ಕಾರು, ಟೆಂಪೋಗೆ ಟಿಪ್ಪರ್‌ ಢಿಕ್ಕಿ

ಗುರುಪುರ: ಅತಿವೇಗದಿಂದ ಬಂದ ಟಿಪ್ಪರ್‌ ಲಾರಿಯೊಂದು ಟೆಂಪೋ ಹಾಗೂ ಕಾರಿಗೆ ಗುದ್ದಿ ಬಳಿಕ ಮಗುಚಿಬಿದ್ದ ಘಟನೆ ಗುರುಪುರ ಕುಕ್ಕುದಕಟ್ಟೆ ರಾಷ್ಟ್ರೀಯ ಹೆದ್ದಾರಿ ಬಳಿ ಸಂಭವಿಸಿದೆ.

ಗುರುಪುರದಿಂದ ಜಲ್ಲಿಹುಡಿಯನ್ನು ತುಂಬಿಸಿಕೊಂಡು ವಾಮಂಜೂರಿನತ್ತ ಸಾಗುತ್ತಿದ್ದ ಟಿಪ್ಪರ್‌, ಇಂಟರ್‌ಲಾಕ್‌ ಹೇರಿಕೊಂಡು ಎದುರಿನಿಂದ ಬರುತ್ತಿದ್ದ ಟೆಂಪೋಗೆ ಗುದ್ದಿದೆ. ಬಳಿಕ ಮುಂದೆ ಸಾಗಿ ಕಾರಿಗೆ ಢಿಕ್ಕಿ ಹೊಡೆದಿದೆ. ಈ ಸಂದರ್ಭದಲ್ಲಿ ಟಿಪ್ಪರ್‌ನ ಟಯರ್‌ ಎಂಡ್‌ ತುಂಡಾಗಿ ಮಗುಚಿಬಿದ್ದಿತು. ಟೆಂಪೋ ಹಾಗೂ ಕಾರು ಜಖಂಗೊಂಡಿದೆ. ಕಾರಿನ ಚಾಲಕ ಗಂಜಿಮಠದ ಬಾಲಕೃಷ್ಣ ಶೆಟ್ಟಿ ಅವರಿಗೆ ತರಚು ಗಾಯಗಳಾಗಿವೆ.

ಟಿಪ್ಪರ್‌ನಲ್ಲಿದ್ದ ವಾಮಂಜೂರಿನ ವ್ಯಕ್ತಿ ಹೊರಗೆ ಜಿಗಿದಿದ್ದರಿಂದ ಅಪಾಯದಿಂದ ಪಾರಾಗಿದ್ದಾರೆ. ಅಪಘಾತದಿಂದಾಗಿ ಹೆದ್ದಾರಿಯಲ್ಲಿ ಸುಮಾರು ಅರ್ಧಗಂಟೆ ಟ್ರಾಫಿಕ್‌ ಜಾಂ ಉಂಟಾಗಿತ್ತು. ಬಜಪೆ ಪೊಲೀಸರು ಧಾವಿಸಿ ಕ್ರೇನ್‌ ಮೂಲಕ ಅಪಘಾತಕ್ಕೀಡಾದ ವಾಹನಗಳನ್ನು ತೆರವುಗೊಳಿಸಿ ವಾಹನಗಳ ಸುಗಮ ಸಂಚಾರಕ್ಕೆ ಅನುವು ಮಾಡಿಕೊಟ್ಟರು.