ಹೊಸದಿಲ್ಲಿ: ದೇಶದ ನಾಲ್ಕು ರಾಜ್ಯಗಳ ನಾಲ್ಕು ವಿಧಾನಸಭಾ ಕ್ಷೇತ್ರಗಳಿಗೆ ಇಂದು ಉಪಚುನಾವಣೆ ನಡೆಯುತ್ತಿದೆ. ಉತ್ತರ ಪ್ರದೇಶ, ಕೇರಳ, ಛತ್ತೀಸ್ ಗಢ್ ಮತ್ತು ತ್ರಿಪುರ ರಾಜ್ಯಗಳ ತಲಾ ಒಂದು ಕ್ಷೇತ್ರಗಳಲ್ಲಿ ಮತದಾನ ಈಗಾಗಲೇ ಆರಂಭವಾಗಿದೆ.
ಉತ್ತರ ಪ್ರದೇಶದ ಹಮಿರ್ಪುರ್, ಕೇರಳದ ಪಾಲ, ಛತ್ತೀಸ್ ಗಢ್ ನ ದಂತೆವಾಡ ಮತ್ತು ತ್ರಿಪುರ ರಾಜ್ಯದ ಬಧಾರ್ ಘಾಟ್ ನಲ್ಲಿ ವಿಧಾನಸಭಾ ಉಪಚುನಾವಣೆ ನಡೆಯುತ್ತಿದೆ.
ಈ ಉಪಚುನಾವಣೆಯ ಮತ ಎಣಿಕೆ ಸಪ್ಟೆಂಬರ್ 27ರಂದು ನಡೆಯಲಿದೆ.
ಚುನಾವಣಾ ಆಯೋಗ ಮತದಾನಕ್ಕಾಗಿ ಇವಿಎಂ ಮತ್ತು ವಿವಿಪ್ಯಾಟ್ ಗಳನ್ನು ಬಳಸುತ್ತಿದೆ.
ಕೇರಳದ ಪಾಲ ಕ್ಷೇತ್ರವನ್ನು 1967ರಿಂದ ಪ್ರತಿನಿಧಿಸುತ್ತಿದ್ದ ಕೇರಳ ಕಾಂಗ್ರೆಸ್ – ಮಣಿ ಪಕ್ಷದ ಸ್ಥಾಪಕ ಕೆ ಎಂ ಮಣಿ ಕಳೆದ ಎಪ್ರಿಲ್ ನಲ್ಲಿ ನಿಧನ ಹೊಂದಿದ ಕಾರಣ ಇಲ್ಲಿ ಸ್ಥಾನ ತೆರವಾಗಿತ್ತು.
ಛತ್ತೀಸ್ ಗಢ್ ನ ದಂತೇವಾಡ ನಕ್ಸಲ್ ಚಟುವಟಿಕೆಗಳಿಗೆ ಕುಖ್ಯಾತಿ ಪಡೆದ ಕ್ಷೇತ್ರ. ಇಲ್ಲಿನ ಬಿಜೆಪಿ ನಾಯಕ ಭೀಮ ಮಾಂದೇವಿ ಎಪ್ರಿಲ್ 9ರಂದು ನಕ್ಸಲ್ ದಾಳಿಗೆ ಬಲಿಯಾದ ಕಾರಣ ಚುನಾವಣೆ ನಡೆದಿರಲಿಲ್ಲ. ಈ ದಾಳಿಯಲ್ಲಿ ಐವರು ಭದ್ರತಾ ಸಿಬ್ಬಂದಿಯೂ ಮೃತರಾಗಿದ್ದರು.
