ಗೃಹ ಬಂಧನದಲ್ಲಿರದ ಕೋವಿಡ್-19 ಶಂಕಿತ ವ್ಯಕ್ತಿ ವಿರುದ್ಧ ಪ್ರಕರಣ ದಾಖಲು

ಬೀದರ: ದುಬೈನಿಂದ ಆಗಮಿಸಿದ್ದ ಕೋವಿಡ್-19 ಶಂಕಿತ ವ್ಯಕ್ತಿಗೆ ಗೃಹ ಬಂಧನದಲ್ಲಿರುವಂತೆ ವೈದ್ಯಾಧಿಕಾರಿಗಳು ಸೂಚಿಸಿದ್ದರೂ ಗ್ರಾಮದಲ್ಲಿ ಬೇಕಾಬಿಟ್ಟಿ ಓಡಾಡುತ್ತಿದ್ದ ಜಿಲ್ಲೆಯ ನಿರ್ಣಾ ಗ್ರಾಮದ ವ್ಯಕ್ತಿ ವಿರುದ್ಧ ಮನ್ನಾಎಖೇಳ್ಳಿ ಪೊಲೀಸ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

ಈ ವ್ಯಕ್ತಿ ಮಾ. 12ರಂದು ದುಬೈನಿಂದ ಸ್ವಗ್ರಾಮ ನೀರ್ಣಾಕ್ಕೆ ಆಗಮಿಸಿದ್ದ. ನೀರ್ಣಾ ವೈದ್ಯಾಧಿಕಾರಿ ಮನ್ನಾಎಖೇಳ್ಳಿ ಠಾಣೆಯ ಪಿಎಸ್ಐ ಗ್ರಾಮಕ್ಕೆ ಭೇಟಿ ನೀಡಿ ವ್ಯಕ್ತಿಯನ್ನು ಹೊರಗಡೆ ಓಡಾಡದೆ ಗೃಹ ಬಂಧನದಲ್ಲಿ ಇರುವಂತೆ ಮತ್ತು ಕೋವಿಡ್-19 ಸೋಂಕು ಮುಂಜಾಗೃತೆ ವಹಿಸುವಂತೆ ಸೂಚಿಸಿದ್ದರು. ಆದರೆ, ವ್ಯಕ್ತಿ ಮಾ. 22ರಂದು ಗ್ರಾಮದ ಸಾರ್ವಜನಿಕ ಸ್ಥಳದಲ್ಲಿ ಸುತ್ತಾಡಿದ್ದು, ಇದರಿಂದ ಗ್ರಾಮಸ್ಥರು ಭಯ ಭೀತರಾಗಿದ್ದರು. ಮಾಹಿತಿ ತಿಳಿದ ವೈದ್ಯಾಧಿಕಾರಿ ಗ್ರಾಮಕ್ಕೆ ಆಗಮಿಸಿ ಬ್ರಿಮ್ಸ್ ಆಸ್ಪತ್ರೆಗೆ ಕಳುಹಿಸಿದ್ದಾರೆ.

ಗೃಹ ಬಂಧನದಲ್ಲಿರದೆ ಬೇಕಾಬಿಟ್ಟಿಯಾಗಿ ಓಡಾಡಿದ ವ್ಯಕ್ತಿ ವಿರುದ್ಧ ಕಲಂ 269, 270 ಐಪಿಸಿ ಅಡಿ ಪ್ರಕರಣ ದಾಖಲು ಮಾಡಿಕೊಳ್ಳಲಾಗಿದೆ.