ಎಲ್ಲ ಸೇವೆಗಳಿಗೂ 112ಕ್ಕೆ ಕರೆ ಮಾಡಿ

ಬೆಂಗಳೂರು: ಪೊಲೀಸ್‌ ಸಹಾಯವಾಣಿ (100), ಅಗ್ನಿ ಶಾಮಕ ದಳ (101), ಆ್ಯಂಬುಲೆನ್ಸ್‌ (108) ಹಾಗೂ ಇತರ ತುರ್ತು ಸೇವೆಗಳನ್ನು ಒಂದೇ ಸೂರಿನಡಿ ಒದಗಿಸುವ 112 ತುರ್ತು ಸ್ಪಂದನ ಸಹಾಯ ಕೇಂದ್ರ ಗುರುವಾರ ಲೋಕಾರ್ಪಣೆಗೊಂಡಿದೆ. ಕೇಂದ್ರ ಸರಕಾರದ ಮಹತ್ವಾಕಾಂಕ್ಷಿ ಯೋಜನೆಯಾಗಿರುವ “ಒಂದು ದೇಶ, ಒಂದೇ ತುರ್ತು ಕರೆ ಸಂಖ್ಯೆ’ ಪರಿಕಲ್ಪನೆಯಡಿ ಇದು ಅಭಿವೃದ್ಧಿಗೊಂಡಿದೆ. ಅಲ್ಲದೆ, ರಾಜ್ಯಾದ್ಯಂತ 183 ತುರ್ತು ಸ್ಪಂದನ ವಾಹನಗಳು ಕಾರ್ಯ ನಿರ್ವಹಿಸಲಿದ್ದು, ಮುಂದಿನ ದಿನಗಳಲ್ಲಿ 500ಕ್ಕೂ ಹೆಚ್ಚು ವಾಹನಗಳನ್ನು ನಿಯೋಜನೆ ಮಾಡಲಾಗುತ್ತದೆ.