ಚಾಂಪಿಯನ್‌ ಬುಲ್ಸ್‌ ಗೆಲುವಿನ ಆರಂಭ

ಹೈದರಾಬಾದ್‌: ಇಲ್ಲಿನ ಗಚ್ಚಿಬೌಲಿ ಒಳ ಕ್ರೀಡಾಂಗಣದಲ್ಲಿ ಶನಿವಾರ ಆರಂಭವಾದ 7ನೇ ಆವೃತ್ತಿ ಪ್ರೊ ಕಬಡ್ಡಿ ಲೀಗ್‌ನಲ್ಲಿ ಹಾಲಿ ಚಾಂಪಿಯನ್‌ ಬೆಂಗಳೂರು ಬುಲ್ಸ್‌ ತಂಡ ಶುಭಾರಂಭ ಮಾಡಿದೆ. ದಿನದ ದ್ವಿತೀಯ ಪಂದ್ಯದಲ್ಲಿ ಅದು ಪಾಟ್ನಾ
ಪೈರೇಟ್ಸ್‌ಗೆ 34-32 ಅಂಕಗಳ ಸೋಲುಣಿಸಿದೆ.

ಮೊದಲ ಮುಖಾಮುಖೀಯಲ್ಲಿ ಆತಿಥೇಯ ತೆಲುಗು ಟೈಟಾನ್ಸ್‌ ತಂಡವನ್ನು ಯು ಮುಂಬಾ 31-25 ಅಂಕಗಳಿಂದ ಮಣಿಸಿತು.ಅಭಿಷೇಕ್‌, ನರ್ವಾಲ್‌ ಮಿಂಚು ಮುಂಬಾ ಗೆಲುವಿಗೆ ಅಭಿಷೇಕ್‌ ಸಿಂಗ್‌ ಮತ್ತು ಸಂದೀಪ್‌ ನರ್ವಾಲ್‌ ನೆರವಾದರು. ದಾಳಿಯಲ್ಲಿ ಮಿಂಚಿದ ಅಭಿಷೇಕ್‌ 16 ಬಾರಿ ಯತ್ನ ನಡೆಸಿ 10 ಅಂಕ ಗಳಿಸಿದರು. ಇನ್ನೊಂದು ಕಡೆ ರೋಹಿತ್‌ ಬಲಿಯನ್‌ ಕೂಡ ದಾಳಿಯಲ್ಲಿ ಮಿಂಚಿ 4 ಅಂಕ ಗಳಿಸಿದರು. ಇವರಿಗೆ ರಕ್ಷಣೆಯಲ್ಲಿ ಸಂದೀಪ್‌ ನರ್ವಾಲ್‌ ನೆರವಿಗೆ ನಿಂತರು. ಎದುರಾಳಿಯನ್ನು ಕೆಡವಿಕೊಳ್ಳಲು 5 ಬಾರಿ ಯತ್ನ ನಡೆಸಿ ಅದರಲ್ಲಿ 4 ಅಂಕ ಪಡೆದರು. ಇದು ಮುಂಬಾ ಗೆಲುವನ್ನು ಖಚಿತಪಡಿಸಿತು.

ಇಡೀ ಪಂದ್ಯ ಅತ್ಯಂತ ಜಿದ್ದಾಜಿದ್ದಿಯಿಂದ ಕೂಡಿತ್ತು. ಒಂದೊಂದು ಅಂಕ ಗಳಿಸಲೂ ಎರಡೂ ತಂಡಗಳು ಪರದಾಡಿದವು. ಮುಂಬಾ ತಂಡ ಸಂಘಟಿತವಾಗಿ ಆಡಿದ್ದರಿಂದ ತೆಲುಗು ಟೈಟಾನ್ಸ್‌ ಸವಾಲನ್ನು ಮೀರಿ ನಿಲ್ಲಲು ಸಾಧ್ಯವಾಯಿತು.