ಮರಿ ಸಾಹೇಬ್ರಿಗೆ ಸೆಲ್ಯೂಟ್‌!

ಫೇಸ್‌ಬುಕ್‌ ದಿಗ್ಗಜ ಮಾರ್ಕ್‌ ಜುಕರ್‌ಬರ್ಗ್‌ ಮನೆಯಲ್ಲಿ ಮಗಳಿಗೆ ಸ್ನಾನ ಮಾಡಿಸೋದು, ಬಟ್ಟೆ ಹಾಕೋದು ಈ ಕೆಲಸವನ್ನೆಲ್ಲ ಮಾಡುವ ಹಾಗೆ, ಇನ್ನೊಬ್ಬ ಅಪ್ಪ ನಿಮ್ಮನ್ನು ಕಾಡುತ್ತಾನೆ. ಅದು ಕೆನಡಾ ಪ್ರಧಾನಿ ಜಸ್ಟಿನ್‌ ಟ್ರಾಡಿಯು. 

ಅವತ್ತು ಬೆಳಗ್ಗೆ ಆತ ಕಾರಿನಿಂದಿಳಿದು ಸಂಸತ್‌ ಭವನದ ಕಡೆ ಹೆಜ್ಜೆ ಹಾಕುತ್ತಿದ್ದರೆ ಎಲ್ಲರ ಮುಖದಲ್ಲೂ ಅಚ್ಚರಿಭರಿತ ಮಂದಹಾಸ. ಬಾಗಿಲಿನಲ್ಲಿದ್ದ ಸೆಕ್ಯುರಿಟಿ ಖುಷಿಯಿಂದ ಎರಡೆರಡು ಬಾರಿ ಸೆಲ್ಯೂಟ್‌ ಮಾಡಿದ. ಒಂದು ಸೆಲ್ಯೂಟ್‌ ಪ್ರಧಾನಿಗೆ. ಮತ್ತೂಂದು ಸೆಲ್ಯೂಟ್‌ ಪ್ರಧಾನಿಯ ಮಗನಿಗೆ! ಅಂದು ಸಂಸತ್‌ ಭವನದ ಕೆಲಸಗಾರರಲ್ಲೆಲ್ಲ ಏನೋ ಹೊಸ ಹುರುಪು. ಎಲ್ಲರಿಗೂ ಪ್ರಧಾನಿಯ ಜೊತೆಗೆ ಬಂದ ವಿಶೇಷ ಅತಿಥಿಯನ್ನು ಮಾತಾಡಿಸುವ, ಕೈ ಕುಲುಕುವ ತವಕ.

ಕೆಲ ದಿನಗಳ ಹಿಂದೆ ಕೆನಡಾದ ಪ್ರಧಾನಮಂತ್ರಿ ಜಸ್ಟಿನ್‌ ಟ್ರಾಡಿಯು ತನ್ನ ಕಿರಿಯ ಮಗ ಹಡ್ರಿಯನ್‌ ಅನ್ನು ತನ್ನ ಜೊತೆಗೆ ಸಂಸತ್‌ ಭವನಕ್ಕೆ ಕರೆದುಕೊಂಡಾಗ ಈ ದೃಶ್ಯ ಕಂಡಿತ್ತು. ಹಡ್ರಿಯನ್‌ ಅಪ್ಪನ ಕೈ ಹಿಡಿದು ಮುದ್ದು ಮುದ್ದಾಗಿ ಆಫೀಸಿನ ತುಂಬಾ ಓಡಾಡಿದ, ಅಪ್ಪನ ಕುರ್ಚಿಯ ಮೇಲೆ ಕುಳಿತ, ತನ್ನತ್ತ ಕೈ ಬೀಸಿದವರಿಗೆಲ್ಲ ಹಾಯ್‌ ಮಾಡಿದ. ಸಂಸತ್ತಿನಲ್ಲಿ ಅವತ್ತು ಅವನು ಆಕರ್ಷಣೆಯ ಕೇಂದ್ರಬಿಂದು. ಮಾಧ್ಯಮದವರೂ ಅವನನ್ನು ನೋಡಲು ಮುಗಿಬಿದ್ದರು. ದೇಶದ ಪ್ರಧಾನಿ ತನ್ನ ಮಗನ ಜೊತೆ ನಡೆದುಕೊಳ್ಳುವ ರೀತಿ, ಕೆಲಸದ ಒತ್ತಡದ ನಡುವೆಯೂ ಅವನೆಡೆಗೆ ನೀಡುವ ಗಮನವನ್ನು ಎಲ್ಲರೂ ಕೊಂಡಾಡಿದರು. ತಾನೊಬ್ಬ ಶ್ರೇಷ್ಠ ನಾಯಕನಷ್ಟೇ ಅಲ್ಲ, ಫ್ಯಾಮಿಲಿ ಮ್ಯಾನ್‌ ಕೂಡ ಎಂಬುದನ್ನು ಜಸ್ಟಿನ್‌ ಅವತ್ತು ಸಾಬೀತು ಪಡಿಸಿದರು.