ಮಜವಾದ ಅನುಭವ ತುಂಬಲಿದೆ ಬಡ್ಡಿಮಗನ್ ಲೈಫು!

ಗ್ರೀನ್ ಚಿಲ್ಲಿ ಎಂಟರ್‌ಟೈನ್ಮೆಂಟ್ ಲಾಂಛನದಲ್ಲಿ ಪವನ್ ನಿರ್ಮಾಣ ಮಾಡಿರುವ ಬಡ್ಡಿಮಗನ್ ಲೈಫು ಚಿತ್ರ ಈ ವಾರ ರಾಜ್ಯಾದ್ಯಂತ ಅದ್ದೂರಿಯಾಗಿ ಬಿಡುಗಡೆಗೊಳ್ಳುತ್ತಿದೆ. ಸಚಿನ್ ಶ್ರೀಧರ್ ಮತ್ತು ಐಶ್ವರ್ಯಾ ರಾವ್ ನಾಯಕ ನಾಯಕಿಯರಾಗಿ ನಟಿಸಿರುವ ಈ ಚಿತ್ರ ಹಳ್ಳಿಗಾಡಿನ ಜೀವನದಲ್ಲಿ ಹಾಸು ಹೊಕ್ಕಾಗಿರುವಂಥಾ ಸೊಗಸಾದ ಕಥೆಯೊಂದನ್ನು ಒಳಗೊಂಡಿದೆ ಎಂಬ ವಿಚಾರ ಈಗಾಗಲೇ ಪಕ್ಕಾ ಆಗಿದೆ. ಏನ್ ಚಂದಾನೋ ತಕ್ಕೋ ಎಂಬ ಹಾಡಿನ ಮೂಲಕವೇ ಮುನ್ನೆಲೆಗೆ ಬಂದಿದ್ದ ಈ ಚಿತ್ರ ಮೈಸೂರು ಭಾಗದ ಕಾಲ್ಪನಿಕ ಹಳ್ಳಿಯೊಂದರಲ್ಲಿ ನಡೆಯುವ ಮಜವಾದ ಕಥೆಯನ್ನೊಳಗೊಂಡಿದೆ.

ಪವನ್ ಮತ್ತು ಪ್ರಸಾದ್ ನಿರ್ದೇಶನದಲ್ಲಿ ಮೂಡಿ ಬಂದಿರೋ ಈ ಚಿತ್ರ ಮನೋರಂಜನೆಯನ್ನೇ ಮೂಲ ಧ್ಯೇಯವಾಗಿಸಿಕೊಂಡು ರೂಪುಗೊಂಡಿದೆ. ಆರಂಭದಿಂದ ಕಡೆಯವರೆಗೂ ಭರ್ಜರಿ ಮನರಂಜನೆ ನೀಡುವಂಥಾ ಕಂಟೆಂಟಿನೊಂದಿಗೇ ಬಡ್ಡಿಮಗನ್ ಲೈಫನ್ನು ಚಿತ್ರೀಕರಿಸಲಾಗಿದೆ. ಇತ್ತೀಚೆಗಷ್ಟೇ ಬಿಡುಗಡೆಯಾಗಿರೋ ಟ್ರೇಲರ್‌ನೊಂದಿಗೆ ಈ ಚಿತ್ರ ಎಲ್ಲ ವರ್ಗಗಳ ಪ್ರೇಕ್ಷಕರನ್ನೂ ಬಹುವಾಗಿಯೇ ಸೆಳೆದುಕೊಂಡಿದೆ. ಪ್ರೇಕ್ಷಕ ವಲಯದಲ್ಲಿ ಯಾವುದೇ ಸಿನಿಮಾ ಇದರಲ್ಲೇನೋ ಇದೆ ಎಂಬಂಥಾ ಭಾವವನ್ನು ಹುಟ್ಟು ಹಾಕೋದೇ ಗೆಲುವಿನ ಮೊದಲ ಹೆಜ್ಜೆ. ಅದನ್ನು ಈ ಚಿತ್ರ ಸಲೀಸಾಗಿಯೇ ಸಾಧ್ಯವಾಗಿಸಿಕೊಂಡಿದೆ.

ಈ ಚಿತ್ರ ಸುತ್ತೋದೇ ಬಡ್ಡಿ ಸೀನಪ್ಪ ಎಂಬ ಪಾತ್ರದ ಸುತ್ತ. ಇದು ಊರಿಗೆಲ್ಲ ಬಡ್ಡಿ ಕೊಟ್ಟು, ಭಯಾನಕವಾಗಿಯೇ ವಸೂಲಿ ಮಾಡುತ್ತಾ ಊರವರೆಲ್ಲರ ಹಿಡಿ ಶಾಪಕ್ಕೆ ತುತ್ತಾಗುವಂಥ ಪಾತ್ರ. ಇಂಥಾ ಬಡ್ಡಿ ಸೀನಪ್ಪನ ಮಗಳು ಹುಡುಗನೊಬ್ಬನೊಂದಿಗೆ ಲವ್ವಲ್ಲಿ ಬಿದ್ದು ಓಡಿ ಹೋದಾಗ ಆ ಊರ ಮಂದಿ ಏನೇನೆಲ್ಲ ಮಾತಾಡಿಕೊಳ್ಳುತ್ತಾರೆಂಬುದರ ಸುತ್ತಾ ಈ ಕಥೆ ಜರುಗುತ್ತದೆ. ಆದರೆ ಈ ಕಥಾ ಎಳೆಯಷ್ಟು ಸಿನಿಮಾ ಸಲೀಸಾಗಿಲ್ಲ. ಇಲ್ಲಿನ ಕಥೆಗೆ ಹಲವಾರು ಟಿಸಿಲುಗಳಿದ್ದಾವೆ. ಬಲ ರಾಜವಾಡಿ ಬಡ್ಡಿ ಸೀನಪ್ಪನಾಗಿ ವಿಜೃಂಭಿಸಿರುವ ಈ ಸಿನಿಮಾದಲ್ಲಿ ಆರಂಭದಿಂದ ಕಡೇಯವರೆಗೂ ಭರ್ಜರಿ ಮನರಂಜನಾತ್ಮಕ ಅಂಶಗಳೇ ಪ್ರೇಕ್ಷಕರನ್ನು ಮುದಗೊಳಿಸಲಿದ್ದಾವೆ. ಇದೆಲ್ಲವೂ ಈ ವಾರವೇ ನಿಮ್ಮೆಲ್ಲರೆದುರು ತೆರೆದುಕೊಳ್ಳಲಿದೆ.