LOC ಬಳಿ ಚೀನದಿಂದ ರಕ್ಷಣ ಸೌಲಭ್ಯ ನಿರ್ಮಾಣ: ಪಾಕ್‌ ಜತೆಗೂಡಿ 3 ವರ್ಷದಿಂದ ಈ ಕಾರ್ಯಾಚರಣೆ

ಕುಪ್ವಾರಾ: ಮೂರು ವರ್ಷಗಳಿಂದ ಜಮ್ಮು – ಕಾಶ್ಮೀರದ ಗಡಿ ನಿಯಂತ್ರಣ ರೇಖೆ (ಎಲ್‌ಒಸಿ) ವ್ಯಾಪ್ತಿಯಲ್ಲಿ ಪಾಕಿಸ್ಥಾನ ಜತೆಗೂಡಿ ಚೀನ ರಕ್ಷಣ ಸಾಮರ್ಥ್ಯಗಳನ್ನು ಹೆಚ್ಚಿಸುತ್ತಿದೆ ಎಂದು ತಿಳಿದು ಬಂದಿದೆ.

ಸ್ಟೀಲ್‌ ಹೆಡ್‌ ಬಂಕರ್ಸ್‌, ಮಾನವ ರಹಿತ ವೈಮಾನಿಕ ಮತ್ತು ಯುದ್ಧ ವೈಮಾನಿಕ ವಾಹನಗಳ ಸೌಲಭ್ಯಗಳನ್ನು ವಾಸ್ತವಿಕ ಗಡಿರೇಖೆಗುಂಟ ನಿರ್ಮಾಣ ಮಾಡಲಾಗುತ್ತಿದೆ ಎಂದು ಅಧಿಕಾರಿ ಗಳು ತಿಳಿಸಿದ್ದಾರೆ. ಉನ್ನತ ನಿಗೂಢ ಸಂಹವನಕ್ಕೆ ನೆರವಾಗುವ ಗೋಪುರ ಗಳನ್ನು ನಿರ್ಮಾಣ ಮಾಡಲಾಗುತ್ತಿದೆ. ಭೂಗತ ಫೈಬರ್‌ ಕೇಬಲ್‌ ಕೂಡ ಎಳೆಯಲಾಗುತ್ತಿದೆ.

ಎಲ್ಲಕ್ಕಿಂತ ಹೆಚ್ಚಾಗಿ ಚೀನ ಮೂಲದ ಜೆವೈ ಮತ್ತು ಎಚ್‌ಜಿಆರ್‌ನಂಥ ಅತ್ಯಾಧುನಿಕ ರೇಡಾರ್‌ ವ್ಯವಸ್ಥೆಯನ್ನು ಅಳವಡಿಸಲಾಗುತ್ತಿದೆ. ಇದರಿಂದ ಮಧ್ಯಮ ಮತ್ತು ಕಡಿಮೆ ಎತ್ತರದಲ್ಲಿ ಟಾರ್ಗೆಟ್‌ ಪತ್ತೆ ಹಚ್ಚುವ ಸಾಮರ್ಥ್ಯ ಹೆಚ್ಚಾಗಲಿದೆ ಎಂದಿದ್ದಾರೆ. ಎಲ್‌ಎಸಿಯ ಅನೇಕ ಕಡೆ ಎಸ್‌ಎಚ್‌-15 ಮತ್ತು 155 ಎಂಎಂ ಹೂವಿಟ್ಜರ್‌ ಗನ್‌ಗಳನ್ನು ಹೊಂದಿರುವ ಟ್ರಕ್‌ಗಳನ್ನು ನಿಯೋಜಿಸಿದೆ. ಇವೆಲ್ಲವೂ ಚೀನ ಕಂಪೆನಿಗಳ ನಿರ್ಮಾಣವಾಗಿವೆ. ಪಿಒಕೆ ಯಲ್ಲಿ ಚೀನ ತನ್ನ ಹೂಡಿಕೆಯನ್ನು ರಕ್ಷಿಸಿಕೊಳ್ಳಲು ಈ ಕ್ರಮ ಕೈಗೊಂಡಿದೆ.