ಗೋಮಾಂಸ ಸಾಗಾಟ ಆರೋಪ: ಐವರಿಗೆ ಥಳಿತ

ಫ‌ರಿದಾಬಾದ್‌: ಗೋ ಸಂರಕ್ಷಣೆ ಹೆಸರಿನಲ್ಲಿ ಹಿಂಸಾಚಾರ ಮಾಡುವವರ ವಿರುದ್ಧ ನಿರ್ದಾಕ್ಷಿಣ್ಯ ಕ್ರಮ ಕೈಗೊಳ್ಳುವಂತೆ ಸುಪ್ರೀಂಕೋರ್ಟ್‌ನ ಸ್ಪಷ್ಟ ಆದೇಶದ ಹೊರತಾಗಿಯೂ ದೇಶದ ಅಲ್ಲಲ್ಲಿ ಇಂಥ ಪ್ರಕರಣಗಳು ನಡೆಯುತ್ತಲೇ ಇವೆ. ಇದಕ್ಕೆ ತಾಜಾ ಉದಾಹರಣೆಯೆಂಬಂತೆ, ಹರ್ಯಾಣದ ಫ‌ರಿದಾಬಾದ್‌ನ ಬಳಿಯ ಗೋಸಿ ಎಂಬ ಹಳ್ಳಿಯ ಬಳಿ ಗೋಮಾಂಸ ಸಾಗಿಸುತ್ತಿದ್ದರೆಂದು ಆರೋಪಿಸಿ ಐವರ ಮೇಲೆ ಗೋರಕ್ಷಕರು ದಾಳಿ ನಡೆಸಿದ್ದಾರೆ. ಶುಕ್ರವಾರ (ಅ. 13) ಬೆಳಗ್ಗೆ ನಡೆದಿರುವ ಈ ಘಟನೆ ಶನಿವಾರ ಬೆಳಕಿಗೆ ಬಂದಿದೆ.  

2 ಆಟೋ ರಿûಾಗಳಲ್ಲಿ ಗೋಮಾಂಸ ಸಾಗಿಸಲಾಗುತ್ತಿದೆ ಎಂಬ ಗುಮಾನಿ ಮೇಲೆ ಈ ಆಟೋಗಳನ್ನು ಅಡ್ಡಗಟ್ಟಿದ ಗೋರಕ್ಷಕರ ಗುಂಪೊಂದು ಆಟೋ ಚಾಲಕ ಒಳಗೊಂಡಂತೆ ಐವರ ಮೇಲೆ ಹಲ್ಲೆ ಮಾಡಿದೆ. ಅಲ್ಲದೆ, ಇದನ್ನು ಕೆಲವರು ಮೊಬೈಲ್‌ಗ‌ಳ ಮೂಲಕ ವಿಡಿಯೋ ಮಾಡಿದ್ದಾರೆ. ಆದರೆ, ಪ್ರಾಥಮಿಕ ತನಿಖೆಯಲ್ಲಿ ಹಲ್ಲೆಗೊಳಗಾದವರ ಕೈಯ್ಯಲ್ಲಿ ಇದ್ದದ್ದು ಗೋಮಾಂಸ ಅಲ್ಲ, ಕೋಣದ ಮಾಂಸ ಎಂದು ತಿಳಿದುಬಂದ ಕಾರಣ, ಗೋರಕ್ಷಕರ ವಿರುದ್ಧ ಕೇಸು ದಾಖಲಿಸಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.