ಅನಿಯಂತ್ರಿತ ಹೂಡಿಕೆ ಕಾಯ್ದೆಗೆ ಕೇಂದ್ರ ಚಿಂತನೆ

ಹೊಸದಿಲ್ಲಿ: ಚೀಟಿ ವ್ಯವಹಾರ ಸಹಿತ ಹಲವಾರು ಸಣ್ಣ ಪ್ರಮಾಣದ ಹೂಡಿಕೆಗಳಲ್ಲಿ ಹಣ ಹಾಕಿದ ಸಾರ್ವಜನಿಕರು ಮೋಸ ಹೋಗುವಂಥ ಪ್ರಕರಣಗಳಿಗೆ ಕಡಿವಾಣ ಹಾಕಲು ಕೇಂದ್ರ ಸರಕಾರ ನಿರ್ಧರಿಸಿದೆ.

 ಈ ಹಿನ್ನೆಲೆಯಲ್ಲಿ, ಸದ್ಯದಲ್ಲೇ 2018ರ ಅನಿಯಂತ್ರಿತ ಹೂಡಿಕೆ ಯೋಜನೆಗಳ ಕಾಯ್ದೆಯನ್ನು ಸಂಸತ್ತಿನಲ್ಲಿ ಮಂಡಿಸಲು ತೀರ್ಮಾನಿಸಲಾಗಿದೆ. 

ಪ್ರಧಾನಿ ನರೇಂದ್ರ ಮೋದಿ ನೇತೃತ್ವದಲ್ಲಿ ನಡೆದ ಸಂಪುಟ ಸಭೆಯಲ್ಲಿ ಈ ನಿರ್ಧಾರ ಕೈಗೊಳ್ಳಲಾಗಿದೆ. ಇದಲ್ಲದೆ, ಸದ್ಯಕ್ಕಿರುವ ಚಿಟ್‌ ಫ‌ಂಡ್‌ ಕಾಯ್ದೆಗೆ ತಿದ್ದುಪಡಿ ತಂದು ಹೂಡಿಕೆದಾರರಿಗೆ ಹೆಚ್ಚಿನ ಆರ್ಥಿಕ ಸವಲತ್ತುಗಳು ಸಿಗುವ ಅನುಕೂಲ ಮಾಡಲೂ ತೀರ್ಮಾನಿಸಲಾಗಿದೆ.