ಹವಾಮಾನ ಬದಲಾವಣೆ ಶೃಂಗ: ಹೊಸ ಒಪ್ಪಂದವಿಲ್ಲ

ಮ್ಯಾಡ್ರಿಡ್‌: ಸ್ಪೇನ್‌ ರಾಜಧಾನಿಯಲ್ಲಿ ಎರಡು ವಾರಗಳಿಂದ ನಡೆದ ಹವಾಮಾನ ಬದಲಾವಣೆ ಕುರಿತ ಶೃಂಗವು ಯಾವುದೇ ಒಪ್ಪಂದವಿಲ್ಲದೆ ರವಿವಾರ ಮುಕ್ತಾಯವಾಗಿದೆ. ಹಿಂದೆಂದಿಗಿಂತಲೂ ದೀರ್ಘ‌ಕಾಲದ ಮಾತುಕತೆ ನಡೆದಿದ್ದರೂ, ಒಮ್ಮತದ ಮತ್ತು ದಿಟ್ಟ ನಿರ್ಧಾರ ಕೈಗೊಳ್ಳುವಲ್ಲಿ ಈ ಶೃಂಗ ವಿಫ‌ಲವಾಗಿದೆ.

ಹೆಚ್ಚುತ್ತಿರುವ ಜಾಗತಿಕ ತಾಪಮಾನ ಮತ್ತು ಇತರ ಅಂಶಗಳ ಬಗ್ಗೆ ಸಹಮತ ಏರ್ಪಡುವ ಬಗ್ಗೆ ನಿರೀಕ್ಷೆ ಹೊಂದಲಾಗಿತ್ತು. 25 ವರ್ಷ ಗಳಿಂದ ಈ ಬಗ್ಗೆ ದೀರ್ಘ‌ವಾಗಿ ಚರ್ಚೆ- ಮಾತುಕತೆಗಳು ನಡೆದಿದ್ದರೂ ನಿರೀಕ್ಷಿತ ಫ‌ಲಿತಾಂಶ ಹೊರಬಿದ್ದಿಲ್ಲ.

ವಿಶ್ವದ 200 ಸರಕಾರಿ ಮುಖ್ಯಸ್ಥರು, ವಿಶ್ವದ ಮೇಲೆ ಹಸುರುಮನೆ ಪರಿಣಾಮವನ್ನು ಕಡಿಮೆ ಮಾಡುವ ನಿಟ್ಟಿನಲ್ಲಿ ಬಡ ರಾಷ್ಟ್ರಗಳಿಗೆ ನೆರವು ನೀಡುವ ಬಗ್ಗೆ ಕರೆ ನೀಡಿ, ಹಾಲಿ ನಿಯಮಗಳನ್ನೇ ಜಾರಿಗೊಳಿಸುವ ನಿಟ್ಟಿನಲ್ಲಿ ಸಹಮತ ಹೊಂದಲು ನಿರ್ಧರಿಸಿದ್ದಾರೆ.

2015ರಲ್ಲಿ ಪ್ಯಾರಿಸ್‌ನಲ್ಲಿ ಸಹಿ ಹಾಕಲಾಗಿರುವ ಒಪ್ಪಂದದ ಪ್ರಕಾರ ತಾಪಮಾನ ಹೆಚ್ಚಾಗಲು ಅವಕಾಶ ನೀಡದಂತೆ ಕ್ರಮ ಕೈಗೊಳ್ಳಬೇಕಾಗಿತ್ತು. ಆದರೆ ಹಲವು ದೇಶಗಳಲ್ಲಿ ತಾಪ ಪ್ರಮಾಣ 3-4 ಡಿಗ್ರಿ ಸೆಲ್ಷಿಯಸ್‌ನಷ್ಟು ಹೆಚ್ಚಾಗಿದೆ. ಮುಂದಿನ ಹವಾಮಾನ ಸಮ್ಮೇಳನ ಗ್ಲಾಸ್ಗೋದಲ್ಲಿ ನಡೆಯಲಿದೆ.