ಜಟ್ಟ ಗಿರಿರಾಜ್‌ ನಿರ್ದೇಶನದಲ್ಲಿ ಚಿರಂಜೀವಿ ಸರ್ಜಾ

ನಿರ್ದೇಶಕ ಜಟ್ಟ ಗಿರಿರಾಜ್‌ “ಅಮರಾವತಿ’ ಚಿತ್ರದ ಬಳಿಕ ಮತ್ಯಾವ ಸಿನಿಮಾ ಮಾಡುತ್ತಾರೆ ಎಂಬ ಪ್ರಶ್ನೆ ಗಾಂಧಿನಗರದಲ್ಲಿ ಗಿರಕಿ ಹೊಡೆಯುತ್ತಿತ್ತು. ಸಿಕ್ಕಾಗೆಲ್ಲ ಮಾತುಕತೆ ನಡೆಯುತ್ತಿದೆ, ಇಷ್ಟರಲ್ಲೇ ವಿವರ ಕೊಡ್ತೀನಿ ಅಂತ ಅವರೂ ಹೇಳುತ್ತಿದ್ದರು. ಗಿರಿರಾಜ್‌ ಈಗ ಕಮರ್ಷಿಯಲ್‌ ಸಿನಿಮಾಗೆ ಕೈ ಹಾಕಿದ್ದಾರೆ. ಅವರ ಹೊಸ ಚಿತ್ರಕ್ಕೆ ಚಿರಂಜೀವಿ ಸರ್ಜಾ ಹೀರೋ.

ಸದ್ಯಕ್ಕೆ ಗಿರಿರಾಜ್‌ ಅವರ ಮುಂದಿನ ಚಿತ್ರದಲ್ಲಿ ಚಿರಂಜೀವಿ ಸರ್ಜಾ ಹೀರೋ ಅನ್ನುವುದಷ್ಟೇ ಪಕ್ಕಾ ಆಗಿದೆ. ಉಳಿದಂತೆ ನಾಯಕಿ, ಕಲಾವಿದರು ಹಾಗೂ ತಂತ್ರಜ್ಞರ ಆಯ್ಕೆಯಾಗಬೇಕಿದೆ. ನಿರ್ದೇಶಕ ಗಿರಿರಾಜ್‌ ಅವರು ಚಿರಂಜೀವಿ ಸರ್ಜಾ ಅವರಿಗೆ ತಮ್ಮ ಕಥೆಯ ಒನ್‌ಲೈನ್‌ ಹೇಳಿದ್ದೇ ತಡ, ಚಿರಂಜೀವಿ ಅವರು ಆ ಕಥೆಯನ್ನು ಡೆವಲಪ್‌ ಮಾಡಿ ಎಂದು ಗ್ರೀನ್‌ಸಿಗ್ನಲ್‌ ಕೊಟ್ಟಿದ್ದಾರೆ.

ಸ್ವಲ್ಪ ಆ್ಯಕ್ಷನ್‌ ಜತೆಗೆ ಪಕ್ಕಾ ಪ್ರೀತಿ ಅಂಶಗಳುಳ್ಳ ಕಥೆ ಹೆಣೆಯುತ್ತಿದ್ದಾರಂತೆ ಗಿರಿರಾಜ್‌. ಈಗಷ್ಟೇ ಕಥೆ ಕೆತ್ತನೆಯಲ್ಲಿ ಗಿರಿರಾಜ್‌ ಬಿಜಿಯಾಗಿದ್ದಾರೆ. ಈ ಮಧ್ಯೆ ಚಿರಂಜೀವಿ ಸರ್ಜಾ ರಾಮ್‌ನಾರಾಯಣ್‌ ಅಭಿನಯದ “ರಾಜ ಮಾರ್ತಾಂಡ’ ಚಿತ್ರ ಮಾಡಬೇಕಿದೆ. ಅದಾದ ಬಳಿಕ ಗಿರಿರಾಜ್‌ ಸಿನಿಮಾದಲ್ಲಿ ಚಿರಂಜೀವಿ ಸರ್ಜಾ ನಟಿಸಲಿದ್ದಾರೆ.

ಎಲ್ಲವೂ ಅಂದುಕೊಂಡಂತೆ ನಡೆದರೆ, ಡಿಸೆಂಬರ್‌ ಅಥವಾ ಜನವರಿಯಲ್ಲಿ ಈ ಚಿತ್ರಕ್ಕೆ ಚಾಲನೆ ಸಿಗಲಿದೆ ಎಂಬುದು ಗಿರಿರಾಜ್‌ ಮಾತು. ಈ ಮಧ್ಯೆ ಅವರು ಶ್ರುತಿ ಅವರಿಗೊಂದು ಕಥೆ ಹೇಳಿದ್ದಾರೆ. ಮಹಿಳಾ ಪ್ರಧಾನ ಕಥೆಯುಳ್ಳ ಚಿತ್ರವೊಂದನ್ನೂ ಮಾಡುವ ಯೋಚನೆಯಲ್ಲಿದ್ದಾರೆ. ಒಟ್ಟಾರೆ, ಈ ಎರಡು ಪ್ರಾಜೆಕ್ಟ್ಗಳಲ್ಲಿ ಯಾವುದು ಮೊದಲಾಗುತ್ತೆ ಅನ್ನೋದನ್ನು ಕಾದು ನೋಡಬೇಕಿದೆ.