I.N.D.I.A ಒಕ್ಕೂಟ ಗೆದ್ದ ಬಳಿಕ ಮಂದಿರ ಶುದ್ಧೀಕರಣ: ಪಟೋಲೆ

ಮುಂಬಯಿ: ಇಂಡಿಯಾ ಕೂಟ ಅಧಿಕಾರಕ್ಕೆ ಬಂದ ಬಳಿಕ ಅಯೋಧ್ಯೆಯ ರಾಮಮಂದಿರದಲ್ಲಿ ನಾಲ್ಕು ಶಂಕರಾಚಾರ್ಯರ ನೇತೃತ್ವದಲ್ಲಿ ಶುದ್ಧೀಕರಣ ನಡೆಸಲಾಗುವುದು ಎಂದು ಮಹಾರಾಷ್ಟ್ರ ಕಾಂಗ್ರೆಸ್‌ ಮುಖ್ಯಸ್ಥ ನಾನಾ ಪಟೋಲೆ ಹೇಳಿಕೆ ನೀಡಿದ್ದಾರೆ. ಜ.22 ರಂದು ನಡೆದ ರಾಮಮಂದಿರ ಉದ್ಘಾಟನ ಸಮಾರಂಭ ನಡೆದಿದ್ದು, ಮಂದಿರ ನಿರ್ಮಾಣ ಪೂರ್ಣಗೊಂಡಿಲ್ಲ ಎಂಬ ಕಾರಣ ನೀಡಿ ಕಾಂಗ್ರೆಸ್‌ ನಾಯಕರು ಕಾರ್ಯಕ್ರಮಕ್ಕೆ ಭಾಗಿಯಾಗಿರಲಿಲ್ಲ. ಇದೀಗ ಕಾಂಗ್ರೆಸ್‌ ಮುಖಂಡ ಈ ರೀತಿ ಹೇಳಿಕೆ ನೀಡಿರುವುದು ಕುತೂಹಲ ಕೆರಳಿಸಿದೆ.

“ಅಲ್ಲಿ ಕೇವಲ ರಾಮದೇವರ ವಿಗ್ರಹವಲ್ಲ, ಬಾಲಕನ ಸ್ವರೂಪದ ರಾಮನಿರುವುದು. ಪ್ರಧಾನಿ ಮೋದಿ ಮಂದಿರ ನಿರ್ಮಾಣದಲ್ಲಿ ಶಿಷ್ಟಾಚಾರ ಮೀರಿದ್ದಾರೆ. ಆ ತಪ್ಪನ್ನು ನಾವು ಧಾರ್ಮಿಕವಾಗಿ ಸರಿಪಡಿಸಲಿದ್ದೇವೆ. ದೇವಾಲಯದಲ್ಲಿ ರಾಮನಿಗೆ ದರ್ಬಾರ್‌ ನಿರ್ಮಿಸಲಾಗುವುದು’ ಎಂದು ನಾನಾ ಪಟೋಲೆ ಹೇಳಿದರು. “ಇದನ್ನು ನಾನು ಹೇಳಿಲ್ಲ. ಶಂಕರಾಚಾರ್ಯರು ಸ್ಥಾಪಿಸಿದ 4 ಪೀಠಗಳ ಸ್ವಾಮೀಜಿಗಳು ವ್ಯಕ್ತಪಡಿಸಿದ ಅಭಿಪ್ರಾಯದ ಆಧಾರದಲ್ಲಿ ಈ ಮಾತುಗಳನ್ನಾಡುತ್ತಿದ್ದೇನೆ ಎಂದು ಪಟೋಲೆ ಹೇಳಿದ್ದಾರೆ.