By Election: ಕಾಂಗ್ರೆಸ್‌ನಿಂದ ಮೇಕೆದಾಟು ಕಾರ್ಯಗತ ಅಸಾಧ್ಯ: ಎಚ್‌.ಡಿ.ದೇವೇಗೌಡ

ರಾಮನಗರ: ಕಾಂಗ್ರೆಸ್‌ನಿಂದ ಮೇಕೆದಾಟು ಯೋಜನೆ ಕಾರ್ಯಗತ ಅಸಾಧ್ಯ. ನಿಖಿಲ್‌ ಕುಮಾರಸ್ವಾಮಿ ಅವರು ಗೆದ್ದರೆ ರಾಜ್ಯಸಭೆ ಮತ್ತು ಲೋಕಸಭೆ ಎರಡರಲ್ಲೂ ಹೋರಾಟ ನಡೆಸಿ ಮೇಕೆದಾಟು ಯೋಜನೆ ಜಾರಿಗೆ ಪ್ರಾಮಾಣಿಕ ಪ್ರಯತ್ನ ಮಾಡುತ್ತೇವೆ ಎಂದು ಮಾಜಿ ಪ್ರಧಾನಿ ದೇವೇಗೌಡರು ಭರವಸೆ ನೀಡಿದರು.

ಚನ್ನಪಟ್ಟಣದಲ್ಲಿ ನಿಖಿಲ್‌ ಪರವಾಗಿ 5ನೇ ದಿನವೂ ಚುನಾವಣ ಪ್ರಚಾರ ನಡೆಸಿದರು. ಐಎನ್‌ಡಿಐಎ ಮೈತ್ರಿಕೂಟದಲ್ಲಿ ಪ್ರಧಾನಿಯಾಗಬಲ್ಲ ಯಾವುದೇ ನಾಯಕರು ಇದ್ದಾರೆಯೇ, ಸ್ಟಾಲಿನ್‌, ಮಮತಾ ಯಾರು ಪ್ರಧಾನಿಯಾಗುತ್ತಾರೆ ಎಂದು ಐಎನ್‌ಡಿಐಎ ಮೈತ್ರಿಕೂಟದ ವಿರುದ್ಧ ವಾಗ್ಧಾಳಿ ನಡೆಸಿದರು. ರಾಜ್ಯದಲ್ಲಿನ ಕಾಂಗ್ರೆಸ್‌ ಸರಕಾರ ಪೂರ್ಣಾವಧಿ ಪೂರೈಸುವುದಿಲ್ಲ. ಜನರನ್ನು ಈ ಸರಕಾರ ಸುಲಿಗೆ, ಶೋಷಣೆ ಮಾಡುತ್ತಿದೆ. ಇಂಥ ಸರಕಾರ ಇರಬಾರದು ಎಂದು ವಾಗ್ಧಾಳಿ ನಡೆಸಿದರು.

ಕುಮಾರಸ್ವಾಮಿ ರೈತ ಪರವಾಗಿ ಕೆಲಸ ಮಾಡಿದ್ದಾರೆ. ರೈತರ ಅಭಿವೃದ್ಧಿಗಾಗಿ ಶ್ರಮಿಸುತ್ತಿದ್ದಾರೆ. ಇಂಥ ವ್ಯಕ್ತಿ ಮೇಲೆ 50 ಕೋಟಿ ಹಣ ಕೇಳಿದರು ಎಂದು ಸುಳ್ಳು ಮೊಕದ್ದಮೆ ದಾಖಲಿಸುತ್ತಾರೆ ಎಂದರು.

“92ನೇ ವಯಸ್ಸಿನಲ್ಲೂ ಈ ರೀತಿ ಹೋರಾಟ ಮಾಡಲು ನನಗೆ ಮಾತ್ರ ಸಾಧ್ಯ. ಎಸ್‌.ಎಂ.ಕೃಷ್ಣ, ಮನಮೋಹನ್‌ ಸಿಂಗ್‌ ಅವರಿಗೆ ನನ್ನಂತೆ ದುಡಿಯಲು ಸಾಧ್ಯವಿಲ್ಲ. ಜನತೆ ಕಣ್ಣೀರೊರೆಸಿಯೇ ನಾನು ಕೊನೆಯುಸಿರೆಳೆಯುವುದು.”  – ಎಚ್‌.ಡಿ.ದೇವೇಗೌಡ, ಮಾಜಿ ಪ್ರಧಾನಿ