಜಿಯಿಂದ ಸಿಸಿಐ ತನಿಖೆ ಮಾಡಿ ತೀರ್ಪು ನೀಡಿದೆ.