ನಾಳೆ ಮಧ್ಯಾಹ್ನ ಚಂದ್ರಯಾನ-2

ನವದೆಹಲಿ: ಸೋಮವಾರ ಮಧ್ಯಾಹ್ನ 2.43 ಚಂದ್ರಯಾನ-2 ಉಡಾವಣೆಯಾಗಲಿದೆ.

ಕೆಲವು ತಾಂತ್ರಿಕ ಸಮಸ್ಯೆಗಳಿಂದಾಗಿ ಜು.15ರ ಬೆಳಗಿನ ಜಾವವೇ ನಭಕ್ಕೆ ನೆಗೆಯಬೇಕಿದ್ದ ಜಿಎಸ್‌ಎಲ್ವಿ ಎಂಕೆ 3 ರಾಕೆಟ್, ಸೋಮವಾರ ಮಧ್ಯಾಹ್ನ ಉಡಾವಣೆಗೊಳ್ಳಲಿದೆ. ಈ ರಾಕೆಟ್ ಸೆಪ್ಟೆಂಬರ್‌ 8 ರಂದು ಚಂದ್ರನ ಮೇಲೆ ಇಳಿಯಲಿದೆ.

ಇದಕ್ಕಾಗಿ ವಿವಿಧ ಹಂತಗಳಲ್ಲಿನ ಕಾಲಾವಧಿಯನ್ನು ಕಡಿಮೆ ಮಾಡಲಾಗಿದೆ. ಒಟ್ಟಾರೆ ಚಂದ್ರಯಾನದ ಅವಧಿಯನ್ನು 54 ದಿನಗಳಿಂದ 47 ದಿನಗಳಿಗೆ ಇಳಿಕೆ ಮಾಡಲಾಗಿದೆ. ಚಂದ್ರಯಾನ-2ಗಾಗಿ ಭಾನುವಾರ ಸಂಜೆ 6.43ಕ್ಕೆ ಕ್ಷಣಗಣನೆ ಆರಂಭವಾಗಲಿದೆ. ಇದೇ ವೇಳೆ ಶ್ರೀಹರಿಕೋಟಕ್ಕೆ ತೆರಳಿ ಚಂದ್ರಯಾನ ನೋಡಲು ನೋಂದಣಿ ಮಾಡಿಕೊಳ್ಳುವ ಅವಧಿ ಶನಿವಾರ ಮುಕ್ತಾಯವಾಗಿದೆ.

ಮಂಗಳಯಾನಕ್ಕೆ ಶುಭ ಕೋರಿದ ಇಸ್ರೋ!: ಚಂದ್ರಯಾನ 2 ಕ್ಕೆ ಇಸ್ರೋ ಸಿದ್ಧವಾಗುತ್ತಿರುವ ಮಧ್ಯೆಯೇ ಬಾಲಿವುಡ್‌ನ‌ ‘ಮಂಗಳಯಾನ’ಕ್ಕೂ ಶುಭ ಕೋರಿದೆ! ನಟ ಅಕ್ಷಯ ಕುಮಾರ್‌ ನಾಯಕನಟನಾಗಿರುವ ಮಂಗಳಯಾನ ಕುರಿತ ಸಿನಿಮಾ ಮಿಶನ್‌ ಮಂಗಲ್ಗೆ ಇಸ್ರೋ ಟ್ವೀಟ್ ಮೂಲಕ ಶುಭ ಕೋರಿದೆ. ಇಸ್ರೋ ತಂಡದ ಭಾವನೆಗಳು ಮತ್ತು ಬದ್ಧತೆಯನ್ನು ಮಿಶನ್‌ ಮಂಗಲ್ ಟ್ರೇಲರ್‌ ಪ್ರದರ್ಶಿಸಿದೆ ಎಂದೂ ಇಸ್ರೋ ಮೆಚ್ಚುಗೆ ಸೂಚಿಸಿದೆ. ಇಸ್ರೋದ ಈ ಟ್ವೀಟ್‌ಗೆ ಅಕ್ಷಯ್‌ ಕುಮಾರ್‌ ಧನ್ಯವಾದ ತಿಳಿಸಿದ್ದಾರೆ.