‘ಏರ್‌ ಆ್ಯಂಬುಲೆನ್ಸ್‌’ನಲ್ಲಿ ಚೋಕ್ಸಿ ಶಿಫ್ಟ್: ಇ.ಡಿ.

ಹೊಸದಿಲ್ಲಿ: ಅನಾರೋಗ್ಯದ ಕಾರಣ ನೀಡಿ, ಭಾರತಕ್ಕೆ ಹಿಂದಿರುಗಲು ನಿರಾಕರಿಸುತ್ತಿರುವ ಪಂಜಾಬ್‌ ನ್ಯಾಷನಲ್ ಬ್ಯಾಂಕ್‌ ಹಗರಣದ ಸಹ ಆರೋಪಿ ಮೆಹುಲ್ ಚೋಕ್ಸಿಯನ್ನು ಭಾರತಕ್ಕೆ ಕಳುಹಿಸಿದರೆ ಆತನಿಗೆ ಉತ್ಕೃಷ್ಟ ಮಟ್ಟದ ವೈದ್ಯಕೀಯ ಚಿಕಿತ್ಸೆ ನೀಡಲಾಗುತ್ತದೆ. ಆತನನ್ನು ಏರ್‌ ಆ್ಯಂಬುಲೆನ್ಸ್‌ ಮೂಲಕ ಭಾರತಕ್ಕೆ ಕರೆತರುವ ವ್ಯವಸ್ಥೆ ಮಾಡಲಾಗುತ್ತದೆ ಎಂದು ಜಾರಿ ನಿರ್ದೇಶನಾಲಯ (ಇ.ಡಿ.), ಆಂಟಿಗುವಾದಲ್ಲಿನ ಹೈಕೋರ್ಟ್‌ಗೆ ಸಲ್ಲಿಸಿರುವ ಪ್ರತಿವಾದದಲ್ಲಿ ಉಲ್ಲೇಖೀಸಿದೆ.

‘ಅನಾರೋಗ್ಯದ ಹೆಸರಿನಲ್ಲಿ ಚೋಕ್ಸಿ ಡ್ರಾಮಾ ಆಡುತ್ತಿದ್ದಾರೆಂದೂ ಆರೋಪಿಸಿರುವ ಇ.ಡಿ., ಹಗರಣದ ತನಿಖೆ ವೇಳೆ ತಮಗೆ ಸೇರಿದ 6,129 ಕೋಟಿ ರೂ. ಮೊತ್ತದ ಆಸ್ತಿಯನ್ನು ಜಪ್ತಿ ಮಾಡಿರುವುದಾಗಿ ಚೋಕ್ಸಿ ಸುಳ್ಳು ಹೇಳಿದ್ದು, ಅಸಲಿಗೆ, 2,100 ಕೋಟಿ ರೂ. ಆಸ್ತಿ ಮಾತ್ರ ಜಪ್ತಿ ಮಾಡಿಕೊಳ್ಳಲಾಗಿದೆ ಅಷ್ಟೇ ಎಂದು ದಾಖಲೆಯಲ್ಲಿ ಇ.ಡಿ. ಸ್ಪಷ್ಟಪಡಿಸಿದೆ.