ಇಪಿಎಫ್ ಗೂ ತೆರಿಗೆ, ಪಿಂಚಣಿ ನಿಧಿ ಶುಲ್ಕ ಹೆಚ್ಚಳ…ಇಂದಿನಿಂದ ಏನೇನು ಬದಲಾವಣೆ?

ಇಪಿಎಫ್ ಗೂ ತೆರಿಗೆ : ಇಪಿಎಫ್(ನೌಕರರ ಭವಿಷ್ಯ ನಿಧಿ) ಖಾತೆಯಲ್ಲಿ ನೀವು ಮಾಡಿರುವ ಹೂಡಿಕೆಗೂ ಇಂದಿನಿಂದ ತೆರಿಗೆ ಪಾವತಿಸಬೇಕು. ವರ್ಷಕ್ಕೆ 2.5 ಲಕ್ಷ ರೂ.ಗಳಿಗಿಂತ ಹೆಚ್ಚು ಹಣವನ್ನು ಇಪಿಎಫ್ನಲ್ಲಿ ಹೂಡಿದ್ದರೆ, ಅದು ತೆರಿಗೆಯ ವ್ಯಾಪ್ತಿಗೆ ಬರುತ್ತದೆ.

ಟಿಡಿಎಸ್‌ ನಿಯಮ : ನೀವು ಆದಾಯ ತೆರಿಗೆ ರಿಟರ್ನ್ ಸಲ್ಲಿಸದೇ ಇದ್ದರೆ, ಬ್ಯಾಂಕ್‌ ಠೇವಣಿಗಳ ಮೇಲಿನ ಟಿಡಿಎಸ್‌ ಮೊತ್ತವು ದುಪ್ಪಟ್ಟಾಗಲಿದೆ. ಇನ್ನು, 75 ವರ್ಷ ದಾಟಿದವರು ಇಂದಿನಿಂದ ಐಟಿಆರ್‌ ಸಲ್ಲಿಕೆಯಿಂದ ವಿನಾಯಿತಿ ಪಡೆಯುತ್ತಾರೆ.

ಎಲ್ಲವೂ ತುಟ್ಟಿ : ಕಾರು-ಬೈಕು ಸೇರಿದಂತೆ ವಾಹನ ಗಳು, ಟಿವಿ, ಎಸಿ, ರೆಫ್ರಿಜರೇಟರ್‌, ಮದ್ಯ ಸಹಿತ ಅನೇಕ ಸರಕುಗಳು ದುಬಾರಿಯಾಗಲಿವೆ.

ಚೆಕ್‌ ಬುಕ್‌-ಪಾಸ್‌ ಬುಕ್‌ ಬದಲಾವಣೆ :

ದೇನಾ ಬ್ಯಾಂಕ್‌, ವಿಜಯಾ, ಕಾರ್ಪೊರೇಷನ್‌, ಆಂಧ್ರ ಬ್ಯಾಂಕ್‌, ಓರಿಯಂಟಲ್‌ ಬ್ಯಾಂಕ್‌ ಆಫ್ ಕಾಮರ್ಸ್‌, ಯುಬಿಐ ಮತ್ತು ಅಲಹಾಬಾದ್‌ ಬ್ಯಾಂಕ್‌ಗಳು ವಿಲೀನಗೊಂಡಿರುವ ಕಾರಣ ಇವುಗಳ ಚೆಕ್‌ ಬುಕ್‌ ಮತ್ತು ಪಾಸ್‌ ಬುಕ್‌ಗಳು ಇಂದಿನಿಂದ ಚಾಲ್ತಿಯಲ್ಲಿರುವುದಿಲ್ಲ.

ವಿಮಾನ  ಪ್ರಯಾಣ ದುಬಾರಿ :

ವಾಯು ಭದ್ರತ ಶುಲ್ಕ ವನ್ನು (ಎಎಸ್‌ಎಫ್) ಡಿಜಿಸಿಎ ಹೆಚ್ಚಳ ಮಾಡಿರುವ ಕಾರಣ ಎ.1ರಿಂದ ವಿಮಾನ ಪ್ರಯಾಣ ದುಬಾರಿಯಾಗಲಿದೆ. ದೇಶೀಯ ಪ್ರಯಾಣಿಕರಿಗೆ 40 ರೂ.ಗಳಷ್ಟು, ಅಂತಾರಾಷ್ಟ್ರೀಯ ಪ್ರಯಾಣಿಕರಿಗೆ 114.38 ರೂ.ಗಳಷ್ಟು ಹೆಚ್ಚುವರಿ ಶುಲ್ಕ ವಿಧಿಸಲಾಗುತ್ತದೆ.

ಶುಲ್ಕ ಹೆಚ್ಚಳ :

ನೀವು ಪಿಂಚಣಿ ನಿಧಿಯಲ್ಲಿ ಹೂಡಿಕೆ ಮಾಡಿದ್ದೀರಾ? ಹಾಗಿದ್ದರೆ ಇವತ್ತಿನಿಂದ ಪೆನÒನ್‌ ಫ‌ಂಡ್‌ ಮ್ಯಾನೇಜರ್‌ಗಳು ಗ್ರಾಹಕರಿಗೆ ಹೆಚ್ಚಿನ ಶುಲ್ಕ ವಿಧಿಸಲಿದ್ದಾರೆ. ಹೆಚ್ಚಿನ ವಿದೇಶಿ ಬಂಡವಾಳ ಆಕರ್ಷಿಸಲೆಂದು ಪಿಂಚಣಿ ನಿಧಿ ನಿಯಂತ್ರಣ ಮತ್ತು ಅಭಿವೃದ್ಧಿ ಪ್ರಾಧಿಕಾರ ಶುಲ್ಕ ಹೆಚ್ಚಳಕ್ಕೆ ಅನುಮತಿ ನೀಡಿದೆ.

ಏರ್‌ಬ್ಯಾಗ್‌ ಕಡ್ಡಾಯ :  ಇಂದಿನಿಂದ ಕಾರುಗಳಲ್ಲಿನ ಸುರಕ್ಷತ ಮಾನದಂಡ ಬದಲಾಗಲಿದೆ. ಚಾಲಕ ಮಾತ್ರವಲ್ಲದೇ, ಆತನ ಪಕ್ಕದ ಆಸನಕ್ಕೂ ಎ.1ರಿಂದ ಏರ್‌ಬ್ಯಾಗ್‌ ಅಳವಡಿಕೆ ಕಡ್ಡಾಯಗೊಳಿಸಲಾಗಿದೆ.