ಪುರುಷರ ಕ್ರಿಕೆಟ್‌ಗೆ ವನಿತಾ ಅಂಪಾಯರ್‌

ಸಿಡ್ನಿ: ಕ್ಲೇರ್‌ ಪೊಲೊಸಕ್‌ ಕ್ರಿಕೆಟ್‌ ಆಡಿದವರಲ್ಲ, ಹಲವು ಬಾರಿ ಅಂಪಾರ್‌ ಪರೀಕ್ಷೆಯಲ್ಲಿ ಅನುತೀರ್ಣವಾದವರು. ಆದರೂ ಆಸ್ಟ್ರೇಲಿಯದಲ್ಲಿ ಪುರುಷರ ಏಕದಿನ ಕ್ರಿಕೆಟ್‌ ಪಂದ್ಯವೊಂದಕ್ಕೆ ಅಂಪಾಯರ್‌ ಆಗಿ ಇತಿಹಾಸ ನಿರ್ಮಿಸಿದ್ದಾರೆ.

ಆಸ್ಟ್ರೇಲಿಯ ಕ್ರಿಕೆಟ್‌ ಮಂಡಳಿಯ ಮಾನ್ಯತೆಯ ಅಡಿಯಲ್ಲಿ ನಡೆದ ಪಂದ್ಯವೊಂದರಲ್ಲಿ ಪೊಲೊಸಕ್‌ ಪುರುಷರ ಕ್ರಿಕೆಟ್‌ಗೆ ಅಂಪಾಯರಿಂಗ್‌ ಮಾಡಿದ ಮೊದಲ ಮಹಿಳೆ ಎಂಬ ಖ್ಯಾತಿ ಪಡೆದಿದ್ದಾರೆ. ನ್ಯೂ ಸೌತ್‌ ವೇಲ್ಸ್‌ ಮತ್ತು ಆಸ್ಟ್ರೇಲಿಯ ಇಲೆವೆನ್‌ ನಡುವಿನ ಏಕದಿನ ಪಂದ್ಯದಲ್ಲಿ ಪೊಲೊಸಕ್‌ ಅಂಪಾಯರ್‌ ಆಗಿ ಕಾರ್ಯ ನಿರ್ವಹಿಸಿದ್ದಾರೆ. ಈ ಬಗ್ಗೆ ಪ್ರತಿಕ್ರಿಯಿಸಿದ ಪೊಲೊಸಕ್‌, “ನಾನು ಕ್ರಿಕೆಟ್‌ ಆಡಿದವಳಲ್ಲ. ಹಲವು ಬಾರಿ ಅಂಪಾಯರ್‌ ಪರೀಕ್ಷೆಯಲ್ಲಿ ಅನುತೀರ್ಣಳಾಗಿದ್ದೆ. ಆದರೆ ನನ್ನ ತಂದೆ ಮತ್ತೆ ಪರೀಕ್ಷೆ ಬರೆಯುವಂತೆ ಪ್ರೋತ್ಸಾಹಿಸಿದರು. ಹೀಗಾಗಿ ಈ ಕ್ಷೇತ್ರಕ್ಕೆ ಬರಲು ಸಾಧ್ಯವಾಯಿತು’ ಎಂದು ಸಂತಸ ವ್ಯಕ್ತಪಡಿಸಿದ್ದಾರೆ.