ಈ ಕೋವಿಡ್ ಇನ್ನು ಮುಂದೆ ಪ್ರತೀ ವರ್ಷದ ಅತಿಥಿಯಾಗಬಹುದು, ಎಚ್ಚರ!

ಈಗ ವಿಶ್ವನ್ನೇ ಕಾಡುತ್ತಿರುವ ಕೋವಿಡ್ 19 ವೈರಸ್‌ ಸೋಂಕು ನಾವು ಆಚರಿಸುವ ಹಬ್ಬಗಳಂತೆ ಪ್ರತಿ ವರ್ಷವೂ ಬರಬಹುದು! ಈ ಮಾರಣಾಂತಿಕ ವೈರಾಣು ಜನ್ಮತಳೆದ ಚೀನದ ತಜ್ಞರು ಈ ರೀತಿ ಅನುಮಾನ ವ್ಯಕ್ತಪಡಿಸಿದ್ದಾರೆ.

ಈ ವೈರಸ್‌ ಬುಡ ಸಮೇತ ನಿರ್ಮೂಲನೆಯಾಗುವ ಯಾವುದೇ ಲಕ್ಷಣಗಳಿಲ್ಲ. ಹೀಗಾಗಿ ಪ್ರತೀ ವರ್ಷ ಕಾಣಿಸಿಕೊಳ್ಳುವ ಮಲೇರಿಯಾ, ಡೆಂಗ್ಯೂ ರೀತಿಯೇ ಕೋವಿಡ್ ಕೂಡ ಸಾಂಕ್ರಾಮಿಕ ಸೋಂಕಾಗಿ ಮರುಕಳಿಸುತ್ತಿರಲೇಬಹುದು.

ಹಾಗೆಯೇ, ಯಾವುದೇ ಲಕ್ಷಣಗಳನ್ನು ಹೊರ ಹಾಕದೆ ವೈರಸ್‌ ವ್ಯಕ್ತಿಯ ದೇಹದಲ್ಲಿ ಅಡಗಿದ್ದರೆ, ಆ ವ್ಯಕ್ತಿ ತನಗೆ ಅರಿವಿಲ್ಲದೆ ಅದನ್ನು ಇತರರಿಗೂ ಪಸರಿಸುವ ಸಾಧ್ಯತೆ ಹೆಚ್ಚಿರುವ ಕಾರಣ ಸೋಂಕು ಹರಡುವುದನ್ನು ತಡೆಗಟ್ಟುವುದು ಕೂಡ ಕಷ್ಟ ಸಾಧ್ಯ ಎಂದು ತಜ್ಞರು ಎಚ್ಚರಿಸಿದ್ದಾರೆ.

ಸಾರ್ಸ್‌ – ಕೋವ್‌-2 ವೈರಸ್‌ ಒಂದು ಸೀಸನಲ್‌ ಕಾಯಿಲೆ ಆಗಬಹುದು ಎಂದು ಜಗತ್ತಿನ ವಿವಿಧ ದೇಶಗಳ ವಿಜ್ಞಾನಿಗಳು ಅಭಿಪ್ರಾಯಪಟ್ಟಿದ್ದಾರೆ.