ಚಾರ್ಮಾಡಿ: ಕಾಡಾನೆಗಳ ದಾಳಿ; ತೋಟ ನಾಶ

ಮುಂಡಾಜೆ: ಬೆಳ್ತಂಗಡಿ ತಾಲೂಕು ವ್ಯಾಪ್ತಿಯ ಚಾರ್ಮಾಡಿ ಗ್ರಾಮದ ಹೊಸಮಠದಲ್ಲಿ ರವಿವಾರ ಬೆಳಗಿನ ಜಾವ ನಾರಾಯಣ ಹಾಗೂ ಭಾಸ್ಕರ ಅವರ ಅಡಿಕೆ ತೋಟಗಳಿಗೆ ನುಗ್ಗಿದ ಕಾಡಾನೆಗಳು ಸುಮಾರು 40ಕ್ಕಿಂತ ಅಧಿಕ ಅಡಿಕೆ ಮರ, ಒಂದು ತೆಂಗಿನ ಮರ ಹಾಗೂ 50ಕ್ಕಿಂತ ಅಧಿಕ ಬಾಳೆಗಿಡಗಳನ್ನು ನಾಶ ಮಾಡಿವೆ.

ಆನೆಗಳ ಘೀಳಿಡುವಿಕೆ ಸದ್ದಿನಿಂದ ಎಚ್ಚೆತ್ತ ಮನೆಯವರು ಹಾಗೂ ಸ್ಥಳೀಯರು ಪಟಾಕಿ ಸಿಡಿಸಿ, ದೊಂದಿ ಬೆಳಕನ್ನು ಹಿಡಿದು ಆನೆಗಳ ಹಿಂಡನ್ನು ಕಾಡಿನತ್ತ ಅಟ್ಟಿದ್ದಾರೆ. ಮರಿಯಾನೆ ಸಹಿತ 4 ಆನೆಗಳು ಗುಂಪಿನಲ್ಲಿದ್ದವು ಎಂದು ಸ್ಥಳೀಯರು ತಿಳಿಸಿದ್ದಾರೆ. ಸ್ಥಳಕ್ಕೆ ಅರಣ್ಯ ಇಲಾಖೆಯ ಸಿಬಂದಿ ಭೇಟಿ ನೀಡಿ ನಷ್ಟದ ಮಾಹಿತಿ ಪಡೆದಿದ್ದಾರೆ.