ಬಾಲವನ ಮಕ್ಕಳ ಬೇಸಗೆ ಶಿಬಿರ ಸಮಾಪನ

ಪರ್ಲಡ್ಕ : ಬೌದ್ಧಿಕ ಮತ್ತು ಭೌತಿಕ ಬೆಳವಣಿಗೆಯಾಗುವ ಬೇಸಗೆ ಶಿಬಿರಗಳಲ್ಲಿ ಮಕ್ಕಳನ್ನು ತೊಡಗಿಸಿಕೊಳ್ಳುವಂತೆ ಪ್ರೇರಣೆ ನೀಡಬೇಕು ಎಂದು ರಂಗ ಕಲಾವಿದ ಹಾಗೂ ಪತ್ರಕರ್ತ ಸಂಶುದ್ದೀನ್‌ ಸಂಪ್ಯ ಹೇಳಿದರು. ಪರ್ಲಡ್ಕ ಡಾ| ಶಿವರಾಮ ಕಾರಂತರ ಬಾಲವನದಲ್ಲಿ ಮೇ 22ರಿಂದ 5ರಿಂದ 16 ವರ್ಷದೊಳಗಿನ ಮಕ್ಕಳಿಗೆ ಆಯೋಜಿಸಲಾದ ಉಚಿತ ಬೇಸಗೆ ಶಿಬಿರದ ಸಮಾರೋಪ ಸಮಾರಂಭದಲ್ಲಿ ಮುಖ್ಯ ಅತಿಥಿಯಾಗಿ ಮಾತನಾಡಿದರು.

ಶಿಬಿರದಲ್ಲಿ ಎಷ್ಟು ಮಕ್ಕಳಿದ್ದಾರೆ ಎಂಬ ಸಂಖ್ಯೆ ಮುಖ್ಯವಲ್ಲ. ಎಷ್ಟು ಮಕ್ಕಳು ಶಿಬಿರದಲ್ಲಿ ಅರಿವು ಪಡೆದುಕೊಂಡಿದ್ದಾರೆ ಎಂಬುದು ಮುಖ್ಯವಾಗುತ್ತದೆ. ಹಿಂದೆ ಸೀಮಿತ ಶಿಬಿರಗಳಿದ್ದವು. ಆದರೆ ಇಂದು ಮಕ್ಕಳ ವ್ಯಕ್ತಿತ್ವ ವಿಕಸನಕ್ಕೆ ಪೂರಕವಾಗುವ ಹಲವಾರು ಶಿಬಿರಗಳು ನಡೆಯುತ್ತಿವೆ. ಇದರಿಂದ ಮಕ್ಕಳಿಗೆ ಸಾಕಷ್ಟು ಅವಕಾಶಗಳಿವೆ. ಇದನ್ನು ಬಳಸಿಕೊಳ್ಳುವ ವಿವೇಚನೆ ಮುಖ್ಯವಾಗಿ ಮಕ್ಕಳ ಪೋಷಕರಲ್ಲಿ ಇರಬೇಕು ಎಂದರು.

ಮಕ್ಕಳಲ್ಲಿ ವಿಶಿಷ್ಟ ರೀತಿಯಲ್ಲಿ ಪ್ರತಿಭೆ, ಕೌಶಲ್ಯಗಳಿರುತ್ತವೆ. ಆದರೆ ಅವುಗಳನ್ನು ಅನಾವರಣಗೊಳಿಸಲು ಕ್ಲಪ್ತ ಸಮಯಕ್ಕೆ ವೇದಿಕೆಗಳು ಸಿಗುತ್ತಿಲ್ಲ. ಇವುಗಳನ್ನು ಅನಾವರಣಗೊಳಿಸಲು ಇಂತಹ ಶಿಬಿರಗಳು ಪೂರಕವಾಗಿವೆ. ಪಠ್ಯೇತರ ಚಟುವಟಿಕೆಗಳಲ್ಲೂ ಬೆರೆಯಲು ಮಕ್ಕಳನ್ನು ಹೆತ್ತವರು ಪ್ರೋತ್ಸಾಹಿಸಬೇಕು. ಆಗ ಮಕ್ಕಳಲ್ಲಿ ವಿಶೇಷವಾದ ಬದಲಾವಣೆ ಕಾಣಲು ಸಾಧ್ಯವಿದೆ ಎಂದು ಸಂಶುದ್ದೀನ್‌ ಅಭಿಪ್ರಾಯಪಟ್ಟರು.

ಡಾ| ಕಾರಂತರಿಗೆ ಗೌರವ
ಮುಖ್ಯ ಅತಿಥಿ ಪತ್ರಕರ್ತ ಮೌನೇಶ್‌ ವಿಶ್ವಕರ್ಮ ಮಾತನಾಡಿ, ಬಾಲವನದಲ್ಲಿ ಶಿಬಿರ ನಡೆಸುವುದು ಎಂದರೆ ಡಾ| ಶಿವರಾಮ ಕಾರಂತರಿಗೆ ನಾವು ಕೊಡುವ ಅಪೂರ್ವ ಗೌರವ. ಇಲ್ಲಿ ಯಾವ ಕಾರ್ಯಕ್ರಮಗಳಿದ್ದರೂ, ಹಿಂದೆ ಮುಂದೆ ನೋಡದೆ ಬರುತ್ತೇವೆ. ಈ ಪರಿಸರವೇ ಮಕ್ಕಳನ್ನು ಕ್ರೀಯಾಶೀಲರನ್ನಾಗಿ ಮಾಡುವ ಒಂದು ವಿಶಿಷ್ಟ ಕಲಾತಾಣ. ಈ ಶಿಬಿರ ಮಕ್ಕಳಲ್ಲಿ ಭವಿಷ್ಯವನ್ನು ರೂಪಿಸಲು ಸಹಕಾರಿಯಾಗಲಿ ಎಂದು ಆಶಯ ವ್ಯಕ್ತಪಡಿಸಿದರು.

ಪುತ್ತೂರು ಅಸಹಾಯಕರ ಸೇವಾ ಟ್ರಸ್ಟ್‌ನ ಅಧ್ಯಕ್ಷೆ ನಯನಾ ರೈ, ಯೋಗ ತರಬೇತುದಾರ ಸುಬ್ರಹ್ಮಣ್ಯಂ ಭಟ್‌, ಸಂಪನ್ಮೂಲ ವ್ಯಕ್ತಿಗಳಾದ ಪದ್ಮನಾಭ, ರೋಹಿಣಿ ರಾಘವ ಆಚಾರ್ಯ ಶಿಬಿರದ ಕುರಿತು ಅನಿಸಿಕೆ ವ್ಯಕ್ತಪಡಿಸಿದರು. ಶಿಶು ಅಭಿವೃದ್ಧಿ ಅಧಿಕಾರಿ ಶಾಂತಿ ಟಿ. ಹೆಗ್ಡೆ ಸ್ವಾಗತಿಸಿದರು. ಮೇಲ್ವಿಚಾರಕಿ ಆರತಿ ವಂದಿಸಿದರು. ಮೇಲ್ವಿಚಾರಕಿ ಜಲಜಾಕ್ಷಿ ನಿರೂಪಿಸಿದರು. ಮಕ್ಕಳು ತಯಾರಿಸಿದ ಕುಶಲತೆಯನ್ನು ಪ್ರದರ್ಶನಕ್ಕೆ ಇಡಲಾಗಿತ್ತು.

ಪುಣ್ಯ ಮಣ್ಣು 
ಅಧ್ಯಕ್ಷತೆ ವಹಿಸಿ ಮಾತನಾಡಿದ ಡಾ| ಶಿವರಾಮ ಕಾರಂತ ಬಾಲವನ ಸಮಿತಿಯ ಸದಸ್ಯೆ ಗೌರಿ ಬನ್ನೂರು, ಡಾ| ಶಿವರಾಮ ಕಾರಂತರ ಈ ಪುಣ್ಯ ಮಣ್ಣಿನಲ್ಲಿ ಮಕ್ಕಳು ಕಲಾವಿದರಾಗಿ ರೂಪುಗೊಳ್ಳುವುದು ಉತ್ತಮ ಬೆಳವಣಿಗೆ. ಈ ಕಾರಣದಿಂದ ಇಂತಹ ಶಿಬಿರಗಳು ಸಾರ್ಥಕತೆ ಪಡೆಯುತ್ತವೆ. ಇಲ್ಲಿ ಕಲಿತ ಕಲೆಯನ್ನು ನೀವು ಅರಳಿಸುವ ಪ್ರಯತ್ನ ಮಾಡಿದರೆ ಮುಂದೆ ನೀವು ಕೂಡಾ ಸಂಪನ್ಮೂಲ ವ್ಯಕ್ತಿಗಳಾಗಿ ರೂಪುಗೊಳ್ಳಲು ಸಾಧ್ಯವಿದೆ ಎಂದು ಮಕ್ಕಳಿಗೆ ತಿಳಿಸಿದರು.