ಕೇಂದ್ರ ಸರಕಾರದಿಂದಲೂ ಜಾತಿ ಗಣತಿ?

ಹೊಸದಿಲ್ಲಿ: ಇತರ ಹಿಂದುಳಿದ ವರ್ಗದ (ಒಬಿಸಿ) ಕೇಂದ್ರೀಯ ಪಟ್ಟಿಯ ಉಪ ವರ್ಗೀಕರಣದ ಬಗ್ಗೆ ಅಧ್ಯಯನ ನಡೆಸುತ್ತಿರುವ ಆಯೋಗವು ದೇಶಾದ್ಯಂತ “ಜಾತಿಗಣತಿ’ ನಡೆಸಲು ನಿರ್ಧರಿಸಿದೆ. ಸ್ವಾತಂತ್ರ್ಯ ಬಂದಾಗಿನಿಂದಲೂ ಭಾರತದಲ್ಲಿ ಜಾತಿಗಳ ಆಧಾರದ ಮೇಲೆ ಜನಸಂಖ್ಯೆಯ ಮಾಹಿತಿ ಸಂಗ್ರಹಿಸಲಾಗಿಲ್ಲ. ಹೀಗಾಗಿ ಜಾತಿವಾರು ಜನಸಂಖ್ಯೆ ಅಂದಾಜು ಮಾಡಲು ಏಜೆನ್ಸಿಯೊಂದರಿಂದ ಅಖೀಲ ಭಾರತ ಮಟ್ಟದ ಸಮೀಕ್ಷೆ ಅಗತ್ಯವಿದ್ದು, ಇದಕ್ಕೆ ಪೂರಕವಾದ ಅನುದಾನವನ್ನು ಒದಗಿಸಬೇಕು ಎಂದು ಐವರು ಸದಸ್ಯರ ಸಮಿತಿಯ ನೇತೃತ್ವ ವಹಿಸಿರುವ ನಿವೃತ್ತ
ನ್ಯಾ| ಜಿ ರೋಹಿಣಿ ಅವರು ಕೇಂದ್ರ ಸರಕಾರಕ್ಕೆ ಪತ್ರ ಬರೆದಿದ್ದಾರೆ. ಆಯೋಗದ ಬೇಡಿಕೆಯಂತೆ ಅನುದಾನ ನೀಡಿದಲ್ಲಿ  ಕೇಂದ್ರ ಸರಕಾರವೇ ಜಾತಿಗಣತಿ ನಡೆಸಿದಂತಾಗುತ್ತದೆ.

ಒಬಿಸಿಯ ಬಗ್ಗೆ ಕೇಂದ್ರದ ಬಳಿ ಇರುವ ಪಟ್ಟಿಯಲ್ಲಿ 2,600ಕ್ಕೂ ಹೆಚ್ಚು ಜಾತಿಗಳಿವೆ. ಈ ಪೈಕಿ ಬಹುತೇಕ ಜಾತಿಗಳಲ್ಲಿ ಅತ್ಯಂತ ಕಡಿಮೆ ಜನ ಸಂಖ್ಯೆಯಿದೆ ಮತ್ತು ಭೌಗೋಳಿಕವಾಗಿ ಅತ್ಯಂತ ದುರ್ಗಮ ಪ್ರದೇಶದಲ್ಲಿ ವಾಸಿಸುತ್ತಿವೆ. ಹೀಗಾಗಿ ಎಲ್ಲ ರಾಜ್ಯ ಮತ್ತು ಕೇಂದ್ರಾಡಳಿತ ಪ್ರದೇಶದಲ್ಲಿ ಸಮೀಕ್ಷೆ ನಡೆಸುವುದು ಅಗತ್ಯವಿದೆ ಎಂದು ಆಯೋಗ ಹೇಳಿದೆ. ಪ್ರಾಥಮಿಕ ಹಂತದಲ್ಲಿ 10 ಲಕ್ಷ ಕುಟುಂಬಗಳ ಸಮೀಕ್ಷೆ ನಡೆಸಲು ಯೋಜಿಸ ಲಾಗಿದೆ. ಈ ಸಮೀಕ್ಷೆಯು ಜಾತಿಯ ವಿವರದ ಜತೆಗೆ ಶಿಕ್ಷಣದ ಮಟ್ಟ ಮತ್ತು ಉದ್ಯೋಗ ಸ್ಥಿತಿಗತಿಯ ಮಾಹಿತಿಯನ್ನೂ ಒದಗಿಸಲಿದೆ. ಈ ಸಮೀಕ್ಷೆಗೆ 200 ಕೋಟಿ ರೂ. ವೆಚ್ಚವಾಗಬಹುದು ಎಂದು ನ್ಯಾ| ರೋಹಿಣಿ ಪತ್ರ ದಲ್ಲಿ ವಿವರಿಸಿದ್ದಾರೆ. ರಾಜ್ಯ ಸರಕಾರಗಳು, ಇತರ ಹಿಂದುಳಿದ ವರ್ಗಗಳ ಆಯೋಗದ ಸದಸ್ಯರು ಸಹಿತ ಹಲ ವಾರು ಮಂದಿಯ ಜತೆ ಈ ಸಮಿತಿ ಈಗಾಗಲೇ ಸಮಾಲೋಚನೆ ನಡೆಸಿದೆ. ಇದರ ಜತೆಗೆ ಒಬಿಸಿ ವಿದ್ಯಾರ್ಥಿಗಳು ಪ್ರವೇಶ ಪಡೆದ ಶಿಕ್ಷಣ ಸಂಸ್ಥೆಗಳ ಮಾಹಿತಿ, ಕೇಂದ್ರ ಸರಕಾರಿ ಸ್ವಾಮ್ಯದ ಸಂಸ್ಥೆಗಳು, ಸಾರ್ವಜನಿಕ ಕ್ಷೇತ್ರದ ಬ್ಯಾಂಕ್‌ಗಳಿಂದ ತತ್‌ ಸಂಬಂಧಿ ವಿವರಗಳನ್ನು ಪಡೆದುಕೊಂಡಿದೆ. 

ಕರ್ನಾಟಕದಲ್ಲಿ ಧೂಳು ತಿನ್ನುತ್ತಿದೆ ವರದಿ!
ಹಿಂದಿನ ಸಿದ್ದರಾಮಯ್ಯ ಸರಕಾರದ ಅವಧಿಯಲ್ಲಿ ಕರ್ನಾಟಕದಲ್ಲೂ ಜಾತಿಗಣತಿ ನಡೆಸಲಾಗಿತ್ತು. ಇದುವರೆಗೂ ಈ ಜಾತಿ ಗಣತಿಯ ವರದಿ ಬಿಡುಗಡೆಯಾಗಿಲ್ಲ. 150 ಕೋಟಿ ರೂ.ಗಳಿಗೂ ಹೆಚ್ಚು ವೆಚ್ಚ ಮಾಡಿ ಈ ಜಾತಿಗಣತಿ ಸಿದ್ಧ ಮಾಡಲಾಗಿದೆ. ಆದರೆ ಜಾತಿಗಣತಿ ಯನ್ನು ತೀವ್ರವಾಗಿ ವಿರೋಧಿಸಿದ್ದ ಎಚ್‌.ಡಿ. ಕುಮಾರಸ್ವಾಮಿ ಅವರು, ವರದಿ ಬಿಡುಗಡೆಗೆ ಆಸಕ್ತಿ ತೋರುತ್ತಿಲ್ಲ ಎಂದು ಹೇಳಲಾಗುತ್ತಿದೆ.