ಶೌಚಾಲಯದ ಸುತ್ತಲ ಪೊದೆ ತೆರವು; ಬಂಟ್ವಾಳ ಪೇಟೆಯ ಕೊಟ್ರಮ್ಮನಗಂಡಿ

ಬಂಟ್ವಾಳ: ಸುಸಜ್ಜಿತ ಸ್ಥಿತಿಯಲ್ಲಿದ್ದರೂ ಪೊದೆಗಳಿಂದ ತುಂಬಿ ಉಪಯೋಗಿಸಲು ಆತಂಕ ಪಡಬೇಕಾದ ಸ್ಥಿತಿಯಲ್ಲಿದ್ದ ಬಂಟ್ವಾಳ ಪುರಸಭೆಯಿಂದ ನಿರ್ಮಾಣಗೊಂಡಿರುವ ಬಂಟ್ವಾಳ ಪೇಟೆಯ ಕೊಟ್ರಮ್ಮನಗಂಡಿಯ ಶೌಚಾಲಯವು ಪ್ರಸ್ತುತ ಪೊದೆಗಳ ತೆರವಿನಿಂದ ಉಪಯೋಗಕ್ಕೆ ಅನುಕೂಲವಾಗುವ ಸ್ಥಿತಿಗೆ ಬಂದಿದೆ.

ಬಂಟ್ವಾಳ ಪೇಟೆಯಲ್ಲಿರುವ ಬಡ್ಡಕಟ್ಟೆ ಹಾಗೂ ಕೊಟ್ರಮ್ಮನಗಂಡಿಯಲ್ಲಿರುವ ಶೌಚಾಲಯಗಳ ಅವ್ಯವಸ್ಥೆಯ ಕುರಿತು ಅ. 7ರಂದು “ಉದಯವಾಣಿ ಸುದಿನ’ದಲ್ಲಿ “ಬಂಟ್ವಾಳ ಪೇಟೆಗೆ ಬೇಕಿದೆ ಸುಸಜ್ಜಿತ ಶೌಚಾಲಯ; ಅವ್ಯವಸ್ಥೆಯಲ್ಲಿದೆ ಬಡ್ಡಕಟ್ಟೆ-ಕೊಟ್ರಮ್ಮನಗಂಡಿ ಶೌಚಾಲಯ’ ಎಂಬ ಶೀರ್ಷಿಕೆಯಲ್ಲಿ ಸಚಿತ್ರ ವರದಿ ಪ್ರಕಟಗೊಂಡಿತ್ತು.

ಪ್ರಸ್ತುತ ವರದಿಗೆ ಸ್ಪಂದನೆ ಎಂಬಂತೆ ಕೊಟ್ರಮ್ಮನಗಂಡಿ ನಿಲ್ದಾಣ ಹಾಗೂ ಶೌಚಾಲಯದ ಸುತ್ತಲೂ ಇದ್ದ ಪೊದೆ ತೆರವುಗೊಂಡಿದೆ. ಈ ಶೌಚಾಲಯದ ಒಂದು ಭಾಗದ ಉಪಯೋಗಕ್ಕೆ ಯೋಗ್ಯವಾಗಿದ್ದರೆ, ಮತ್ತೂಂದು ಭಾಗ ಪೊದೆಗಳಿಂದ ತುಂಬಿ ಹತ್ತಿರ ಹೋಗುವುದಕ್ಕೆ ಆತಂಕ ಪಡಬೇಕಾದ ಸ್ಥಿತಿ ಇತ್ತು.

ಇದರಲ್ಲಿ ಬಡ್ಡಕಟ್ಟೆ ಶೌಚಾಲಯವು ದುರಸ್ತಿಯಾಗಬೇಕಾದ ಅನಿವಾರ್ಯ ಇದ್ದು, ಅದರ ಕಾಮಗಾರಿಯನ್ನು ಮಳೆ ಕಡಿಮೆಯಾದ ತತ್‌ಕ್ಷಣ ನಡೆಸುವುದಾಗಿ ಎಂಜಿನಿಯರ್‌ಗೆ ಸೂಚಿಸಿದ್ದೇವೆ ಎಂದು ಪುರಸಭೆಯ ಅಧಿಕಾರಿಗಳು ತಿಳಿಸಿದ್ದರು. ಈ ಎರಡು ಶೌಚಾಲಯಗಳು ಸುಸಜ್ಜಿತ ಸ್ಥಿತಿಗೆ ಬಂದರೆ ಬಂಟ್ವಾಳ ಪೇಟೆಗೆ ನಿತ್ಯ ಆಗಮಿಸುವ ಸಾವಿರಾರು ಮಂದಿ ನಾಗರಿಕರು ಹಾಗೂ ಬಂಟ್ವಾಳದ ವರ್ತಕರಿಗೆ ಅನುಕೂಲವಾಗಲಿದೆ.